1 Tɩmote 6 - SEBR SÕNGO

Yem-daad poorẽ

¹ Neb niyns sẽn ket n ya-b yemse tog n gesa b zu-soaben-dãmb wa neb sẽn tog ne waoogr zãnga, woto Wẽnd yʋʋr la Wẽnd gomd kõn paam tʋʋr ye.

² Yembs niyns zu-soaben-dãmb sẽn ya tẽedba da wa yik n paoog-ba, saam-biira sẽn be sʋka yĩng ye. B modg ne sakr n yɩɩda, b sẽn ya tẽedba la Wẽnd zo-rãmb yĩnga. Ad-f sẽn tog n wilg la f sagl tɩ b tũ bũmb ninga.

Zãms yood dãmba

³ Ned sã n zãmsd bũmb a to, n basd Soaal a Zezi Krista goam sõma wã, n basd zãmsg ning sẽn sõngd tõnd tɩ d Wẽnnaama waoogr kẽnd taoor n paasdẽ wã,

⁴ yẽ soab yaa zoang sẽn wuk ne nagre, zɩt sẽn pid ne sogs faado la no-koɛɛm yaalse. Rẽ n wat ne sũ-kiiri, yõs-taaba, tʋy, tags wẽnse,

⁵ zabd-n-pa-sɛtẽ, tɩ yẽ soaba yam sobame, a ka tar sɩd ye la a tẽedame tɩ Wẽnd waoogra yaa bao yõodo dũni kãnga pʋgẽ.

⁶ Wẽnd tũudem sɩd bee yõodo ne ned ning sẽn tagsd t'a sẽn tar-a sek-a lame.

⁷ Ka bũmb la tõnd zã n wa dũni ye, ka bũmb la d na n zã n leb ye.

⁸ Woto wã, d sã n tar n dɩtẽ la d tar n yeelgdẽ bɩ d yet tɩ sek-d lame.

⁹ Neb niyns sẽn dat-ba n zam paoong ne paoongo, bãmb dãmb lʋɩɩ Sʋtãan kʋɩɩbgẽ, Sʋtãan bẽdgẽ; b sũur wulumda ne tʋls wẽns ka tɛka sẽn lebgd zutu, n pogendẽ, n wãad la b menesd ninsaal zãnga.

¹⁰ Bãasa fãa yẽgr yaa arzɛk tʋlsem; yaa kẽer sẽn bas tɩ bã-kãng yõk-ba la b bʋdg n zãag ne b tẽebo la b bas tɩ yell tood sẽn ka tõe n sõd wurg b sũuri.

A Pol sẽn kot a Timote bũmb ninga

¹¹ Sã n ya foom, Wẽnd neda, zãag f meng ne rẽ fãa. Bao sõmblem, bao Wẽnde, bao tẽebo, nonglem, raoodo la sũ-bʋgsem.

¹² Zab tẽeb zab-sõngã, mao n paam vɩɩm sẽn kõn sɛ tɩ yaa rẽ yĩng la Wẽnd bool-fo la rẽ me yĩng la f pʋlem f pʋleng sõngo, kaset dãmb wʋsg taoore.

¹³ Maam n kot-fo, Wẽnd ning sẽn kõta bũmb fãa vɩɩma taoore, Krista a Zezi taoore, Krist ninga a Põs Pilat sẽn dɩ a soab kaseta taoore,

¹⁴ tɩ f reeg noy-kãensa ne pʋ-peelem la yam sõngo n gũud Soaala Zezi Krista pukri,

¹⁵ a Raara sã n wa ta; la sẽn na n taas-a Raarã yaa sũ-noog buud fãa yẽgrã, d Soaal yɛngã,

¹⁶ dĩm dãmb Dĩma la soaalba fãa Soaalã; bãmb bal n ka sɩngr la b ka be sɛɛbo; bãmb n yals b meng vẽenem sẽn ka tõe n kolg zĩigẽ, ninsaal nif sẽn zɩ n teeg la a sẽn kõn teege bada. B paam ziiri la pãnga, marsã la daar fãa. Ami!

Tẽng zug arzɛk zãabo

¹⁷ Sagl dũnna arzɛka rãmba tɩ b vẽ ne tɩtaam buud fãa la b ra teeg b arzɛka t'a pa zɛɛd sɛɛb ye. B teeg Wẽnd tɩ bãmb kõt-d-la fãa tɩ gale, tɩ d sũur tõe n yɩ noogo.

¹⁸ B maan neere; b tʋʋm-sõma yɩ zembala, b kõ ne yamleoogo, b sak n pʋɩ ne b taaba.

¹⁹ Woto la b na n tigs arzɛk sẽn ya zɩsgo n wa tõog n paam vɩɩm menga.

Pʋʋsgo la baasgo

²⁰ M biig a Timote, zã Wẽnd bobellã neere. Vẽ ne goam vɩʋʋdo la sẽn ka be barka, vẽ no-koɛɛma ne bãngr yooda rãmba.

²¹ Yaa b sẽn kelg bãmb dãmba la kẽer bʋdg b tẽeba pʋgẽ. Wẽnd barka sig y fãa!