1 Tɩmote 4 - SEBR SÕNGO

Zirẽ-be-karen-saam-dãmba

¹ Wẽnd Vʋʋsem togsa vẽenega tɩ yaoolem wakatã neb kẽer na n basa b tẽebo n kẽ zirẽ-be-rãmba la b reeg b zãmsgo, sẽn ya Sʋtãan rẽnna.

² B basame tɩ neb tudg-ba, la nin-bãmb dãmb sũur duuga ne kud moomde, tɩ lebg makr sẽn kõt kaset vẽenega tɩ b yaa zirẽ-be-rãmba, ninsaan-kazukma.

³ Nin-bãmb gɩdgda yikãadem kõom, n gɩdgd bũmb kẽer dɩɩbo. Wẽnd n yaool n da kõ sẽn tẽed-b bãmbã, sẽn bãng-b sɩdã, tɩ b reeg n dɩ la b pẽg Bãmba.

⁴ Wẽnd sẽn naan fãa bee neere la rɩɩb ba a ye ka kisi, f sã n dɩt-a ne Wẽnd bark pʋʋsgo.

⁵ Wẽnd Gomdã la pʋʋsgã sẽn pʋʋs a zugã kɩtdame t'a sɩd lebg bõn-sõngo.

⁶ F sã n tõog n wilg saam-biisa woto fãa, f na lebg Krista a Zezi sõgen sõngo, sẽn dɩlg f meng ne tẽeba sẽn dat tɩ f gãd bũmb ningã, la ne zãms-sõma niyns f sẽn tũ n ta marsã wã.

⁷ Sã n ya zamaana soalma, pʋg-yãan-kʋd zʋbsgã, bas rẽ tɩ looge. Ad Wẽnd waoogrã n tog zãmsgo.

⁸ Yĩnga tʋʋma bee yõodo la yõoda ka loog nug ye. Sã n ya Wẽnd waoogrã, yẽ n manegd fãa, yẽ n wat ne rũnna la beoog vɩɩma pʋlem noogo.

⁹ Dẽ yaa bũmb sẽn ya sɩda tɩ d tog n deege.

¹⁰ Tõnd sã n namsdẽ, tõnd sã n bob zabre, yaa d saagr sẽn be Wẽnd vɩɩga nengẽ, sẽn fãaga ninsaalba, sẽn fãaga tẽedbã n yɩɩda.

¹¹ Woto la f tog n wilg la f zãmse.

¹² Ned da paoog-f tɩ f yaa yãag ye. Kõ tẽedba fãa togs-n-taar sõngo, ne f goama, ne f vɩɩm, ne f nonglem, ne f tẽebo la ne f pʋ-peelem.

¹³ Wɩng ne sebra karengo, ne saglgo, ne zãmsgo tɩ m watẽ.

¹⁴ Da bas yĩngr kũuna t'a maag ye. Yaa kũun ning f sẽn paame, bãngr sẽn waa n lʋɩ sʋka tɩ kãsem-dãmba me lagem taaba n dɩk b nus n tik f zugã.

¹⁵ Gãd rẽ wala f sũur bũmbu n wɩsg zãnga tɩ f taab fãa me yãend f sõmblema paasgo.

¹⁶ Maan gũusg ne f vɩɩm la f zãmsgo; da sak yaams ye. Ad yaa woto la f na n fãag f menga la f fãag sẽn kelgd-b fooma.