1 Tɩmote 2 - SEBR SÕNGO

Pʋʋsg Buuda yĩnga

¹ M data ne m sũur fãa tɩ y modg ne kosgo, ne sɛɛg yõkre, ne bark pʋʋsgo Adem biis fãa yĩnga,

² dĩm dãmba, taoor dãmb fãa yĩnga; woto la d vɩɩma yɩt laafi vɩɩm, vɩɩm sẽn be yamleoogo la a tar waoore.

³ Dẽ me n be yõodo la a tat Wẽnnaam, d Fãagda, yam.

⁴ B raaba la ninsaal paam tɩlgre la sɩd bãngre.

⁵ Wẽnd yaa b ye. Ninsaalba me ne Wẽnd sʋka, yaa Wɛɛmb a ye n be: Krista a Zezi, Wẽnd Nedã.

⁶ La bãmb n yao yel-wẽna samde d fãa zĩigẽ. Kaset kãng la sẽn yalse, a wakatẽ,

⁷ la maam n lebg a moanda la a tʋʋm-tʋmda — sɩd la m gomda, m ka yagd zirẽ ye — maam la nin-zẽmba karen-saamba n kõt-b tẽebã ne a sɩdã.

⁸ Woto wã m datame tɩ rapa pʋʋs zĩis fãa, n zẽkd b nus yĩngri, wa neb sẽn mi Wẽnd waoogre, wa neb sẽn ka mi sũ-puur la mo-beedo.

Sẽn tog ne pagba pʋʋsg zĩigẽ

⁹ Pagba me zã b mens neere; b faongã zãag ne wilg-m-meng la tɩtaam, b vẽ ne gɛma, ne sãnem, ne muizãan, ne fut sẽn daad toogo.

¹⁰ B faong yɩɩ b tʋʋm sõma tɩ rẽ n tog ne pagb sẽn tũud Wẽnde.

¹¹ Karẽng wakato, pagba tog n sĩnda b noore la b sak n deeg b sẽn wilgd-b bũmb ninga.

¹² M pa sak tɩ pag zãms raoa, m pa sak t'a rɩ naam a zug ye. A zĩnd sɩɩ!

¹³ Ad-y yaa a Adem la b reng n naan t'a Awa yaool n pʋge.

¹⁴ Kaa Adem n sak kʋɩɩbg ye, yaa pagã n sake la taala lʋɩ-la a zugu.

¹⁵ Bũmb ning sẽn na n fãag-a yaa kamb dogem la rẽ me yaa a sã n sulg a meng n mao ne tẽebo, ne taab nonglem, ne sõmblem baoobo.