1 Sãmwɛlle 9 - SEBR SÕNGO

A Sol gẽesda a ba bõeense

¹ Ned a ye n da be, n yaa a Bẽnzame sakẽ daoa, n boond t'a Kis. A nug ra zãadame. A Kis ba la a Abiyɛl, a Abiyɛl ba la a Seror. A Seror ba la a Bekorat, t'a Bekorat ba yaa a Afiya.

² La a Kis da tara biig sẽn boond t'a Sol, dasãn-beel menga, Israyɛl biig sẽn da ta-a ka ye; a Sol da yaa wok sololl, a zuga woglem da yɩɩda a taaba.

³ A Sol ba, a Kis, bõn-yãans n waa n menem, t'a Kis yeel a biiga a Sol: «Yãk ned a ye t'a yãag fo, tɩ y karg n bao bõeensã.»

⁴ A dʋʋ Efrayim tãnga zug, n pɩʋʋg Salisa tẽnga, n pa yãend-b ye. B tũu Saalim tẽng me la b ra ka be be ye. B saaga a Bẽnzame soolem, la b pa yãend-b ye.

⁵ B waa n taa Suf tẽnga, t'a Sol na n yeel a tũud-n-taagã: «Wa tɩ d lebge, tɩ sã n pa rẽ, m ba na n yĩma bõeensã yelle, n wa maand yɩɩre tõnd poorẽ.»

⁶ Sõgna yeel-a lame: «Ade, dao a yembre n be tẽngã, n ya bãngda, tɩ neba fãa waoogd-a. A sẽn togs bũmb ning fãa pa kongd ye. D kẽng be, daar ninga a na wilg tõnd d sẽn na n bao-b zĩig ninga.»

⁷ A Sol leoka-a lame: «D na n kẽngame, la bõe la d na n tɩ kõ bãngdã? Bur ka le ket tõnd korgẽ ye, la ka so-toaka rɩ-yaals a taaba la d na n kõ-a ye.»

⁸ Tɩ sõgna leok a Sol: «Ade, m tara m wakɩ koɛɛnga, m na tɩ rɩk-a n kõ bãngdã t'a wilg tõnd d sora sẽn na n yɩ-la.»

⁹ Pĩnda Israyɛl rãmb sã n da rabd Soaala-Wẽnd sokre, b ra yetame: «Wa-y tɩ d tɩ yãend sẽn ne-a soabã.» — B sẽn boond b rãmb tɩ bãngdb rũnna wã, pĩnda b ra boond-b lame tɩ sẽn ne-ba, sẽn paamd-b likri.

¹⁰ A Sol yeela sõgna: «F bee bʋʋm, wa tɩ d kẽnge!» La b kẽnga bãngda nengẽ, tẽnga pʋga.

¹¹ B sẽn waa n dabdã, b sega kom-pugli sẽn yi n na n toog koom, tɩ b sok-ba: «Sẽn ne a soaba bee ka bɩ?»

¹² Tɩ b leok-ba: «N-yẽe! A be y taoore. La kẽng-y tao-tao. A waa tẽnga pʋg rũnna tɩ neb n wa maanda sẽn kʋʋd zĩis niynsã n na n kʋ b maoongo. Ning-y pãnga!

¹³ Yãmb sã n kẽ tẽnga pʋga, yãmb na seg-a t'a nan pa sɩng rɩɩb ye, tɩ nebã kõn dɩ t'a nan pa wa ye, tɩ yẽ n tog n ning barka la dẽ poor la nebã na n yaool n dɩ. Bɩ y kẽng tɩ marsã y na yãend-a.»

¹⁴ B kẽnga tẽnga pʋgẽ. Bãmb sẽn ta tẽnga tẽnsʋk la a Samwɛl sẽn seg-ba: wakat kãng t'a da yit n dabda kunkubra zugu.

¹⁵ A Samwɛl waoong ket tɩ beoogo, Soaala-Wẽnd da pĩnd n togs-a lame, t'a bãng tiiri, b yeel-a lame:

¹⁶ «Beoogo, wakat kãngã, mam na n tʋma foom a Bẽnzame tẽng dao a yembre, la fo na pʋdga a zug naam kaam t'a yɩ mam buud, a Israyɛl, naaba. A na n fãaga m nebã Filisti rãmba nusẽ; tɩ mam gesa m nebã, la b yãbrã sãta yĩngri tɩ m wʋmnẽ.»

¹⁷ A Samwɛl sẽn yãe a Sol, la Soaala-Wẽnd sẽn yeel a: «Ad dao ninga mam sẽn da gom ne foomã, yẽ n na n dɩ naam m neba zugu.»

¹⁸ Woto wã a Sol kolga a Samwɛl tẽnga noor n yeel-a: «M kotame tɩ y wilg-m sẽn ne a soaba yiri.»

¹⁹ A Samwɛl leoka a Sol: «Yaa maam la sẽn ne a soabã. Lʋɩ m taoore tɩ d rʋ kunkubra zugu. Yãmb na n naaga maam n dɩ rũnna. Beoogo, m sã n wa leok f sẽn sokd f menga marsã wã, m na kõ-y sore tɩ y kuli.

²⁰ Da le bʋ bõn-yãansa sẽn menema poorẽ ye, yaa dasma a tã dũnna: b le yãend-b lame, Dẽ pʋgẽ me, sẽn be yõod a Israyɛl yĩnga bĩnga yɛ sẽ? M yet yaa foo ne f ba wã zakẽ!»

²¹ A Sol leokame: «Mam ka a Bẽnzame ned bɩ, a Bẽnzame rooga ka roog sẽn paood bɩ? Ka mam ba wã zaka n paood n yɩɩd bɩ? Ad-y goama ka sakd reegr ye.»

²² A Samwɛl peega a Sol ne a tũud-n-taagã tɩ b kẽ rɩɩba roogẽ, n kõ bãmb pipi zĩiga neba sʋka, b ra zemsa neb pis-tã.

²³ A Samwɛl yeela sẽn segenda dɩɩbã: «Wa ne pʋɩɩr ninga mam sẽn dag n kɩs foom, n yet tɩ f bĩng-a toorã.»

²⁴ Sẽn segend-a rɩɩbã waa ne bãoko la zʋ-kɛɛga n tẽgen a Sol taoore; t'a Samwɛl yeel-a: «Ad dɩɩb sẽn tẽgen f taoore, dɩ tɩ rẽ la b ra bĩng-fu, naag m sẽn bool b rãmba tɩ y rɩ.» Baraare a Sol ne a Samwɛl naaga taab n dɩ.

²⁵ B siga kunkubrã n kẽ tẽnga pʋgẽ, la a Samwɛl sõsa ne a Sol bɛonga zugu.

A Sol deegda naam

²⁶ B yika vẽkembeoogo, yibeoog pĩnda. La zĩig sẽn yeege, a Samwɛl bool a Sol bɛonga zugu n yeel-a: «D dɩk sore, m na n yãag-f lame.» La Sol yikame, tɩ yẽ ne a Samwɛl tũ taab n yi.

²⁷ B sẽn ta tẽnga noore, a Samwɛl yeela a Sol: «Yeel f sõgna, t'a loog n lʋɩ tõnd taoore la fo meng yals marsã tɩ m togs Soaala-Wẽnd gomde tɩ f kelge!»