1 Sãmwɛlle 6 - SEBR SÕNGO

Wẽnd pãnga

¹ Soaala zooda kaset paa Filisti rãmba tẽngẽ, kiis a yopoe.

² Filisti rãmba boola b maan-kʋʋdba la b bagba n sok-ba: «D maanda bõe ne koglgã? Wilg-y tõnd d sẽn na n maanega n lebs koglgã a zĩigẽ.»

³ B leokame: «Y sã n na n lebs koglgã bɩ y ra lebs-a zaalem ye. Bao-y yaoodo n deng n yao a Israyɛl Wẽndã. Woto yãmb na sãooge, la y na bãng bũmb ninga sẽn da zɩsgd Wẽnda nug y zugã.»

⁴ B sokame: «Yaa bõe yaoodo la tõnd tog n yao?» Tɩ maan-kʋʋdba la bagba yeele: «Tũuda ne Filisti nanamsa sõore; dɩlla na n yɩɩ sãnem gil a nu sẽn dõog wa yũuri n paas rayʋʋs sẽn dõog ne sãnem, tɩ Naaba-Wẽnd sɩbga tẽns a nu wã la b nanams a nu wã, ne sɩbgr yɛnga.

⁵ Dõog-y yũya la rayʋʋsã, sẽn sãamd y tẽngã, la y pẽg Israyɛl Wẽnnaam. Daare tõe tɩ b nuga sɩbgre yɩ faasga yãmb yĩnga, y wẽnd dãmba la y tẽng yĩnga.

⁶ Yaa bõe tɩ yãmb kengd y sũuri wala Ezipt rãmba ne b dĩma sẽn keng b sũuri? Naaba-Wẽnd sẽn leng-b n sɛ, b ka bas Israyɛl kamba tɩ b loog sɩda?

⁷ Marsã, bɩ y maan bilim-bilm paalga, n wa ne nag-yãans a yiibu sẽn yẽsemd kamba, la sẽn nan ka sog wãk ye; loe-y nag-yãansa ne bilim-bilma la y tall nag-bi wã n tɩ pag yiri!

⁸ Yãmb na n dɩka zooda kaset n sagl bilim-bilma pʋga. Y na yaool marsã n dɩgl a sɛɛgẽ, koglg bila ne sãnema teedo, yaoodã y sẽn na yao wã, la yãmb na n basa niisa tɩ b looge.

⁹ Bɩ y pʋg n ges; y sã n mik tɩ b rɩka Bɛt-Semɛs sore, n dabd Israyɛl tẽnga, y na bãng tɩ yaa Israyɛl Wẽndã n maan tõnd wẽngã la sã n pa yɩ boto, d na bãng tɩ pa bãmb nug n sɩbg tõnd ye, dɩlla yaa wa yɛl sẽn seg taab bala.»

¹⁰ Neba maana boto: B baoo nag-yãans a yiibu sẽn da yẽsemd kamba, n sẽb-ba ne bilim-bilma. B basa nag-bi wã bãgra pʋga.

¹¹ B rɩka koglgã n sagl bilim-bilma pʋga, n paas sãnema teed sẽn makd rayʋʋsã la yũya.

¹² Niigã kell n dɩka Bɛt-Semɛs sor tɩrga; b tũu so-kãng bala la b kũmdẽ, b ka bʋdg goabga, b ka bʋdg rɩtgo. Filisti rãmb nanamse pʋg-b lame al n tɩ ta Bɛt-Semɛs toaaga.

¹³ Bɛt-Semɛs rãmba da wʋrda alkam tãnga pennẽ; bãmb sẽn zẽk b nenga, b yãee kaseta koglga la b sũur yɩɩ noog b sẽn yãend-a wã yĩnga.

¹⁴ Koglga taa Bɛt-Semɛs daoa, a Zozuwe, pʋʋgẽ, n yals be. Kug bedr n dag n be be, b wesa bilim bilma raado n tugl bugum a zugu, n kʋ niisã n yõog n kõ Soaalã.

¹⁵ Levitsã sika zood kasetã ne koglg bilã sẽn da rɩg a sɛɛgẽ ne sãnem teedã; la b dogla rẽ fãa kugra zugu. Badaare, Bɛt-Semɛs rãmba kʋʋ yũ-noog maando la maan-dɩtse.

¹⁶ Filisti nanams a nu wã sẽn yãe rẽnda, b leba Ekrõ, badaar bala.

¹⁷ La ad sãnem gilã sõore, sãnem gila sẽn togsd yũurã, Filisti rãmba sẽn kɩse n na n yao Soaala-Wẽnde: Asdod yaa a yembre; Gaza: a yembre; Askalõ: a yembre; Gat: a yembre; Ekrõ: a yembre.

¹⁸ Sã n ya sãnem rayʋʋsã, b ta Filisti nanams a nu wã tẽnsa sõore, b tẽn-bɛd la b tẽn-bõonese. Yell kãensã fãa kaseto, yaa kugr bedre ning b sẽn dogle koglga a zugã, t'a ket n be rũnna, Bɛt-Semɛs, a Zozuwe pʋʋgẽ wã.

¹⁹ Soaala-Wẽnd sɩbga Bɛt-Semɛs rãmba b sẽn ges b zooda kasetã. Neb pisopoe n deeg sɩbgrã. Sẽn põs-ba kelma kʋʋre, Soaala-Wẽnd sẽn sɩbg bãmba tɩ yɩ toog wʋsga yĩnga.

²⁰ Bɛt-Semɛs rãmba yeelame: «Ãnd n tõe n tɩlg Soaala-Wẽnd taoore, bãmb sẽn pid ne sõmblema? La zood kaseta koglga sã n yi tõnd nengẽ d na n tees-a-la yɛ?»

²¹ B tʋma neb tɩ b kẽng n tɩ yeel Kiriyat-Yeyarim rãmba: «Bɩ y wa rɩk koglgã n ta y tẽngẽ, tɩ Filisti rãmba lebs-a lame.»