1 Sãmwɛlle 31 - SEBR SÕNGO

A Sol kũum

¹ Filisti rãmba zaba ne a Israyɛl la a Israyɛl dapa fãa zoe Filisti rãmba taoore, la b kʋ kẽer n gãneg Gilboa tãnga zugu.

² Filisti rãmba diga a Sol ne a kamba, n kʋ a Zonatã, a Abinadab, la a Malkisuwa, a Sol kamba.

³ Zabra tooga fãa lʋɩ-la a Sol zugu; tãbda rãmb n yãend-a. Yẽ me nif sẽn teeg-ba, a yɛɛsame.

⁴ A Sol yeela sõgen ninga sẽn da tʋkda a zab-teedã: «Wõog-f sʋʋga n kõs-ma, tɩ nin-dẽgd bãmba na n wa tão-ma, la b yaal-m, n ning-m yãnde.» La sõgna sẽn da tʋk a zab-teedã pa sak ye, tɩ rabeem da tar-a lame, la a Sol lʋɩ n bʋʋga a sʋʋgã n kõs a menga.

⁵ Sõgna sẽn yãe t'a Sol kiime, yẽ me lʋɩɩ n bʋʋga a sʋʋga la a naaga a Sol n ki.

⁶ Yɩɩ woto la b ki daar a ye, a Sol ne a kom-dibli a tã la sõgna sẽn da tʋkd a zab-teedã.

⁷ B sẽn yãend b neba sẽegre, n wʋm a Sol ne a kamba kũum, Israyɛl kamba sẽn be-b bãg-faaga rʋʋnde la sẽn be-b Zʋrdẽ rʋʋnde, b fãa yi-la b tẽnsẽ n zoe la Filisti rãmba tɩ reega b tẽnsã n kẽedẽ.

⁸ Vẽkembeoogo, Filisti rãmba wa n zɛɛ teedã. B yãenda a Sol ne a kamba a tãabã sẽn gãe Gilboa tãnga zugu.

⁹ B fiuuga a Sol zugu, n wʋk a zab-teedo. B kɩtame tɩ b sa n togs kibarã b wẽn-naandsa dotẽ la zĩis fãa.

¹⁰ B bĩnga a Sol zab-teedã a Astarte rãmb doogẽ, la b yagla a Sol Bɛt-Seã lalga zugu.

¹¹ Galaad soolem, Yabɛs tẽng neba wʋma Filisti rãmba sẽn maan a Sol bũmb ninga.

¹² La gãndaada fãa kẽna yʋng a ye tõre, n wa rok a Sol yĩnga Bɛt-Seã lalga zugu la b rɩka a kamba me. La b lebg n waa Yabɛs n yõog kũuma bugum.

¹³ B wʋka b kõaba n tɩ bus Yabɛs, tɩɩg sẽn wẽnd pusg tẽngre; b loe b noor dasem a yopoe.