1 Sãmwɛlle 3 - SEBR SÕNGO

¹ Biiga a Samwɛl da tʋnda Soaala-Wẽnd tʋʋmde, maan-kʋʋd a Eli sɛɛgẽ. Wakat kãng tɩ b da ka leb n paamd Soaala-Wẽnd koɛɛg tao-tao ye; Soaala da pa le likd b meng naoor wʋsg ye.

Soaala boonda a Samwɛl

² Yʋng a ye, a Eli da gãe a gãagẽ; a nina pãng ra woogame, a da ka le ne neer ye.

³ A Samwɛl me ra gõeeme. A ra bee sɛka roogẽ. A gãaga ra pa zãr ne Wẽnd zooda kaseta ye. Zĩig ra nan ka sɩng yẽegr ye. Dooga bugum da ket n witame.

⁴ La Naaba-Wẽnd bool-a lame: «Samwɛl, Samwɛl!» T'a sak: «Naaba!» A wudg n kẽnga a Eli nengẽ n yeele: «Yãmb n bool-ma, ad-ma!»

⁵ T'a Eli yeele: «Ayo! Mam pa bool-f ye, lebg n tɩ gãande.» La a lebg n tɩ gãandame.

⁶ Tɩ Naaba-Wẽnd le bool-a: «Samwɛl!» T'a Samwɛl le yik n kẽng a Eli nengẽ n yeel-a: «Ad-ma, tɩ yãmb n bool-m!» T'a Eli leok-a: «M biiga, mam pa bool-f ye, lebg n tɩ gãande.»

⁷ Mik a Samwɛl da nan pa mi Soaala-Wẽnd ye, la Wẽnnaam koɛɛga me dag n nan pa lʋɩ a tʋbrẽ ye.

⁸ La Soaala le bool a Samwɛl naoor a tãab soaba, t'a yik n le kẽng a Eli nengẽ n yeele: «Ad-ma tɩ yãmb n boole!» Dẽ marsã la a Eli yaool n bãng tɩ Soaala-Wẽnd n da boond biigã.

⁹ T'a yeel-a: «Kẽng n tɩ gãnde; la b sã n le bool-fo bɩ f leok: ‹Gom-y wɛ, Soaala, tɩ yãmb rakõora kelgdame.› » La a Samwɛl leb n tɩ gãanda a zĩigẽ.

¹⁰ Naaba-Wẽnd le waame n yals wa pĩnda, n bool a Samwɛl: «Samwɛl! Samwɛl!» T'a Samwɛl na n leoke: «Gom-y wɛ, Soaala, tɩ m kelgdame.»

Wẽnd tʋmda a Samwɛl

¹¹ Wakat kãnga, Soaala-Wẽnd yeela a Samwɛl: «Ade, mam na n maana bũmb a yembre, a Israyɛl pʋga, la sẽn na n wʋm-a fãa, a tʋb na kʋre.

¹² Badaare, mam na pids goam niynsa fãa mam sẽn yeel a Eli ne a zaka poorẽ, bũmb kõn pa n ka pids ye.

¹³ Maam n wilgd-a tɩ m dat n sɩbga a zaka vugr la tɛka, la a mi-la a beegr tiiri. A dag n miime t'a kamb paoogda Soaala, la a kell n pa sɩbg-b ye.

¹⁴ Yaa rẽ yĩnga, la m yet a Eli tɩ bũmb kõn tõog n yẽes a yel-wẽndã, kõn yɩ maoongo, kõn yɩ kũun ye.»

¹⁵ A Samwɛl kell n gãandame tɩ beoog vẽege. A paka Wẽnd dooga kʋɩlense. Dabeem da tara a Samwɛl: a maanda a wãna n togs a Eli, a sẽn wʋm bũmb ningã.

¹⁶ La a Eli bool a Samwɛl n yeel-a: «Samwɛl, m biig sõngo!» T'a sak: «Naaba!» T'a Eli sok-a:

¹⁷ «Yaa bõe koɛɛga, la Soaala-Wẽnd togs foom! Da solg maam bũmb ye. Bɩ Wẽnd sɩbg-fo, la b le sɩbg-fo n bãge, fo sã n solg bũmbu n pa togs maam b sẽn yeel-fa zãnga!»

¹⁸ A Samwɛl togs-a-la fãa, n pa solg bũmb ye. La a Eli yeelame: «Bãmb la Soaala-Wẽnde, b maan bũmb ning fãa sẽn ta b yam!»

¹⁹ A Samwɛl da bɩtame. Naaba-Wẽnd dag n bee ne-a. A Samwɛl gomd ba a ye ra ka lʋɩt vɩʋʋgẽ ye.

²⁰ Al Dã, n tɩ tãag Beerseba, a Israyɛl bãngame t'a Samwɛl lebga Soaala no-rɛɛsa.

²¹ Soaala-Wẽnd da kell n likda b meng Silo. B da vẽnegda b meng ne a Samwɛl, Silo; Naaba-Wẽnd da gomda ne-a.