1 Sãmwɛlle 29 - SEBR SÕNGO

Filisti rãmba lebsda a Daviid a tẽngẽ

¹ Filisti rãmba tigma b tãb-biisa fãa Afɛk; la Israyɛl kamba ra siga kʋɩls niyns sẽn be Zizreyɛl tẽnga sɛɛga.

² Filisti tãnsoaben-dãmba ra lʋɩ b tãb-biisa taoore. A Daviid ne a poorẽ dãmba la a Akis n da baasd kẽndã.

³ Filisti nanamsã sokame: «Ebre kãensa yita yɛ?» La a Akis leoka Filisti nanamsã: «Yaa a Daviid, Israyɛl dĩm, a Sol, sõgne! A yʋʋmde bɩ a yʋʋm a yiib marsã a sẽn be ne maam, la a sẽn waa n nok maama tɛka n tãag rũnna daare, m pa yãe a kɛk la a goaleng ye.»

⁴ Filisti nanamsã puuga b sũur ne a Akis, n yeel-a: «Rig nin-kãnga t'a leb tẽng ning fo sẽn kõ-a wã, a ra yi zabre ne tõnd ye, n da wa ta zabr zĩigẽ n tulg n zab-d ye! Yõa na n yɩ wãna n paam a zu-soab yel-sõmde, tɩ pa tũ ne tõnd neba zut fiuusgu?

⁵ Ka Daviid kãnga la b sẽn yɩɩnd woto wã laa: ‹A Sol kʋʋ neb tusri, la a Daviid kʋʋ tus piiga.› »

⁶ A Akis boola a Daviid n yeel-a: «Ne Wẽnd sẽn vɩ wã, fo ya pʋ-peelem soaba la m sũur da yaa noogo d sẽn waa n tũud taab n zabdẽ, n kẽnd la d lebgdẽ. M pa yãe sẽn yɩ wẽng f nengẽ ye, al daar ning fo sẽn wa m nengẽ n tãag rũnna. La nanamsã tugda beem ne foom.

⁷ Woto yĩnga, bɩ f leb ne laafi, n da sãam Filisti nanamsã sũur ye.»

⁸ A Daviid yeela a Akis: «Mam maana bõe? Mam sẽn sɩng n kẽ yãmb tãpa tɛka, m maana bõe tɩ y sũur puug ne maam tɩ sek m kõn le tõog n tɩ zab ne m zu-soaba bɛɛba?»

⁹ A Akis leoka a Daviid: «Fo meng miime tɩ m sũur nooma ne foom wala Soaala malɛka, la yaa Filisti nanamsã n yeele: ‹Pa tog t'a kẽng zabrã ne tõnd ye.›

¹⁰ Rẽ yĩnga yik-y yibeoog pĩnda, foo ne f zu-soaba neb sẽn tũ foom n wa ka wã, la y leb zĩig ning mam sẽn kõ yãmba. Da sãam f sũur ye, tɩ mam nong-f lame. Yik-y tõd-beoogo, tɩ zĩig sã n yẽege, bɩ y sɩng kẽnde.»

¹¹ A Daviid ne a neba yika tõd-beoog pĩnda n loog n leb Filisti rãmb tẽngẽ. Sã n ya Filisti rãmba, bãmb teesa Zizreyɛl.