1 Sãmwɛlle 28 - SEBR SÕNGO

¹ Wẽnd kãnga Filisti rãmba tigsa b tãb-biisi n na n zab ne Israyɛl; la a Akis yeela a Daviid: «Bãng tɩ foom ne f neba na n tũu maam n kẽng zabrã.»

² T'a Daviid leoke: «Yaa woto marsã la f na n bãng f yamba sẽn na n tʋm tʋʋmd ninga.» T'a Akis yeela a Daviid: «Fo na n yɩɩ mam gũuda, daar fãa.»

³ A Samwɛl da kiime, t'a Israyɛl da yãb-a, n mum-a a tẽngẽ, Rama. A Sol da gɩdg a soolma fãa pʋgẽ, wa bũmb sẽn kisi, kɩɩms boolgo, kũum sokre. A waa n kong n kɩɩsa a meng noore. Ad sẽn tũ ne bũmb ninga.

⁴ Filisti rãmba da tigma taaba n wa gãneg tãp Sunem. A Sol tigma a Israyɛl zãng fãa la yaa Gilboa la a tɩ gãneg tãpo.

⁵ A Sol yãee Filisti rãmba tãb-sikã n yɛɛse, a sũur kiuusame t'a rigd wa rindibgu.

⁶ A Sol makame n na n sok Naaba-Wẽnde la bãmb pa leok-a ye. B pa leok-a ne bag-teedã n-yẽe bɩ Ayoo, b pa leok a zãmsd pʋgẽ, b pa leok-a ne bãngd noor ye.

⁷ Dẽ la a yeela a neba: «Wilg-y m pag a ye sẽn sokd kɩɩmse sẽn be zĩig ninga tɩ m tɩ sok-a bũmbu.» A poorẽ dãmba yeel-a lame: «Pag a ye n be Eyin-Dor, n boond kɩɩmse.»

⁸ La a Sol yeesa a fut n dɩk fut a taaba n yelge tɩ b ra bãng tɩ yaa yẽ ye, n loog ne neb a yi. B taa paga nengẽ ne yʋngo. A Sol yeel-a lame: «Bũmb la m dat tɩ f togs-ma, ned a ye sẽn ki la m dat tɩ f bool-a n kõ-ma. M na n pʋd a soab yʋʋre.»

⁹ Paga leokame: «Ade, fo mii a Sol sẽn maan bũmb ninga; a soolma fãa pʋgẽ a gɩdga kɩɩms boolgo la b sokre. Yaa bõe marsã la y gãnegd-m bẽdgo sẽn tõe n wa ne m kũum?»

¹⁰ A Sol wẽename n yeele: «M wẽend ne Wẽnd tɩ bũmb kõn maan-f yell kãnga yĩng ye!»

¹¹ Paga yeelame: «F ratame tɩ m bool ãnna?» T'a Sol leoke: «Bool a Samwɛl n kõ-ma!»

¹² Paga yãenda a Samwɛl n kelme. A lɛɛg n yeela a Sol: «Yaa bõe tɩ yãmb belg maam? Yaa yãmb la a Sol!»

¹³ Dĩma yeel-a lame: «Da zoe rabeem ye! La togs maam f sẽn yãende.» Tɩ paga na n leoke: «Mam nee kɩɩm a ye sẽn yit kɩɩmsẽ n watẽ!»

¹⁴ A Sol sokame: «A wẽnda ãnna?» Tɩ pagã leoke: «Yaa nin-kẽem n wate, a pila fuugu!» A Sol bãngame tɩ yaa a Samwɛl la a sulgame, n fõgneg a neng tẽnga, n wõgemde.

¹⁵ A Samwɛl yeela a Sol: «Bõe tɩ f sãamd m vʋʋsgo, Bõe tɩ f boond-m ka?» A Sol leokame: «Yaa yell n pak maam la wʋm-m lame: Filisti rãmba kaooga zabre ne maam la Soaala-Wẽnd loogame n bas-ma. Bãmb pa le leokd-m ne bãngdba noore, bɩ ne zãmsd ye. La mam boola yãmb, tɩ y wilg maam, bũmb ning m sẽn tog n maane.»

¹⁶ A Samwɛl yeelame: «Bõe yĩnga tɩ fo sokd maam. Fo meng neeme tɩ Naaba-Wẽnd zãagame n bas foom, n dɩt beem ne foo.

¹⁷ B maana foom wala m sẽn da pĩnd n togs foo bãmb yʋʋr yĩngã. B reega naama f nusẽ n kõ a Daviid.

¹⁸ Fo pa reeg Soaala-Wẽnd koɛɛg ye, fo pa kɩt tɩ b rok b sũur ne Amalesitsa kʋʋb ye. Yaa rẽ me yĩng la yɛla sẽn ya woto wã.

¹⁹ La rẽ pʋgẽ me, Naaba-Wẽnd na n naaga foom ne a Israyɛl kamba n sagl Filisti rãmba nusẽ. Beoogo foom ne f kamba, yãmb na n looga ne maam kɩɩmsa zĩigẽ la Soaala-Wẽnd na n basa Israyɛl ne a tãb-sikã Filisti rãmba nusẽ.»

²⁰ Wakat kãng bala, a Sol lʋɩɩ tẽng sara, ne a woglma fãa; a Samwɛl goama da kẽes-a-la waood kãsenga, n paas me, a pãng da pa waoog ye, t'a noor da pa tol n lemb dɩɩb daara tõr ye.

²¹ Paga wa n bʋʋga a Sol, n mik t'a yɛɛsa al wʋsgo; a yeel-a lame: «Ade, yãmb yem-poaka reega yãmb noore; m saka yãmb goama. M pa zoe m vɩɩma bõn ye.

²² Marsã bɩ yãmb me kelg m koɛɛga, la y sak tɩ m kõ-y bur girga tɩ y rɩ n paam pãng n le rɩk y sore.»

²³ A Sol zãgsame n yetẽ: «Mam pa na n dɩ ye!» A poorẽ dãmba ne paga modg-a lame, t'a sak n kelg-ba. A yikame n zaoond goeele.

²⁴ Paga da tara nag-bil wubdga a zakẽ, t'a kʋ-a tao-tao, n yãk zom n nage, n wẽ bur sẽn pa ning bɩlle.

²⁵ Paga rɩka fãa n wa tẽgen a Sol ne a poorẽ dãmba, tɩ b rɩ n yaool n yik n kul yʋng kãng bala.