1 Sãmwɛlle 24 - SEBR SÕNGO

A Daviid basda a Sol

¹ Wẽnd kãnga a Daviid dʋʋ Eyin-Gedi tãmse, n tɩ kẽ be.

² A Sol tɩ zaba ne Filisti rãmba n lɛɛg n watẽ; b yeel-a lame: «Ade, a Daviid be Eyin-Gedi weoogo.»

³ A Sol yãka neb tus a tã, gãndaad sẽn yi a Israyɛl sagsa zãnga, tɩ b na n bao a Daviid ne a nebã, zĩig ninga sẽn boond tɩ Yãgs Pĩisẽ.

⁴ B wa n yãee piis bãgre sẽn da be sor noore. Tãn-bok n da pẽ be, t'a Sol kẽe n na n dõbende. Mik a Daviid ne a nebã da bee tãn-boka yaanga.

⁵ T'a Daviid neba yeele: «Ad daar ninga Soaala-Wẽnd sẽn yet fo: M yõka f bɛyã n sagl f nugẽ, bɩ f maan ne-a wa f sẽn date.» La a Daviid soosame n wõrg a Sol kobra noore.

⁶ Dẽ poore, a Daviid sũura kiuusame, a sẽn wõrg a Sol kobra yĩnga.

⁷ La a yeela a nebã: «Wẽnd na gũ maam, tɩ m da maan wẽnga la m nug ra sɩɩs m zu-soabã, Soaala sẽn kõ a soab naama ye!»

⁸ A Daviid goma ne a nebã woto, tɩ b tõog b menga, tɩ b ra yõk a Sol ye. La a Sol yik n yii tãn-bokã n dɩk a sore.

⁹ Dẽ poore, a Daviid yik n yiime la a kelma a Sol poorẽ: «M zu-soab la m dĩma!» T'a Sol wẽneg n ges a poorẽ. La a Daviid wõgemdame n fõgneg a neng tẽnga.

¹⁰ A Daviid yeela a Sol: «Bõe tɩ yãmb kelgd neb goama, neba sẽn tar t'a Daviid dat n sãama yãmb yellã?

¹¹ Ade! Yãmb meng nif yãenda rũnna. Soaala-Wẽnd da bas-y-la m nugẽ, rũnna, tãn-boka pʋga. M neba ra bilgda y kũum la m zoe-la y nimbãanega n yeel tɩ m nug kõn sɩɩs m zu-soaba ye, tɩ yaa Naaba-Wẽnd n kõ-a naam.

¹² M dĩma, bɩ y gese! Ges-y yãmb kobra noore, m sẽn zãad m nugẽ! M wõrga yãmb kobra noore, n yaool n pa kʋ-y ye. Bɩ y bãng la y tags tɩ m ka tar pʋ-toog la beem ne y ye la m ka beeg-y ye. Yãmb yẽ, yãmb gũusda maam bala n na n dok m yõore.

¹³ La Wẽnd na kao d yiiba bʋʋdo! Wẽnd n na rok m sũurã n kõ-ma. Maam yẽ nug kõn sɩɩs yãmb ye.

¹⁴ Kʋdem dãmba maana b yelbũndi: ‹Wẽnem n dogd wẽnem.› Rẽ n so tɩ mam nug ka na n tol n sɩɩs yãmba.

¹⁵ Yaa ãnna la a Israyɛl dĩma zoet n pʋgda? Ba kɩɩnga! Karenga!

¹⁶ Wẽnd kao d yiiba bʋʋdo! B gese! B bʋ n sõng maam la b kõ-m bʋʋm, n fãag maam y nugẽ.»

¹⁷ A Daviid sẽn gom woto n sɛ, a Sol yeelame: «M biiga, a Daviid, sɩd yaa fo koɛɛg bɩ?» La a Sol kelmame t'a nintãma sodgdẽ.

¹⁸ A yeela a Daviid: «Fo pʋ-peelem yɩɩda maam al wʋsgo. Fo maana maam neere, la mam yẽ maana foom wẽnga.

¹⁹ Sũ-maasem ninga fo sẽn maan-m dũnna wã, wilgda f sũ-bʋgsem ne maam; tɩ Naaba-Wẽnd yõka maam n ning fo nugẽ la fo ka kʋ-m ye.

²⁰ Ned tukda a bɛ sor zugu, n bas-a t'a loog ne laafi sɩda? Wẽnd na rol f sẽn maan maam neer ning rũnna wã!

²¹ Mam miime marsã, tɩ fo na n wa rɩɩ naam, ka leb n ya sãmbg ye, la a Israyɛl rĩung na n yɩ-la f soolem.

²² Wẽen ne Wẽnd, tɩ mam sã n loog n sɛ, fo kõn sãam m buuda ye, la fo kõn kɩt tɩ m buuda yʋʋr menem ye.»

²³ A Daviid wẽena ne a Sol. A Sol leba a yiri, t'a Daviid me ne a nebã leb b sẽn da soondẽ wã.