1 Sãmwɛlle 2 - SEBR SÕNGO

A An zodgda a yɩɩlle

¹ A An pʋʋsa woto: «M sũur kɩdemda sũ-noogo, Naaba-Wẽnd maasmẽ. Bãmb n le zẽk m zugu. M noor yaagame n kãab m bɛɛba wẽnga, m sũur nooma, m sẽn tõog m bɛɛba yĩnga.

² Soaala yaa sõngo. Bãmb bal la Pĩiga. Bãmb bal la Wẽnde.

³ Bas-y zẽk-m-meng goama, wilg-m-meng goama da le yi y noorẽ ye! Soaala-Wẽnnaam tara bãngre, bãmb m mi sẽn ya sĩdimdi la faoogo.

⁴ Pãn-dãmba tãbd kaoome, tɩ koms rãmba rɩk pãng n sẽbg b sɛɛga.

⁵ Sẽn da rɩt b rɩɩb n tɩgdã, koosa b menga n deeg rɩɩbo, tɩ kom sẽn tar b rãmba rɩt tɩ b pʋg pitẽ. Sẽn zĩ-a n kũm rogem, rogda naoor a yopoe; tɩ sẽn da dogda kamb lebg pʋg-kiiri

⁶ Soaala n kʋʋde, bãmb n vʋʋgde. Bãmb n sikd bʋg-tẽngẽ. Bãmb n yiisd kɩɩmsẽ.

⁷ Bãmb n kẽesd naongo, bãmb n samd arzɛgse, bãmb n zẽkd neda, bãmb n sulgd-a.

⁸ Bãmb n takd naong soaba t'a yit tomẽ, la b takd nimbãan-ned n yiisd-a tãmpʋʋrẽ, n zĩndigd-a ne pãng rãmbã, n kõt-a naam zaoore tɩ yaa a pʋɩɩre. Tẽnga sẽn zao bũmb ning zugã bee Naaba-Wẽnd nugẽ, bãmb n zaoolg dũni wã a zĩigẽ.

⁹ Bãmb n gũud b zo-rãmba nao kẽndre: tɩ lik na n loog ne nin-wẽnga. Ka ne a yãoog pãnga la ninsaal tõe bũmb ye.

¹⁰ Naaba-Wẽnd n na n kao b bɛɛba zãnga, b na n zĩnda yĩngr n tool b sa-tãse. Naaba-Wẽnd na n kao ãndũni rãmba bʋʋdo. Bãmb n na n kõ b dĩma tõogo, b sẽn taag a soab kaama zug na n zẽkame.»

¹¹ A Elkana leba a yir, Rama, la biiga kell n paame n tʋmd Soaala-Wẽnd tʋʋmd ne maan-kʋʋd a Eli.

A Eli kamba

¹² A Eli kamba da yaa bi-beese. B toog ra ka be ne Naaba-Wẽnd ye.

¹³ B manesem ne b saam-biisa ra yaa woto: Ned sã n da kʋ maoongo, nemda rʋgb wakato, b ra tʋmda neda. Nin-kãng ra wata ne kõse.

¹⁴ A da rɩkda kõsã n tʋm kut rʋka pʋga bɩ kut rubla, bɩ tãnd rubla pʋga, la kõsa sẽn da kõs neong ninga, b ra yaagd-a lame n sooge. Yaa woto la b ra maand ne Israyɛl kamba fãa sẽn da wat ne b kũun Silo tẽnga.

¹⁵ N yɩɩd rẽnna, b ra ka maagd b meng tɩ b reng n yõog nem-kaama bugum meng ye, sõgna da watame n yeel ned ninga sẽn maana maoongã: «Yãk nemd ninga sẽn nan ka kɩɩm, maan-kʋʋda yĩngã, n wa, t'a kõn deeg nemd sẽn dʋg ye, yaa nemd kãad bal la a rata.»

¹⁶ Ned sã n da yeel-a: «Yaas tɩ b reng n yõog nem-kaama bugum, tɩ f na yãk f sẽn date,» a da leokdame: «Ayo! Kɩs mars-mars noogã, tɩ sã n pa rẽ, m na n yãka ne pãnga.»

¹⁷ A Eli kamba sẽn da maanda da yaa wẽng wʋsg Wẽnnaam nifẽ. B ra ka get maanda wa yaa bũmb sẽn dɩk n kõ Soaala-Wẽnd ye.

A Samwɛl tʋʋmd Silo

¹⁸ A Samwɛl da maanda a tʋʋmde, Wẽnd waoogra doogẽ. A da yeelgda a tʋʋmd fuug sẽn wʋg toore ne gĩs peelse.

¹⁹ Yʋʋmd fãa, a ma ra sẽta fu-yorg bila, t'a sã n tũud a sɩdã n wat n na n kʋ yʋʋmd maoongã, bɩ a wa kõ-a a Samwɛl.

²⁰ A Eli ra ningda a Elkana ne a paga barka. A ra yeta a Elkana: «Wẽnd na kɩt tɩ pʋg kãnga le rog kamba a taaba n kõ-fo, n lebs biig ning a sẽn dɩk n kõ Soaala-Wẽndã!» Dẽ poore a Elkana ne a zaka rãmb da lebda b yiri.

²¹ Soaala-Wẽnd sẽn tẽeg a An yelle, a waa n doga kom-dibli a tã, la kom-pugli a yiibu. La sã n yaa a Samwɛl, yẽ ra bɩta Soaala maasmẽ.

²² A Eli da kʋʋla wʋsgo, la a waa n wʋma a kamba sẽn da maan seem ninga ne a Israyɛl zãng fãa, a wʋmame tɩ b da tol n gãee ne pagba sẽn da tigimd sɛka roog noor, b tʋʋmd yĩnga.

²³ A Eli yeela a kambã: «Bõe yĩnga la yãmb tʋmd tʋʋm kɛg woto? Mam wʋma neba fãa sẽn gomd y tʋʋm wẽnã yelle.

²⁴ Ayo! M kamba, bɩ y da maan woto ye! Mam sẽn wʋmd b sẽn yet bũmb ning y poorẽ wã pa neer ye.

²⁵ Ned sã n beeg a to, Wẽnnaam n na n yals sʋka la a sã n beeg Wẽnnaam ãnd n na n yɩ wɛɛmba?» La kamba pa kelg b ba koɛɛg ye tɩ Naaba-Wẽnd da rat n yãka b yõore.

²⁶ La sã n yaa a Samwɛl, a da ket n paasda ne yagdo la rasãndlem, Naaba-Wẽnd taoore la a saam-biisa me taoore.

A Eli kamba kũum

²⁷ Wẽnnaam bãngd a ye n wa a Eli nengẽ la a yeel-a lame: «Soaala-Wẽnd koɛɛg la woto: Mam vẽnega m meng ne f yaaba zak rãmba, b sẽn da waa n be Ezipt rãmb soolmẽ, Ezipt tẽnga.

²⁸ Ad-f yaabã, a Aarõ, maam n tũus-a, a Israyɛl sagsa kamb sʋka, t'a yɩ m maan-kʋʋda, n dʋʋd m maan-kugrã n yõogd wisdu la a bobd b sẽn tar bũmb ning n sokd Wẽnde. Mam kõo f ba zakã tõog, t'a rɩlg a menga ne pʋɩɩr ninga a Israyɛl kamba fãa sẽn kõt Soaala-Wẽndã.

²⁹ Yaa bõe yĩnga la y maand wala maanda la kũuna, m sẽn yet tɩ b wa kõ-m m doogẽ wã ka bõn-sõma? Bõe tɩ ya nem-sõma wã, m buuda sẽn kõt-ma, n lebg yãmb soolem tɩ y rɩt n nobda? La bõe n maan tɩ fo waoogd f kambã n yɩɩd maam.

³⁰ La sẽn ya woto wã, a Israyɛl Wẽnnaama n gomda, m na n leoka koɛɛg kãngã: M da yeelame tɩ foo ne f ba wã zakẽ la m na n yiis m maan-kʋʋdba, daar fãa yĩnga. La marsã, maam n yete: rẽ sɛɛme. Sẽn waoogda maam, mam na waoog a soaba; la sẽn paoogda maam, mam me na paoog-a!

³¹ Ade! Kõn le kaoose tɩ m kẽ f roogã la f sakã n yiis kʋdr fãa tɩ nin-kẽem da le kees be ye.

³² Ned a to n na n wa reeg f zĩiga, wẽnd doogẽ wã. F na n yãenda a sẽn na n maan a Israyɛl neer ningã. Sã n ya fo zakã, nin-kẽem kõn le zĩnd a pʋgẽ bada.

³³ F roagd a ye la m na n yaool n bas, m maan-kugra sɛɛgẽ; yẽ n na n ges t'a nin wa yiigi, n ges la a kũmd sũuri, la rẽ t'a taaba fãa kiime.

³⁴ F na rɩ m sẽn togsd bũmb ninga kaseto ne yell ning sẽn na n pak f kamb a yiibã: daar a ye la b na n naag taab n ki.

³⁵ Dẽ poore, m na yiisa m maan-kʋʋd a yembre, ned sẽn ka bʋt moogo, ned sẽn na n maan sẽn noom m sũuri. M na n kõ-a-la kamba la bãmb n na n soog maan-kʋʋra naam daar fãa, dĩm ning m sẽn na n tũusa sɛɛgẽ.

³⁶ La ned ninga sẽn na n kella fo zaka pʋga, na n tɩ wõgemd a taoore, n bõs lagfo la miisgu n yetẽ: ‹M yõkda y sɛɛga, sõng-y tɩ m paam tʋʋmd bila a yembre, maan-kʋʋdba nengẽ, n tõog n paam dɩ-võre n ning m noorẽ.› »