1 Sãmwɛlle 16 - SEBR SÕNGO

A Daviid tũusgu

¹ Daar a yembre, Soaala yeela a Samwɛl: «Fo na n kell n yõka yãbre, a Sol poorẽ, n ta da-bʋre? Fo zɩ tɩ m bas-a lame. A kõn le rɩ naam Israyɛl ye. Sui f yɩɩlla kaam tɩ pidi, la yiki! Mam tʋmd-f-la a Zese, Bɛtelyɛɛm neda, yiri, tɩ m yãenda a kamba sʋka dĩm ning m sẽn datã.»

² La a Samwɛl leokame: «Mam maanda a wãn n ta be? A Sol sã n bãnge, a na n kʋ-m lame.» Soaala yeelame: «Fo na n talla nag-sadg n kẽnge la f na n tɩ yeelame: ‹M wat n na n kʋʋ maoongo n kõ Soaala-Wẽnd.›

³ Fo na n boola a Zese t'a wa maoonga kʋʋbã. M meng m toor na wilg-f f sẽn tog n maan bũmb ninga. Mam sẽn na wilg foom a soaba zug la f na n pʋdg naama kaam.»

⁴ A Samwɛl maana soaala sẽn togs-a bũmb ning fãa, la a taa Bɛtelyɛɛm. La tẽnga nin-kẽemba seg-a-la ne yɛɛsgo. B sok-a lame: «Yaa noogo, tɩ yãmb wat ka?»

⁵ T'a Samwɛl leoke: «Yaa noog bala; m wat n na n kʋʋ maoongo, bɩ y segl y mens n yɩ sõma, la y wa tũ maan tɩ d kẽng maoongã kʋʋb zĩigẽ.» La yẽ meng yɩlga a Zese ne a kamba, la a bool-b-la maoonga kʋʋb zĩigẽ.

⁶ B sẽn ta maoonga zĩigẽ, a Samwɛl yãenda a Eliyab, n yeel a sũurẽ: «M mi tɩ Soaala-Wẽnd sẽn tũus a soabã bee ka m taoore.»

⁷ La Soaala-Wẽnd yeela a Samwɛl: «Da ges a neng neerem ye, da ges a woglem ye, tɩ ka yẽnda la m yãkd ye; ninsaal geta nin sẽn ne, Soaala-Wẽnd geta sũurẽ.»

⁸ A Zese boola a Abinadab a Samwɛl taoore la a Samwɛl yeelame: «Ka yẽnda me la Soaala-Wẽnd tũus ye!»

⁹ A Zese kɩtame t'a Sama wa: t'a Samwɛl yeele: «Ka yẽnda me la b tũus ye!»

¹⁰ La a Zese kɩtame t'a kamb a yopoe wã wa bãngda taoore. A Samwɛl yeela a Zese: «Soaala-Wẽnd pa yãk ned ba a ye bãmbã sʋk ye.»

¹¹ La a le yeelame: «Fo kamba tɛk la woto bɩ?» T'a Zese yeele: «B yao n kete, n ya rũm-kɩɩma.» A Samwɛl yeela a Zese: «Tʋm tɩ b tɩ bool-a t'a wa tɩ tõnd kõn sɩng rɩɩbo t'a nan pa wa ye.»

¹² La a Zese tʋmame tɩ b babs-a t'a wa; a Daviid nenga da yaa yãag nenga; a neng ra yaa neere n sakd gesgo. La Soaala-Wẽnd yeela a Samwɛl: «Yik n pʋdg a zug naama kaam, tɩ yaa yẽ!»

¹³ A Samwɛl rɩka kaama ne yɩɩllã, n pʋdg a Daviid zugu, a kẽem dãmba nifẽ. La badaar tɛka, la sẽn pʋge, Naaba-Wẽnd pãng kẽe a Daviid. A Samwɛl dɩka sore la Rama la a leb yã.

¹⁴ Soaala-Wẽnd pãnga yi n bas a Sol t'a zʋga tek n lebg yoogo, n tar-a n namsdẽ.

¹⁵ A Sol sõgen-kamba yeelame: «Ad-y Naaba-Wẽnd basame tɩ yam yoogo kẽ yãmba n tar-y n namsdẽ.

¹⁶ Sẽn be yaa y kõ noor bala tɩ d be-la y yĩnga. D na yãend ned sẽn mi bɛɛl wẽebo, la yam yoogã sã n wa namsd yãmba, nin-kãng na wẽ bɛɛlã tɩ yãmb paam yolsgo.»

¹⁷ A Sol leoka a poorẽ dãmba: «Bao-y ned sẽn tõe n maan noog ne bɛɛl, n kõ-ma!»

¹⁸ Na-yir dãmba nin-yend yeelame: «Ade, mam yãee Bɛtelyɛɛm daoa a Zese biiga, a mii bɛɛla, n paas me, a yaa gãndaoogo n tar pãnga, n ya zab-zabda, a noor mii goama, la yaa dasãnga, la Soaala-Wẽnd bee ne-a.»

¹⁹ A Sol tʋma a Zese nengẽ, tɩ b tɩ yeel-a: «Tʋm maam f biig a Daviid, sẽn gũuda piisã.»

²⁰ A Zese yãka bõang a ye la rãam ne waoog la bulla la a tʋma rẽ fãa, ne a biiga a Daviid tɩ b tɩ kõ a Sol.

²¹ A Daviid taa a Sol nengẽ, n yals a taoore; la a taa a Sol yam al wʋsgo, t'a yãk-a t'a tʋkd a zab-teedo.

²² La a Sol kɩtame tɩ b tɩ yeel a Zese: «M kotame tɩ f bas f biiga a Daviid, t'a yɩ mam dakõore, t'a taa mam yam.»

²³ La yam wẽngã, Soaala-Wẽnd sẽn bas-a ne a soaba, sã n da kẽe a Sol fãa, a Daviid da rɩkda bɛɛl n wẽ. La a Sol da paamda laafi la yolsgo; la yam wẽngã da zoet n basd-a lame.