1 Sãmwɛlle 11 - SEBR SÕNGO

A Sol fãagda Israyɛl

¹ Amonitsa dĩm, a Naas, yiisa tãpo, n wa gũbg Yabɛs, Galaad tẽnga. Yabɛs rãmba yeela a Naas: «Yõg zood ne tõndo, tɩ d na sak foom.»

² La a Naas, Amonitga, leok-b lame: «Mam na yõg zood ne yãmb, la rẽnd tɩ m deng n leo yãmb ned kamb fãa rɩtg nifu. M data woto n ning a Israyɛl zãng fãa yãnde.»

³ Yabɛs nin-kẽemba leok-a lame: «Kõ-d dasem a yopoe, tɩ d tʋm neb Israyɛl soolma fãa pʋgẽ, la ned ba ye sã n ka wa sõng-do, d na rɩk d mens n kɩs foom.»

⁴ Sẽn tʋʋm b rãmba taa Gibea, a Sol sẽn da be tẽng ningã, n togs tɩ neba wʋm. La neba fãa sɩnga yãbre.

⁵ La ade, a Sol da yi-la a pʋʋgẽ n pʋgd a niis n watẽ, la a sokame: «Bõe n tar nebã tɩ b yãbda?» Tɩ b togs-a Yabɛs rãmba sẽn yeel koɛɛg ningã. A Sol sẽn wʋm rẽndã,

⁶ Soaala-Wẽnd pids-a-la ne raoodo, t'a sũura sɩng kɛɛbo.

⁷ A yãka niis a yiibu, n bees ba, n tʋm neb Israyɛl tẽnsa fãa tɩ b tɩ yeele: «Sẽn pa boba zabre ne a Sol la a Samwɛl, yaa woto la b na n bees a soab niisi!» Soaala-Wẽnd kɩtame tɩ rabeem kãseng yõk nebã, tɩ b fãa gill yi wa nin-yende.

⁸ A Sol sõda neba Bezɛk: a Israyɛl kamba sõor da yaa tus kobs-tã, a Zɩɩda rapã, tus pis-tã.

⁹ La a yeela b sẽn da tʋm b rãmbã: «Yeel-y Galaad Yabɛs tẽng rãmba: beoogo, wĩndga sã n wa zẽke n zabdẽ, y na n paama sõngre.» B sẽn leb b yiri, b taasa koɛɛgã Yabɛs rãmba, tɩ b sũur yɩ noogo.

¹⁰ Yabɛs rãmba yeela a Naas: «Beoogo, tõnd na n yi n sega yãmba, la y na n maana y sẽn dat bũmb ninga ne-do.»

¹¹ Vẽkembeoogo, a Sol welga nebã zĩis a tã. Yibeoog pĩnda, b tɩ kẽe Amonitsã tãb-sikã, n zab ne-ba, al tɩ ta wĩnto-sʋka. Sẽn põs-ba sẽegame. Neb a yiib meng pa tõog n pa ne taab ye.

¹² Nebã yeela a Samwɛl: «Ãnd n da yet t'a Sol kõn dɩ naam tõnd zugu? Bɩ y yõg nin-bãmb n kõ-d ka, tɩ d kʋ-ba!»

¹³ La a Sol yeelame: «B kõn kʋ ned ba a ye dũnna daara ye, tɩ rũnna Soaala-Wẽnd fãaga a Israyɛl.»

¹⁴ A Samwɛl yeela nebã: «Wa-y tɩ kẽng Gilgal, n tɩ yug naama n paase.»

¹⁵ A Israyɛl kamba fãa kẽnga Gilgal, b zaondga a Sol a naam goeel zug, Soaala-Wẽnd taoore, n yet t'a yɩ b dĩma. Beene, b kʋʋ maando, laafi yĩnga la be me, a Sol ne Israyɛl gill maana kibs kãsenga.