1 Rĩm-dãmbã 9 - SEBR SÕNGO

Wẽnd likri

¹ A Salomo sẽn me wẽnd doogã, a zakã la a sẽn tʋlg fãa, n sɛ,

² Soaala-Wẽnd lika a Salomo, naoor a yiib soaba, wala b sẽn da lik-a Gabaõ tẽnga.

³ Soaala yeel-a lame: «M wʋma f sẽn pʋʋs n kos-m bũmb ninga. F sẽn me roog ning n kõ-ma m deeg-a lame n dat n puk a pʋgẽ tɩ m be ne yãmb daar fãa. M nin la m sũur na n paa ne-a, wakat buud fãa, m sẽn nong yãmba yĩnga.

⁴ Sã n ya foo, ad-f sã n kẽn wa f ba a Daviid, ne sũ-tɩrga, ne pʋ-peelem, n deeg m noya la m sẽn yals fãa,

⁵ m na kɩt tɩ f rɩ naam a Israyɛl zugu, wala m sẽn kãab f ba, a Daviid, m sẽn waa n yeel-a: ‹F kõn tol n kong biig sẽn na n zaoond a Israyɛl naama zaoor ye.›

⁶ La yãmb bɩ y kamba sã n wa bas maam, y sã n ka reeg noya la saglsã m sẽn kõ yãmbã, y sã n tɩ pʋg wẽn-naandsã n waoog-ba,

⁷ m na yiis a Israyɛl m sẽn tɩ kẽes-a tẽng ningã, m na yi n bas doog ning m sẽn kẽes m mengã, la a Israyɛl na lebg a bɛɛb yelbũndi la b laado dũni wã fãa pʋgẽ.

⁸ Ned ning fãa sẽn na n kolg rooga sẽn me woto wã na n yɛɛsame la a na n yeelame: ‹Ya bõe yĩng la Soaala-Wẽnd maan woto ne b tẽnga la b roogã?›

⁹ La b na n leokame: ‹Yaa b sẽn bas Wẽnnaam, b Soaala, sẽn yiis b ba rãmba Ezipt tẽnga, n yaool n tɩ kẽ wẽn-naandse, n pʋg-ba la b waoog-ba; yaa rẽ yĩng la Soaala tool-b yel-beed kãensã.› »

Yẽsgo ne a Iram

¹⁰ Yaa yʋʋm pisi pʋgẽ la a Salomo me wẽnd doogã ne a meng yiri.

¹¹ A Iram, Tir naabã, sẽn da wa ne ra-sĩdma, n wa ne sãnem, wala a sẽn dat tɛka, kosa a Salomo t'a kõ-a tẽns pisi Galile tẽn-peelmẽ.

¹² A Iram yii Tir n wa n na n kaag tẽns niyns a Salomo sẽn kõ-a wã la b pa ta a yam ye.

¹³ A yeelame: «Yaa bõe tẽn yood la f sẽn kõ maama, m saam-biiga?» Yaa rẽ yĩng la, ba ne rũnna, b boonda tẽn kãense tɩ Kabul tẽnse, zĩ yood tẽnse.

¹⁴ A Iram kõo dĩma Salomo sãnem gil sẽn ta neb koabg la pisopoe la a nu zɩɩbo.

Tʋʋm-tʋmdbã

¹⁵ Ad-a Salomo sẽn maan bũmb ning n paam tʋʋm-tʋmdba n tõog n me wẽnd doogã, a meng yiri, Milo, Zerizalɛɛm lal-gũbrã, Asor, Megido, la Gezɛr.

¹⁶ Sã n ya Gezɛr, ad-y yaa Ezipt naab n waa n zab n deeg Gezɛr, n yõog a bugum, n kʋ Kanaã rãmba sẽn da be a pʋgẽ, n dɩka n kõ a bi-pugl a sẽn yiis kãadem ne a Salomo menga.

¹⁷ Yaa rẽ la a Salomo maneg n me Gezɛr la Bɛt-Orõ sẽn be bãoog noore.

¹⁸ N paas Baalat, la Tamar sẽn be Zɩɩda we-raoogẽ.

¹⁹ A Salomo le mee tẽns kẽere, teed bĩngr yĩnga, n paas tãb-biisi, bilim-bilm, la wed-dʋʋdba yĩnga. A saa n mee meeb a taab wala a sẽn dat Zerizalɛɛm, Libã la a sẽn da so tẽns niynsa pʋgẽ.

²⁰ Ad-y yaa neb sẽn pa kĩ ne a Israyɛl la sẽn da kell n pa ne bãmba, wa Amonitsã, Ititsã, Perizitsã, Ivitsã la Zebuze rãmba,

²¹ ad-y yaa bãmb yagense sẽn dog bãmb poorẽ t'a Israyɛl bas n pa kʋ wã, yaa bãmb la a Salomo wʋk n kẽes a tʋʋma. La ket n yaa boto ne rũnna.

²² A ka kẽes Israyɛl kamba tʋʋmd ye. Bãmb n da ya tãb-biisã, a sõgen-kamba, a kug-zĩidba, a wed-kɩɩm dãmba, a bilim-bilma la a wed-dʋʋdba nanamse.

²³ Sẽn da get-ba a Salomo tʋʋma da taa kobs-nu la pis-nu.

²⁴ Yaa Ezipt dĩma bi-puglã sẽn yi Siõ na-zakã n wa kẽ ro-paalã a Salomo sẽn me a yĩnga poore, la b yaool n pids bok ning sẽn da be wẽnd dooga la a Daviid zaka sʋka, Milo bokã.

²⁵ Yʋʋmd pʋgẽ yaa naoor a tã la a Salomo ra wat ne maand Soaala maan-kugra zugu, yaa yũ-nood maando la lagm-n-dɩ maando. B ra yõogda wisdu me maan-kugra zugu. Woto me la Soaala-Wẽnd daab ne b rooga pids yã.

A Salomo leebgo

²⁶ Dĩma a Salomo da tara koom-kogend Esiõ-Gebɛr, sẽn pẽ ne Eyilat, Rudum mogra noore, Edom tẽn-peelmẽ.

²⁷ A Iram sakame, n kõ a Salomo neb sẽn mi koom-kogend zãabo la sẽn mi mogra menga. B naaga a Salomo nebã.

²⁸ B kẽn n taa Ofir la b waa n kõ-la a Salomo sãnem gil bɛd kobs-naas la pisi.