1 Rĩm-dãmbã 8 - SEBR SÕNGO

Kuga walsa koglgo kẽeda wẽnd doogẽ

¹ A Salomo boola a sɛɛgẽ, Zerizalɛɛm, Israyɛl nin-kẽemsã, sagsa kãsem-dãmba, zagsa kãsem-dãmba tɩ b tɩ yiis kuga walsa koglg n wa ne-a Siõ, a Daviid na-tẽnga.

² Israyɛl nin-kẽemsa fãa tigma taab a Salomo zakẽ, Etanim kiuugu, kiuug a yopoe soaba, kibs raare.

³ La Israyɛl nin-kẽemsa sẽn ta, maan-kʋʋdba tʋka kuga walsa koglgã.

⁴ B tall-a lame n dʋʋs Siõ. Sɛka roogo, la te-sõma wã fãa sẽn da be a pʋgẽ wã me tall n waa Siõ. Tʋkdba yɩɩ maan-kʋʋdba ne b sõangdba.

⁵ Dĩm a Salomo ne Israyɛl neba sẽn da tigim ne yẽnda, zood kaseta taoore, da tara maanda kʋʋbo, rũm bɛd la rũm bõonese la b sõora ka tõog n sõd lɛlɛ.

⁶ Maan-kʋʋdba kẽesa koglga a zĩigẽ, sõmblem dooga pʋga, malɛgsa pɩgsa tẽngre.

⁷ Malɛgsa ra tẽega b pɩgsa zĩig ning a sẽn da tog n diglẽ; malɛgsa ra yɛdga b pɩgsa wa maasem tɩɩga, koglga ne a ra-tuiidsa zugu.

⁸ Raada ra wogmame. F sã n da be maanda kʋʋb roogẽ, f ra ne-b lame, f sã n yɛs zĩig ning sẽn be sõmblem dooga taoore. Ra ka tõe n zĩnd yɩng n yãend-b ye. B keta be ne rũnna.

⁹ Bũmb da ka be koglga pʋga sã n ka kuga wals a yiibã. Yaa a Moyiiz n da sagl-b be, Orɛb tãnga, Soaala-Wẽnd sẽn waa n yõg zood ne Israyɛl kamba, Ezipt yiiba wakato.

Wẽnd deegda b roogo

¹⁰ Maan-kʋʋdba sẽn yi wẽnd dooga pʋg n sɛ, la sawadg sẽn waa n deeg zĩig n yãmbe.

¹¹ Maan-kʋʋdba ka le tõog n maan bũmb sawadga yĩnga, tɩ Wẽnd zɩɩra ra pida wẽnd doogã.

¹² T'a Salomo na n yeele: «Naaba-Wẽnd yeelame tɩ b rat n paa likẽ!

¹³ Ne rẽ fãa, bãng-y tɩ yaa yãmb yĩng la m me ro-kãnga. Yaa na-yir la m me yã tɩ y zĩnd a pʋgẽ zamaan ne zamaana.»

¹⁴ A Salomo wẽnemdame n ning a Israyɛl zãma wã sẽn yɛs yĩngra barka.

¹⁵ A yeelame: «A Israyɛl Wẽnnaama paam barka! Bãmb n yaag b noore n togs m ba, a Daviid, la bãmb nug tʋmame n pids kãabg kãnga:

¹⁶ ‹M sẽn yiis m buud a Israyɛl Ezipt tẽng tɛka, m pa bao tẽng a Israyɛl tẽnsa sʋka n na n maan m na-tẽng ye, m pa yet tɩ b me roog n kõ-m tɩ m deegd y waoogr a pʋgẽ ye. A Daviid bal la m yãk t'a ges m buud a Israyɛl yelle.›

¹⁷ M ba a Daviid da tʋlga ne a sũur fãa n me roogo Wẽnd yĩnga, Israyɛl Wẽnda yĩnga.

¹⁸ La Soaala leok-a lame: ‹F sẽn tʋlg n na n me roog n kõ-ma, f maana neere.

¹⁹ La ade, ka foom n na n me rooga ye, yaa f meng biig n na n me roogã n kõ-ma.›

²⁰ Soaala pidsa b sẽn da kãabe. Woto m leda m ba, a Daviid, la m deega Israyɛl naam wala Soaala sẽn da kãabe la m mee roogo Wẽnd yĩnga, a Israyɛl Wẽnda waoogr yĩnga.

²¹ M yãka zĩig n bĩng kuga walsa koglgo; yẽ yaa zood kaseto, zood ning b sẽn yõg ne y yaab rãmba, b sẽn wa n yi Ezipt tẽnga, kaseto.»

A Salomo pʋʋsda Wẽnde

²² A Salomo yalsa Soaala maan-kugrã la zãma wã taoore, a zẽka a nus yĩngri,

²³ n yeele: «Soaala, Israyɛl Wẽnnaam, yãmb pa tar to yĩngr bɩ tẽng zug ka ye. Yãmb pa basd y zood t'a sãam ye, yãmb yam pa yit y yemse sẽn kẽnd tɩrg y taoor ye.

²⁴ Yãmb pidsa y sẽn da kãab m ba, y yamba a Daviid. Y sẽn yiis y noorẽ, y nug pãng taas-a-la rũnna, wa d fãa sẽn ne wã.

²⁵ La marsã, Soaala, Israyɛl Wẽnnaam, pids-y kãabg ning me y sẽn kãab m ba, a Daviid, tɩ yãmb n da yeel-a: ‹F kõn kong biig sẽn na n zĩnd m taoor a Israyɛl naama zaoor zugu, f kamba sã n gũusi n kẽn tɩrga m taoore wa fo meng sẽn kẽne.›

²⁶ Dɩlla, Soaala, Israyɛl Wẽnnaam, kɩt-y tɩ y sẽn yeel m ba, a Daviid, pids zãnga.

²⁷ La m kotame n sok n gese Wẽnd sã n sɩd tõee n zĩnda ninsaalb sʋk tẽng zug ka? Yĩngr saasa meng yaool n ka tõe n deeg yãmb ye, m kõn gom do-kãnga m sẽn me y yĩnga ye.

²⁸ Kelg-y y yamba pʋʋsg neere, Soaala-Wẽnde, tɩ rũnna y yamba wa-la y pʋʋsgo.

²⁹ Ypk-y y nin n ges ro-kãnga, wĩndg la yʋngo, n ges roog ning y sẽn yeele: ‹Ka n na n yɩ m pẽgr zĩiga!› Bɩ y kelg y yamba sẽn pʋʋsd yãmb a pʋgẽ.

A Salomo pʋʋsda Israyɛl yĩnga

³⁰ Kelg-y y yamba la y neba pʋʋsgo b sã n wa ka. Zĩnd-y y sẽn beẽ wã, zĩnd-y yĩngri n kelge la y maan sugri.

³¹ Ned sã n beeg a to tɩ bʋʋda rãmb yet tɩ b wa wẽnd dooga pʋga la b kãab taab beed maan-kugra taoore,

³² bɩ y zĩnd yĩngri n kelge. Kao-y y yemsa bʋʋdo, kɩt-y tɩ nin-wẽnga bãng t'a kongame n deeg a sɩbgre, tɩ nin-sõnga dɩ a pʋ-peelem yõodo.

³³ Y buud a Israyɛl sã n beeg yãmb n kong raood bɛɛba taoore, a sã n lɛɛg n wa n pẽg y yʋʋre, a sã n lɛɛg n wa yõk y sɛɛga wẽnd do-kãnga pʋga,

³⁴ zĩnd-y yĩngri n kelge, kõ-y buuda Israyɛl sugri n le tall-a n wa tẽng ning y sẽn kõ a yaab rãmba.

³⁵ Buuda sã n beeg yãmb tɩ saag pag n ka le niida, a sã n wa zĩ-kãnga n pʋʋs yã la a pẽg y yʋʋre, la a tuub a yel-wẽna, a sẽn deeg sɩbgre yĩnga,

³⁶ zĩnd y yĩngri n kelge, la y kõ y yambã la y buud a Israyɛl sugri, la y wilga so-sõng t'a rɩke, la y sik y saag tẽng ning y sẽn kõ y buuda tɩ yaa a pʋɩɩre.

³⁷ Kom la tẽn-kũum, wãoongo la gãnem sã n lʋɩ tẽnga, sʋʋr la kalwaare, sã n lʋɩ tẽngã, bɛɛb sã n wẽe a gũbri, bãag bɩ yell a to sã n pak-a,

³⁸ sẽn ya bũmb ning fãa yĩng la y buud a Israyɛl biig pʋʋsd la a yõkd y sɛɛga, a sã n wa bãng yell ning sẽn pak-a n tees do-kãnga n zẽk a nugu,

³⁹ bɩ yãmb zĩnd yĩngri, y sẽn be zĩig ningã, n kõ sugri, la y lebs ned kam fãa wala a manesem sẽn tog ne, tɩ yãmb mii sẽn be ninsaal sũurẽ.

⁴⁰ La woto, b na zoe y nifu, b vɩɩma fãa pʋgẽ, b ba rãmb tẽngẽ.

⁴¹ Ba sãan meng sẽn ka kĩ ne yãmb buuda Israyɛl, sã n yi tẽn-zãorgẽ n wa y waoogre,

⁴² tɩ sẽn ya zĩig ning fãa b na wʋm tɩ b gomd y yelle, n gomd y kanga la y nuga pãnga yelle, a sã n kẽ ro-kãnga n pʋʋse,

⁴³ zĩnd-y yĩngri, y sẽn be zĩig ningã, n deeg sãana kosgo la woto tẽng zug rãmba fãa na bãng y yʋʋre la wala y buud a Israyɛl, b na zoe rabeem la b na bãng tɩ yaa m sẽn me roog ninga pʋga la b waoogd y yʋʋre.

⁴⁴ Y kamba sã n dabd zabre, la b rɩka sor ning yãmb sẽn wilg-bã, b sã n wẽnemd b neng n tees yãmb b Soaala, n tees tẽng ning y sẽn yãkã la roog ning m sẽn me y yʋʋra kilsga yĩngã,

⁴⁵ zĩnd-y yĩngr n kelg b pʋʋsgo la y reeg b kosgo tɩ ned da maan-b pãng ye.

⁴⁶ B sã n beeg yãmba, tɩ ned ka be n ka beegdẽ ye, y sũur sã n wa kãbd ne-ba, tɩ y bas-ba b bɛɛba nusẽ tɩ b tall-ba n loog pa-weere, tẽn-zãorgẽ bɩ tẽng sẽn pẽ,

⁴⁷ b sã n zĩnd be n kẽ b sũurẽ n tuubi la b pʋʋs yãmba b bɛɛba tẽngẽ, n yetẽ: ‹Tõnd beegame, tõnd mana wẽnga, d maana kegre,›

⁴⁸ b sa n lɛɛg n wa kẽ yãmb ne b sũuri la b yam, b yembda tẽngẽ, b sã n wẽnemd b nense n tees tẽng ning y sẽn kãab b ba rãmba, n tees tẽng ning y sẽn yãke, n tees wẽnd doogã m sẽn me y waoogr yĩngã,

⁴⁹ zĩnd-y yĩngr, y sẽn be zĩig ningã n kelg b pʋʋsgo la b fĩinigu, tɩ ned da maan-b pãng ye.

⁵⁰ Kõ-y y kamba sugri, tɩ b beega yãmba, tɩ b zẽka b zug ne yãmba, kõ-y b bɛɛba sũ-maasem, tɩ b zoe b nimbãanega,

⁵¹ tɩ b yaa y buudu, la y pʋɩɩre, bãmb la yãmb sẽn yiis Ezipt, tẽng ninga tʋʋlem sẽn tõe n yẽneg kutu.

Pʋʋsga baasgo

⁵² Ypk-y y nini n ges y yamba ne y buud, a Israyɛl sẽn pʋʋsde, yoog-y y tʋba n kelg b sẽn na n bool-y wakat ning fãa.

⁵³ Yãmb n welg-b toore tɩ b yɩ y pʋɩɩre, buud a taab sʋka, wala y sẽn togs ne y yamba, a Moyiiz, noore, y sẽn waa n yiis d ba rãmba Ezipt tẽnga, Soaala-Wẽnde!»

⁵⁴ A Salomo sẽn gome la a taas Wẽnd a pʋʋsg n baase, a yika a sẽn da yĩg zĩig ningã, maan-kugra taoore, n tẽeg a nus yĩngri.

⁵⁵ A yalsa yĩngri, n ning a Israyɛl zãma wã barka ne koe-kãsenga:

⁵⁶ «Soaala-Wẽnd paam barka, bãmb sẽn kõ b buud, a Israyɛl, laafi tẽnga wala b sẽn da kãab-a. Gom noodã b sẽn yiis ne a Moyiiz noora, ba a ye ka pa n ka pids ye.

⁵⁷ D Soaala-Wẽnnaama paa ne-do, wala b sẽn pa ne d ba rãmba, la b ra bas-do, b da bas-d kɛɛng ye.

⁵⁸ B wẽnemd d sũya n tees b menga, tɩ d tũ b sorã la d deeg b noorã, b saglsã b sẽn zãms d ba rãmba.

⁵⁹ Wẽnd na kɩt tɩ koees niyns fãa m sẽn taas Soaala pa b pʋtẽerẽ wĩndg la yʋngo, tɩ b zã maam b yamba la b buud, a Israyɛl, wala b sẽn tog ne, beoog fãa ne a noore.

⁶⁰ Woto dũni wã fãa na bãng tɩ Soaala bal la Wẽnde la a to ka be ye,

⁶¹ la yãmb me na rɩk y sũur n kõ Wẽnnaam y Soaala la y reeg b noya la b sẽn yalse wala y sẽn maand rũnna.»

Wẽnd dooga kibsa

⁶² A Salomo ne a Israyɛl kʋʋ maand Soaala taoore.

⁶³ A Salomo kʋʋ laafi kosg maando. Yɩɩ rũm bɛd tus pisi la a yi, rũm bõones tus koabg la pisi. Yɩɩ woto la a Salomo ne a Israyɛl maan Soaala-Wẽnd yi-kẽer kibsa.

⁶⁴ Badaare dĩma welga toore wẽnd dooga taoor zakã la yaa zag kãng sʋk la a kʋ yũ-noog maoongo la a kõ kũuna la laafi kosg maanda nem-kaama tɩ zũud maan-kugra ra paooda ne a reeg yũ-noog maoongã la kũuna n paas laafi kosga maand nem-kaam.

⁶⁵ Yɩɩ kiuug a yopoe soaba la a Salomo naag ne a Israyɛl zãng n maan kibsã. Yɩɩ zãma kãseng sẽn yi al Lebo-Amat la al Ezipt kʋɩl-bɛɛga. Dasem a yopoe sẽn pid zãnga, b paa Soaala taoore.

⁶⁶ Daar a nii soaba a Salomo sẽega nebã. Bãmb me pʋʋsa dĩma, la ned kam fãa leba a yiri. Yɩɩ kaasgo tɛka la b sũur yɩɩ noogo ne Wẽnd sẽn maan ne b tʋʋm-tʋmd a Daviid la buud a Israyɛl.