1 Rĩm-dãmbã 6 - SEBR SÕNGO

Wẽnd dooga meebo

¹ Yʋʋm kobs-naase la pis-nii Ezipt yiib poore, a Salomo sẽn waa n dɩt a yʋʋmd a naas soab naam, Israyɛl tẽnga, kiuug a yiib soaba, Ziv kiuugu, Wẽnd dooga meeb sɩngame.

² Ad-y roog ning a Salomo sẽn me Soaala-Wẽnd yĩngã woglem da yaa kãntɩɩs pisoobe, a yalma pisi, a zãndlema pis-tã.

³ Zãong la a me taoore, zãonga woglem yaa wẽnd dooga yalem, la a menga yalem yaa kãntɩɩs piiga.

⁴ A ninga wẽnd dooga vẽ-yalemse, n maneg kud-bõonese n pɩk-pɩk wa gãmbre.

⁵ A mee n dɩdga wẽnd dooga lalse, n gilgi, a sɩngre n taa a sɛtmẽ, n ta sõmblem pid sõmblem doogã; a meeme n yegl yɛsa, dot sẽn dogl taaba a tãab-tãabo.

⁶ Tẽngr dotã yalem yaa kãntɩɩs a nu, rot niyns sẽn zao-b bãmba yalem yaa kãntɩɩs a yoobe, tɩ zugẽ dota ya kãntɩɩs a yopoe. Wẽnd dooga lalg sã n zẽkdẽ, a taglma ra woogdame. Rẽ me la rota sẽn doglem taaba yalem da ka a ye.

⁷ Wẽnd dooga mee ne kug sẽn zoe n pees b zĩigẽ, woto wã meeba wakato b pa tol n wʋm zãar bɩ lar, bɩ kut bʋʋr ye.

⁸ Sã n ya rot niyns sẽn me n yeglã, bãmb no-yɛnga ra bee wẽnd dooga yaang pẽkẽ. Dɩlla kẽeda pipi roogã tɩ yẽ pʋgẽ marsã la noor da bee n dʋʋd tẽnsʋk soabã, tɩ noor me le be be n dʋʋd a tãab soabã.

⁹ A Salomo mee wẽnd doogã n sɛ, a paga a yĩngra ne ra-gils sẽn dɩgl n yegl taaba.

¹⁰ Sã n ya rot niyns sẽn me n gilgã, roog fãa zãndlem da yaa kãntɩɩs a nu. Ra-sĩdma da roga lalsa zugu.

¹¹ Soaala-Wẽnd koɛɛg ta-la a Salomo, b yeelame:

¹² «Roog ning f sẽn metã, ad-f sã kẽn wa m noora sẽn date, f sã n deeg m sẽn wilgi, f sã n tũ m sẽn zãms-fo, m na pids m sẽn kãab-f bũmb ninga, la m sẽn kãab f ba, a Daviid.

¹³ M na waa n zĩnd m buud a Israyɛl sʋka, m kõn bas m buud a Israyɛl ye.»

¹⁴ A Salomo n sɩng wẽnd doogã la yẽ n baas-a.

Pʋgẽ teeda manegre

¹⁵ Pʋgẽ wã yaa ra-pegd sĩdma la b rɩk n ka n lud lalgã; sẽn sɩng tẽnga n tãag sugra ra-paadse, b kaa ra-pegdo. Rooga tẽngr gãnega tɩ-wogd ra-pegd sĩdma.

¹⁶ Rooga yaangã, kãntɩɩs pisi wã fãa kaa ne ra-sĩdma, sẽn sɩng tẽngr n ta yĩngri. Be la b pasg ro-sõng mengã.

¹⁷ Wẽnd dooga menga, ro-sõngã sẽn pasg a soab taoorã, ra yaa kãntɩɩs pis-naase.

¹⁸ Ra-sĩdma la b ra ning a pʋgẽ. Raada ra maneg n peesame n gʋl kitrizĩgninsi ne puud sẽn weke. Ra-pegd n da lud kuga fãa.

¹⁹ A Salomo manega Sõmblem pid sõmblem doogã, do-kãsenga pʋga n ning zood kaseta be.

²⁰ Sõmblem pid Sõmblem dooga woglem yaa kãntɩɩs pisi, a yalma me boto, a zãndlem me boto, a tablg-a-la ne sãnem. B da rɩgla a taoore maan-kugrã sẽn maneg n tablg ne ra-kegemse.

²¹ Dooga pʋg zãng fãa ra yaa sãnem sẽn yɩlge. Do-sõnga noorẽ, b ninga sãnem yãndo. Rooga pʋg fãa ra bolga sãnem; maan-kugr ninga sẽn da na n kẽes a pʋgẽ wã tablga ne sãnem.

²² Pʋs n yaa wẽnd dooga zãng zãnga la a pɛ ne sãnem. Maan-kugr ninga sẽn na n dɩgl kuga walsa sẽn be roog ninga noorã, yẽ me ra pɛɛ ne sãnem.

²³ Sõmblem dooga pʋga a ninga malɛgse, sẽn pees ne oliv raado. B zãndlema yaa kãntɩɩs piiga.

²⁴ Pɩgsr a ye woglem yaa kãntɩɩs a nu, pɩgsr a to wã me boto, tɩ naag taaba n ya kãntɩɩs piiga.

²⁵ Malɛk a yiib soaba me pɩgsa yaa kãntɩɩs piiga. B yiiba fãa ra wẽnda taaba la b bedrema me taa taaba.

²⁶ Malɛk fãa zãndlem yaa kãntɩɩs piiga.

²⁷ Malɛgs a yiiba da rɩgla Sõmblem dooga tẽnsʋka. B ra yɛdga b pɩgsã. Malɛk a ye pɩgsa ra sɩɩsda kɩreng a ye lalgã t'a to wã rẽnd sɩɩsd lalg a to wã. B pɩgs a taaba ra tẽegame n sɩɩsd taab sʋka.

²⁸ B manega malɛgsã n bolg ne sãnem.

²⁹ Rooga lals fãa, pʋgẽ la yɩnga, gʋla malɛgs nense n gilg, n paas komse la tɩɩs vãado la puud sẽn weke.

³⁰ Wẽnd dooga tẽngr gãnega ne ra-pegdo la fãa bolga ne sãnem, pʋgẽ doogã wala yɩng soabã.

Dignoya

³¹ Sõmblem dooga kʋɩlengã maana ne oliviye raoogo. Kʋɩlenga boka a sʋka, n pakd goabg la rɩtgo. Ra-luga la yĩngr rigno-koaka ra ninga maaba a nu.

³² Kʋɩlensa sẽn lakd goabg la rɩtgã la sẽn pees ne oliviye raoogã, ra gʋla malɛgs nense, tɩɩs vãado la puud sẽn weke la b bolg-b la ne sãnem; b bolga malɛgsa la tɩɩsa vãada me ne sãnem.

³³ Yaa boto me la b maan ne maan-kugra rooga kʋɩlense. Kʋɩlensa ra-luga la yĩngr rigno-koaka ra yaa oliviye raoogo la b ra ninga maaba a naase.

³⁴ Kʋɩlens kãens raada ra ka pees ne oliviye raad ye, yaa tɩɩg a to. B ra zao sãnga a yiib sẽn maneg n dõog zutu, n pakd goabg la rɩtgo.

³⁵ B gʋla bãmb me zugu malɛgs nense, tɩɩs vãado, la puud sẽn weke, la sẽn bolg ne sãnem.

³⁶ Pʋgẽ zaka lals mee ne kug sẽn dogl taab naoor a tã n baas ne ra-pegd tagdo.

³⁷ Yaa a naama yʋʋmd a naas soaba, Ziv kiuugu, la a Salomo sɩng wẽnd doogã.

³⁸ Yaa a naama yʋʋmd piig la a ye soaba, Bul kiuugu, kiuug a nii soaba la a Salomo baas wẽnd doogã, wala a sẽn da tog n yɩ la b sẽn da rat t'a yɩ a soaba. Yaa yʋʋm a yopoe la a Salomo me roogã.