1 Rĩm-dãmbã 5 - SEBR SÕNGO

¹ Sɩda, yaa dĩm dãmb wʋsg zugu la a Salomo da rɩt naam. A soolma yɛdga al Efrat kʋɩl kãsengã, n wat Filisti rãmb tẽnga, n tat Ezipt toaaga. Dĩm bãmb fãa da reegda a noore la b ra kɩta yõor yaoodo, n tãag a Salomo kaalem.

² Daar fãa ad-a Salomo sẽn da reegd a meng yĩng la sẽn vɩ-b ne yẽnda wã yĩnga: alkam pɛɛlg zom yaa bõeens pis-tã sẽn tõe n zɩlge. Alkam kɛgenga yaa bõeens pisoob sẽn tõe n zɩlge.

³ N paas nag-wubds piiga, bãgr niis pisi, piis koabga, n le paas yãgse, walse, yĩsa, lad dãmb buudu sẽn tar kaam wʋsgo.

⁴ A Salomo rĩunga ra yãagame n ta tẽns niyns sẽn be Efrat noorẽ, sẽn sɩng Tifsa n ta Gaza. Laafi da bee yẽ ne a yags sʋka.

⁵ Zɩɩda ne Israyɛl neba vɩɩnda ne laafi, b bugsuntund la b kankams tẽngre, al Dã n ta Beerseba, a Salomo vɩɩma fãa pʋgẽ.

⁶ A Salomo ra tara wiidi tus piig la a yiibu. Rota sẽn da me wiidi wã yĩnga da tõe n deega bãmb tus pis-naase; yaa wiidi sẽn tõe n vu bilim-bilm.

⁷ Kombɛɛmba ra wat n kõta a Salomo, ned kam fãa ne a kiuugu, a meng la a zaka rãmb rɩɩbo. A ra ka basd tɩ bũmb paoog ned ba a ye.

⁸ Sã n ya alkam kɛgenga la yamdã, rũmsa yĩnga, b ra tar-b lame n wat a Salomo sẽn be zĩig ninga, la wala a sẽn kõ noor ninga.

A Salomo yʋʋr yiime

⁹ Soaala kõ-la a Salomo bãngr la sɩlem yam. A Salomo yama sẽn da vɛɛsd n na n bãng bũmb niynsa sõor zema bĩisri sẽn sam mogr noore.

¹⁰ A Salomo bãngr yɩɩga Yaang rãmba fãa rẽnna, a yɩɩga Ezipt rãmb fãa rẽnna.

¹¹ Ned ba a ye ka paam yamzulung wala a Salomo rẽnna ye. A yamvẽenem yɩɩga Ezrayitga a Etã rẽnna, n yɩɩg a Ema, a Kalkol la a Darda, a Maol kamba. A yʋʋra taa tẽnsa fãa sẽn gũbgã.

¹² A yiisa yelbũn tus a tã, la a yɩɩla yɩɩ tusri.

¹³ A goma tɩɩs yelle; a goma tɩ-bɛd sẽn be Libã yelle, wala a sẽn gom tɩ-bõones sẽn lolemd lalse yelle. A goma rũms yelle, luiili yelle, wiis la kʋɩl-zẽed yelle.

¹⁴ Neba yii zĩig zãnga. B dĩm dãmb n tʋm-b tɩ b wa kelg la b rɩ a Salomo bãngra kaseto, tɩ b ra wʋmame tɩ b kilsd-a zĩig zãnga.

Wẽnd dooga meeb seglgo

¹⁵ Tir dĩma, a Iram tʋma a sõgen-kamb a Salomo nengẽ a sẽn wʋm t'a lebga dĩma, a ba zĩigẽ. A Iram ne a Daviid da pĩnd n yaa zoodo.

¹⁶ A Salomo taasa a Iram koe-kãnga:

¹⁷ «Y paam n bãnga neere tɩ m ba, a Daviid, ka tõog n me roogo Soaala-Wẽnd waoogr yĩng ye. A zaba ne a bɛɛba, goabg la rɩtgo, n tãag Wẽnd sẽn na n kɩt t'a maan raood n tõog a bɛɛbã.

¹⁸ Marsã, Soaala-Wẽnd kõ-m-la laafi, goabg la rɩtgo, tɩ zabr bɩ zabr bʋʋr ka le be maam ne m yak ba a ye sʋk ye.

¹⁹ Woto wã m tagsa m na me roogo Soaala-Wẽnd waoogr yĩnga, wala b meng sẽn wilg m ba, a Daviid, n yeel-a: ‹Yaa fo biiga la m na zaoolg f zaoora zugu la yẽ n na n me roog m waoogr yĩnga.›

²⁰ Dẽ yĩnga, kɩt tɩ b kɛ Libã ra-sĩdma. M neba na n naaga fo neba. M na yao f neba sẽn tʋmd m yĩnga wala d sẽn na n sed ne taabã. Tõnd ka tar neb sẽn mi raad kɛɛbo wala Sidõ rãmb ye!»

²¹ A Salomo koɛɛga sẽn ta a Iram, a sũur yɩɩ noog wʋsgo, t'a yeele: «Naaba-Wẽnd paam pẽgr dũnna b sẽn kõ a Daviid bi-sõngo t'a soog a bu-yalengã.»

²² A Iram gʋlsa woto: «M wʋma y sẽn yeelã. M na pids y raabo ne ra-sĩdma, wala y sẽn date.

²³ M neba na n tall-b lame n sig mogrã, n yi be n wa ne b zĩig ning y sẽn na n wilgi. M na lood-b be n kõ yã. Mam sẽn dat wa m dolbo, yaa y sõng-m ne koodo, m zak yĩnga.»

²⁴ Woto a Iram kõ-la a Salomo ra-sĩdma wala a sẽn dat tɛka.

²⁵ A Salomo toola a Iram alkam; yaa bõeens tus pisi n zɩlg alkama n kẽng, yẽ ne a neba yĩnga, n paas oliv ka-yɩlgemde bõeens pisi sẽn tõe n zɩ. A Salomo ra kɩt-b la boto yʋʋmd-yʋʋmd fãa.

²⁶ Wẽnd kõ-la a Salomo yamvẽenem wala b sẽn da kãab-a. A Salomo ne a Iram kell n wʋma taab moore, n yẽs n zems taaba.

²⁷ A Salomo rɩka tʋʋm-tʋmdba. Israyɛl tõre, yaa neb tus pis-tã la a modg n kẽes-b tʋʋmna.

²⁸ A tʋm-b-la Libã. Kiuug fãa yaa neb tus piiga. B maanda kiuug a ye Libã, n maan kiis a yiib b tẽngẽ. A Adoniram n da ya tʋʋma taoor soaba.

²⁹ A Salomo da tara kug-zɩtb tus-pisopoe la kug-peesdb tus pis-nii, tãnga zugu.

³⁰ Tog n naagame n sõd kãsem-pʋgdsã, kombɛɛmba sẽn lʋɩɩs neba taoore b sõngr yĩnga, bãmb tus a tã la kobs-tã.

³¹ Dĩma yeelame tɩ b vigs kug-bɛda, kug-neeba, sẽn na n tʋɩɩs Wẽnd doogã. Yaa kug sẽn peese.

³² A Salomo ne a Iram tʋʋm-tʋmdba la Gebal dãmba peesa kugã la b kɛ raadã n tall-ba n wa wẽnd doog meeb zĩigẽ.