1 Rĩm-dãmbã 4 - SEBR SÕNGO

Naama siglgu

¹ A Salomo dɩɩ naam Israyɛl tõre, Israyɛl ne Zɩɩda.

² Ad-a rĩunga taoor dãmba, a kug-zĩidba: A Azariyas, maan-kʋʋda la a Sadok biiga;

³ a Elirɛf la a Ayiya, sɛb-gʋlsdba a Sisa kamba a Zozafat, koe-moanda la a Ayilud biiga;

⁴ a Benaya, tãnsoaba, a Zoyada biiga; a Sadok ne a Abiyatar, maan-kʋʋdba;

⁵ a Aziya, kombɛɛmba taoor soaba la a Natã biiga; a Zabud, maan-kʋʋd la dĩma sagenda, a Natã biiga;

⁶ a Ayisar, sɩmand naaba; a Adoniram, zaka tʋʋm pʋɩta, a Abda biiga.

⁷ Kombɛɛmb piig la a yi la a Salomo zĩndig Israyɛl tõre. Bãmb da wata ne dĩma la a zaka rãmb sẽn da tar bũmb ninga tʋʋmde. B ra geta rĩma yell yʋʋmda pʋgẽ, ned kam fãa ne a kiuugu.

⁸ Ad-b yʋya: A Ur biiga, Efrayim tãmsa zut rãmb yĩnga;

⁹ a Dekɛr biiga, Makas, Saalbim, Bɛt-Semɛs la Elõ-Bɛt-Ana rãmb yĩnga;

¹⁰ a Arubot, a Esɛd biiga, Soko la Efɛr dãmb yĩnga,

¹¹ a Abinadab biiga, Dor tãmsa rãmb fãa yĩnga; yẽ ra yii kãadem ne a Tafat, a Salomo bi-pugla;

¹² a Baana, a Ayilud biiga, Taanak, Megido la Bɛt-Seã rãmb yĩnga. Bɛt Seã tɩ yega Sartã, Zizreyɛl tẽngre, al Abɛl-Meola n ta Yokneam.

¹³ Galaad Ramot tẽng rao a Gebɛr biiga, a Manase biiga a Yayir pʋ-weesẽ dãmb yĩnga, Galaad tẽn-peelmẽ, n paas Argob rãmb yĩnga, Bazã tãmsa zutu; tẽn-bɛd pisoobe sẽn me lals n gũbg la sẽn tar kʋɩlens sẽn sogd ne zũud la bãeense.

¹⁴ A Ayinadab, a Ido biiga, Maanayim rãmb yĩnga;

¹⁵ A Ayimaas, Neftali rãmb yĩnga (yẽ me yii kãadem ne a Salomo bi-pugla, a Basmat).

¹⁶ A Baana, a Usayi biiga, Asɛr la Bealot rãmb yĩnga;

¹⁷ a Zozafat, a Paruwa biiga, Isakar dãmb yĩnga;

¹⁸ a Simeyi, a Ela biiga, a Bẽnzame rãmb yĩnga;

¹⁹ a Gebɛr, a Uri biiga, Galaad rãmb yĩnga, Amoritsa dĩm a Siõ soolma yĩnga, la Bazã dĩm a Og soolma yĩnga. Ned a to n le wa paas bãmb piig la a yiibã, Zɩɩda tẽn-peelma yĩnga.

²⁰ A Zɩɩda ne a Israyɛl neba da yaa ka tɛka wala mogr noorẽ bĩisri. B ra ka kongd sẽn na yũ la sẽn na n dɩ ye. Woto me b vɩɩma ra sakd-b lame.