1 Rĩm-dãmbã 3 - SEBR SÕNGO

A Salomo naam

¹ A Salomo waa n lebga Ezipt naab rɛɛmba. A kẽe kãadem ne Ezipt dĩma bi-pugla, n tall-a n wa a Daviid na-tẽngẽ, n gũud a sẽn na n wa me na-yirã, n gũud wẽnd doogã la Zerizalɛɛm lal-gũbrã sã n me n baase.

² Maanda ra ket n kʋʋda yaare, tɩ b ra nan ka me roog Soaala-Wẽnd yĩng ye.

³ A Salomo yam kẽe Naaba-Wẽnde. La woto a vɩɩnda wala a ba, a Daviid. Sã n ya ne maandã la wisdã, rẽ fãa ra ket n maanda kunkuba la tãmsa zutu la tɩɩsa sẽn gũmẽ.

A Salomo sẽn zãmse

⁴ Dĩma kẽnga Gabaõ n na n tɩ kʋ maando tɩ be la tãmsa ra lug n yɩɩda. A Salomo sẽn kʋ maand be taa tusri.

⁵ Gabaõ tẽnga, Soaala-Wẽnd lika a Salomo yʋngo, a zãmsdẽ, n yeel-a: «Wilg-ma! Bõe la m tõe n kõ-fo?»

⁶ T'a Salomo leoke: «Yãmb maana neer wʋsgo ne m ba, a Daviid. Yẽ me modgame n kẽn yãmb taoore, ne pʋ-peelem, ne zemsgo, ne sũ-tɩrga. Yãmb nonglem ka zãag ne-a ye, la y sõngame t'a biig a ye dʋ a naam zaoore.

⁷ N-ye! Soaala-Wẽnde, yãmb n kɩt tɩ m lebg dĩma n led m ba. La ade, mam ket n yaa yãaga, n ka mi naam dɩɩb ye.

⁸ Yãmb yamba bee y buuda sʋka, la yaa buud sẽn labsa, al tɩ b pa tõe n sõd n bãng a sõor ye.

⁹ Y tog n kõ-la y yamba yamvẽenem la sũ-tɩrga t'a bãng neer la wẽnga, n bake, tɩ buuda tõog n zã, tɩ buuda yaa bu-yalengo t'a zãab ya toogo.»

¹⁰ A Salomo pʋʋsg kãnga taa Soaala-Wẽnd yam.

¹¹ Woto b yeel-a lame: «Fo sẽn kos woto wã, n ka kos yõ-woko, n ka kos arzɛka, n ka kos bɛɛba wãabo, f sẽn kos yamvẽenem la yẽesem,

¹² m kõt-f-la f sẽn kose: yamvẽenem, la yẽesem, wa ned ba a ye sẽn zɩ n paam, sẽn deng b fooma bɩ sẽn na n yaool n wa-b fo poorẽ.

¹³ La f sẽn pa kos bũmb ninga, m kõt-f la rẽ fãa: arzɛka la ziiri, f vɩɩma tõre, la dĩm ba a ye sẽn na n wẽneg foo kõn zĩnd ye.

¹⁴ La f sã n dɩk sor ning m sẽn wilg-fã, n deeg m noore la m sẽn yalsa fãa wala f ba a Daviid, m na kõ-f yõ-woko.»

¹⁵ A Salomo nekame la a tẽega a sẽn zãmse. A leba Zerizalɛɛm, a tɩ yalsa zooda kaset taoore, a kʋʋ yũ-noog maando la laafi kosg maand, la a boola a poorẽ dãmba fãa tɩ b wa rɩ kibsa.

A Salomo bʋʋdo

¹⁶ Pʋg-yoaadb a yi n waa n tɩ yãend dĩma.

¹⁷ Paga a ye yeelame: «Ade, m zu-soaba, maam ne pʋg kãnga da bee roog a ye; m doga m biiga, rẽ t'a bee ne maam.

¹⁸ La mam sẽn doge tɩ maan da-yɩten-daare, yẽ me rogame. D da bee ne taaba, ned da ka paas tõnd ye, tõnd d yiib bala n da be roogẽ wã.

¹⁹ Yʋng a ye, pʋg kãnga biiga kiime, a gãandame n bʋʋg-a.

²⁰ A yika ne yʋngã n dɩk m biiga m sɛɛgẽ, dẽ tɩ m ra gõe. Mam biiga la a rɩk n ning a yãoogẽ n yaool n lebs maam a bi-kɩɩngã.

²¹ M sẽn yik tɩ m na n yẽsem m biiga, m mikame t'a kiime. Beoog sẽn vẽeg tɩ m maneg n gese, m yãeeme tɩ ka biig ning m sẽn doga ye.»

²² Dẽ la pag a to wã yeel yã: «Pa sɩd ye! Bi-vɩɩga la mam biiga, bi-kɩɩnga la fo rẽnna.» Tɩ pag a to wã leoke: «Ka sɩd koe! Bi-kɩɩnga la fo biiga, bi-vɩɩga la mam biiga!» La b kaooga zabr ne taab dĩma taoore.

²³ Dĩma yeelame: «Yãoo yetame: ‹Mam biiga n vɩ wã, fo biigã n ki.› Tɩ yãoo yetẽ: ‹Pa sɩd ye, fo biig la bi-kɩɩngã, mam biig la vɩɩgã!› »

²⁴ Dĩma yeelame: «Wa-y ne sʋʋga!» La b talla sʋʋg n wa dĩma taoore,

²⁵ t'a paase: «Pasg-y bi-vɩɩgã n dɩk bogra a ye n kõ pag a ye, n dɩk bogr a to n kõ pag a to wã me.»

²⁶ Pag a ye la bi-vɩɩga weoog yõk yã t'a yeel dĩma: «Wẽnd na kõ y yõore, la y ra kʋ biiga ye, dɩk-y biigã n kɩs pag a to wã.» Pag a to wã yẽ da gomda woto: «B paasge, woto mam kõn soog-a, la fo me kõn soog-a ye.»

²⁷ Dĩma yeelame: «Da kʋ-y biiga ye, kɩs-y biigã pipi pagã, yaa yẽ la biiga ma.»

²⁸ A Israyɛl tõr wʋma dĩma sẽn kao bʋʋda to-to la b waooga dĩma. B yãeeme tɩ yaa yĩngr yam la a paam yã n kaood bʋʋdo.