1 Rĩm-dãmbã 22 - SEBR SÕNGO

A Akab zabr Ramot tẽnga

¹ Pemsem paama yʋʋm a tã, zabr pa zĩnd Aram la a Israyɛl sʋk ye.

² Yʋʋm a tã wã, a Zozafat, Zɩɩda dĩma, wa n gesa Israyɛl dĩma.

³ Israyɛl dĩma da yeela a poorẽ dãmba: «Yãmb miime tɩ Galaad-Ramot yaa tõnd soolem: La tõnd yaool n ka maan fɩ n le reeg-a Aram dĩma nugẽ ye.»

⁴ La a soka a Zozafat: «Yãmb na n yãaga maam tɩ d kẽng n tɩ kaoog zabre Galaad-Ramot bɩ?» Tɩ Zɩɩda dĩma leok Israyɛl dĩma: «Tõnd na n yɩɩ bũmb a ye bala, maam ne foo, mam soolma rãmba na n yɩɩ fo soolem, mam wiidi wã na n yɩɩ fo rẽnna.»

⁵ La a Zozafat yeela Israyɛl dĩma: «Mam kotame tɩ y sok Soaala-Wẽnd n paam b koɛɛga.»

⁶ Tɩ Israyɛl dĩma tigim a bãngdba na ta kobs-naase, n sok-ba: «M kẽng n tɩ kaoog zabre ne Galaad-Ramot bɩ m base?» Tɩ b leoke: «Kẽng-y tɩ Soaala na ning tẽngã dĩma nugẽ.»

⁷ A Zozafat yeelame: «Wẽnd bãngd ka ket ka tɩ d yõk a sɛɛg n paam Soaala-Wẽnd koɛɛg laa?»

⁸ La Israyɛl dĩma leoka a Zozafat: «Ned a ye n kete tɩ d tõe n kudg-a kãntɩɩs n sok Soaala-Wẽnde, la mam kɩs-a lame, t'a zɩ n togs koɛɛg sẽn ya noog m yĩng ye, dẽnd beed bala; yaa a Yimla biiga, a Mise.» A Zozafat yeelame: «Y kabre, dĩma, da gom-y woto ye!»

⁹ Tɩ Israyɛl dĩma na n bool a sõgne n yeel-a: «Kẽng tao-tao n tɩ wa ne a Yimla biiga, a Mise!»

¹⁰ Israyɛl dĩma, a Akab la Zɩɩda dĩma, a Zozafat, da maneg yeelga fan-teedo, tɩ ned kam fãa zao a naam zaoore, vɩʋʋg ninga sẽn da be na-yira sɛɛga, n tees Samari rãmba sẽn tũud noor ning n kẽedẽ wã. B ra zĩndga bãngdba fãa b taoore tɩ ned kam fãa zɛɛgd ne a bãngr wilgri.

¹¹ A Kenaana biiga, a Sedekiyas, kuda kut yɩɩla, n yik n yeele: «Wẽnd koɛɛg la woto: Ne yɩɩl bãmbã, fo na n tãa Aramsã n kʋ-b zãnga!»

¹² Bãngdba fãa da gomdame n lebd zĩ-yɛnga n yetẽ: «Aya! Yik-y, kẽng-y Galaad-Ramot, tɩ y na maan raoodo, Wẽnd na rɩk-a n sagl dĩma nugẽ.»

¹³ B sẽn da tʋm dao ninga t'a tɩ bool a Mise wã da gomda ne-a n yetẽ: «Gese, bãndgba fãa goama yaa a yembre, bãmb fãa yaa zelemd a ye n kãabd dĩma noogo. Bɩ fo me toagsga wẽneg bãmb rẽnna. Yiis koɛɛg sẽn ya noogo!»

¹⁴ T'a Mise na n leok-a: «M wẽen ne Wẽnde, tɩ b sẽn yeel bũmb ning bal la m na n togse!»

¹⁵ A sẽn ta dĩma nengẽ, dĩma sok-a lame: «Mise, d tõe n kẽng n tɩ kaooga zabre Galaad-Ramot bɩ d ka tõe?» T'a leoke: «N-yẽe! Kẽng-y tɩ y na tɩ tõoge, Soaala na n sagla tẽnga dĩma nugẽ.»

¹⁶ La dĩma yeelame: «Mise m na n kudg-f la kãntɩɩga naoor a wãna, tɩ f togs-m sɩd bala, Soaala-Wẽnd yĩnga?»

¹⁷ T'a Mise na n yeele: «Mam yãee a Israyɛl kamba sẽn sẽeg tãng zugu, wa piis sẽn pa le tar pe-kɩɩma; tɩ Soaala yeel maam: ‹Nin-bãmba ka le tar Soaal ye; bɩ ned kam fãa leb a tẽngẽ ne laafi!› »

¹⁸ Israyɛl dĩma yeela Zɩɩda dĩma: «Mam da pa pĩnd n yeel yãmb tɩ nin-kãnga zɩ n togs koɛɛg sẽn noome, dẽnd beed bala!»

¹⁹ La a Mise le paasame: «Bɩ f kelg Wẽnd gomde. Mam yãee Soaala-Wẽnd tɩ b zao b zaoorẽ, tɩ b na-yir dãmba fãa da yɛs bãmb sɛɛgẽ, rɩtgo la goabga.

²⁰ La Naaba-Wẽnd sokame: ‹Ãnd n na n belg a Akab t'a kẽng Galaad-Ramot n tɩ ki?› La yõa soab yeela woto, tɩ yõa soab me yeel woto.

²¹ Wakat kãng marsã, la Wẽnd sõsd-n-taag a ye wa n yals b taoore n yeele: ‹Maam n na n belg-a.› Tɩ Wẽnd sok-a: ‹Fo na n maana a wãna?›

²² T'a leoke: ‹Mam na n kẽngame n tɩ pʋdg-a bãngdba fãa sẽn be-b ka wã zirẽ-beeda yama.› Tɩ Wẽnd leoke: ‹Kẽng n tɩ belg-a, tɩ m kõt-f la rẽ tõogo. Kẽng n tɩ belg-a.›

²³ Ade, bãng tɩ bãngdba fãa gill noor sã n togsd zirẽ, yaa Wẽnd meng sẽn pa gom noog f yĩnga la b pa rat n togs fo.»

²⁴ A Sedekiyas, a Kenaana biiga, kolgame, n wẽ a Mise pɛka n yetẽ: «Wẽnd tũu yɛɛnẽ n yi n bas maam, n gom ne foom?»

²⁵ T'a Mise leok-a: «Fo na bãng rẽndã, daar ninga f sẽn wat n zoet n kẽed f rotẽ n na n soonde.»

²⁶ Israyɛl dĩma yeelame: «Bɩ b yõk a Mise n tɩ kɩs a Amon, tẽnga naaba, la na-biiga, a Zoas,

²⁷ la yeel-ba: Dĩma noor la woto: sui-y nin kãnga bi-bees roogo, n kõt-a buri la ko-zaalga n zems bala, n gũud m sẽn na n lebg ne laafi.»

²⁸ T'a Mise leok-a: «Fo sã n lebg ne laafi, bɩ f bãng tɩ ka Wẽnd n gomd ne mam noor ye.»

A Akab kũum

²⁹ Israyɛl dĩma ne a Zozafat, Zɩɩda dĩma kẽnga zabre Galaad-Ramot.

³⁰ Israyɛl dĩma yeela a Zozafat: «Mam na n teema m fut n kẽng zabre, la yãmba, bɩ y yeelg y naama fuug.» La Israyɛl dĩma teema a fut, n kẽng zabre.

³¹ Mik Siri dĩma dag n kõ-la a bilim-bilma nanams pis-tã la a tã wã noore, a ra yeel-b lame: «Da kaoog-y zabre ne nin naaba bɩ ne talg ye, maan-y zabre ne Israyɛl dĩma bala.»

³² Bilim-bilma nanams sẽn yãe a Zozafat bala, b yeelame: «Sãmbg ka ye, a Israyɛl dĩma la yõa.» La b kolgame tɩ b na n kʋ-a. T'a Zozafat tãs a zabr tãsga.

³³ Nanamsã sẽn bãng tɩ ka Israyɛl dĩma, b loogame n bas-a.

³⁴ La dao a yembre yãaga a tãpo n tão yaar bala, tɩ yõk a Akab, Israyɛl dĩma, kuta fuug sogb zĩiga; t'a yeel a wed-kɩɩma: «Wẽnemd ka tɩ m yi zabra sʋka, tɩ m paama sãmpogre.»

³⁵ Zabra wɩnga badaare, tɩ b kong n bas Israyɛl dĩma a bilim-bilma pʋga, n tees Aram; a kii zaabre, a zɩɩma da raaga bilim-bilma pʋga.

³⁶ Wĩndg sẽn kẽ, b kelma zĩis fãa: «Ned kam fãa leb a tẽngẽ. Ned kam fãa leb a ba yiri,

³⁷ tɩ dĩma maana kaalem!» Dĩma kũuma poore, b tall-a lame n wa Samari la be la b mum-a.

³⁸ B peka bilim-bilma Samari bãka pʋga. Baas lega a Akab zɩɩma. A zɩɩma kalma ne pʋg-yoadba sẽn wa n so koom beelẽ wã rẽgdo, la Wẽnd da pĩnd n togsa rẽnna.

³⁹ A Akab tʋʋm a taabã, a sẽn maan fãa, wob-yẽna roogã, ne tẽnsã a sẽn me wã, dẽ fãa pa gʋls a Israyɛl dĩm dãmba kibar sebrẽ bɩ?

⁴⁰ A Akab tɩ saka a saam-dãmba, t'a biiga, a Akaziyas led a zaoorẽ.

A Zozafat

⁴¹ A Zozafat, a Asa biiga deega a Zɩɩda naam, a Akab, a Israyɛl dĩma naam yʋʋmd a naas soaba.

⁴² A Zozafat sẽn wa n dɩt naam, t'a tara yʋʋm pis-tã la a nu. A rɩɩ yʋʋm pisi la a nu Zerizalɛɛm. A ma yʋʋr da boondame t'a Azuba, a Sili biiga.

⁴³ A kell n dɩka a ba, a Asa, sẽn tũ sor ningã, la a pa tol n bʋdg moog ye, la a maana sẽn ya tɩrga Wẽnd nifẽ.

⁴⁴ La baasgo, pʋʋsga roto sẽn da be tãmsa zutã pa menem ye, neba da ket n kẽnd n kʋʋda maand be la b wisd tɩdare.

⁴⁵ A Zozafat yẽsa ne Israyɛl dĩma tɩ laafi zĩnd b sʋka.

⁴⁶ A Zozafat tʋʋm a taaba, a raoodã a sẽn maan zabrẽ, dẽ fãa pa gʋls Zɩɩda dĩm dãmb kibar sebrẽ bɩ?

⁴⁷ Yoaadba sẽn da ket-b tẽngã, al a ba, a Asa, zamaanẽ, a pɩɩg-b la zãng fãa n yiis a soolem pʋgẽ.

⁴⁸ Wakat kãng tɩ dĩm da ka le be Edom tẽng ye.

⁴⁹ A Zozafat kɩtame tɩ b maan Tarsis koom-kogend n na n kẽng Ofir n tɩ wa ne sãnem; la b pa tõog n kẽng ye, tɩ koglga wesga Esiõ-Gebɛr.

⁵⁰ A Akaziyas, a Akab biigã, yeel a Zozafat: «Bɩ mam tʋʋm-tʋmdba lagem ne yãmb tʋʋm-tʋmdba n dugs koom-kogendã.»

⁵¹ La a Zozafat pa sak ye. A Zozafat tɩ saka a saam-dãmba, tɩ b mum-a a saamba, a Daviid, na-tẽngẽ, t'a biiga a Zoram led a zaoorẽ.

A Akaziyas naam Israyɛl

⁵² A Akaziyas, a Akab biigã, rɩ Israyɛl naam Samari, a Zozafat, a Zɩɩda dĩma naam yʋʋmd piig la a yopoe soaba; a rɩɩ Israyɛl naam yʋʋm a yi.

⁵³ A maana sẽn ya wẽnga Wẽnd nifẽ; a tũ-la a ba la a ma sore, la a Zeroboam, a Nebat biiga, sore, sẽn lub a Israyɛl yel-wẽnd pʋgẽ.

⁵⁴ A waooga a Baal la a wõgemda a taoore, a puuga Soaala, Israyɛl Wẽnnaama sũuri wala a ba sẽn maane.