1 Rĩm-dãmbã 21 - SEBR SÕNGO

A Nabot pʋʋgo

¹ Ad bũmb ning sẽn zĩndi, rẽ loogr poore. Zizreyɛl dao a Nabot n da tar a bugsuntun-sõng pʋʋgo. Pʋʋga ra bee Zizreyɛl, Samari dĩma Akab na-yira sɛɛga.

² A Akab yẽsa ne a Nabot n yetẽ: «Kõ maam f bugsuntunga pʋʋgo, tɩ m maan zẽedo, n sel tɩ-rɩtse t'a pẽe ne mam zaka, la m na kõ foom zĩig a to sẽn yaa sõmbo n yɩɩda, n lebs f pʋʋgã, bɩ f sã n dat me m na kõ-f ligdi.»

³ A Nabot leoka a Akab: «Soaala gũ ma tɩ da beeg-ba n dɩk m buuda pʋɩɩre n kõ yãmb ye.»

⁴ La a Akab leba a yiri ne nen-gãnenga la sũ-beedo. Zizreyɛl dao a Nabot sẽn leok-a woto wã yĩnga: M kõ dɩk m buuda pʋɩɩr n kõ yãmb ye. La a gãanda a gãagẽ n wẽnemd a neng, n tees a roog lalga la a zãgs dɩɩb buud fãa.

⁵ A paga, a Zezabɛl, bʋʋg-a lame, n soke: «Yaa bõe sũ-sãang n tar yãmba tɩ y zãgsd rɩɩbo?»

⁶ T'a yeele: «Yaa m sẽn kos Zizreyɛl dao, a Nabot t'a kõ maam a bugsuntungã la a reeg ligdi, bɩ a sã n data, m na n kõ-a pʋʋg a to n lebse, t'a leok: ‹Mam ka na n kõ m pʋʋg ye.› »

⁷ A paga a Zezabɛl yeel-a lame: «Ka foo n dɩt naam Israyɛl bɩ? Bɩ f yik n deeg dɩɩb n dɩ la f noog f sũuri, tɩ mam na kõ-foo Zizreyɛl dao a Nabot pʋʋgo.»

⁸ A Zezabɛl gʋlsa sɛba a Akab yʋʋr yĩnga, n ning sɛba zugu bũmb sẽn kõt kaseto tɩ b yii dĩma nengẽ, n tool nin-kẽemba la kãsem-dãmba sẽn da be-b tẽnga pʋgẽ, a Nabot sɛɛgẽ.

⁹ A gʋlsa woto sɛba pʋsẽ: «Moon-y no-loeere, la y yiis a Nabot t'a zĩnd neba fãa taoore.

¹⁰ La bao-y neb a yiibu, nin-yoodo, tɩ b zĩnd a taoore n dõd a n yetẽ: ‹Fo tʋʋsa Wẽnnaam la dĩma.› La y yaool n tall-a n yi kɛɛnga n lab-a kuga, t'a ki.»

¹¹ La nin-kẽemba la kãsem-dãmba sẽn da be-b tẽn kãng maana a Zezabɛl sẽn yeele, wala a sẽn gʋls sɛba pʋsẽ.

¹² B moona no-loeere, b kɩtame t'a Nabot yi n yals neba taoore,

¹³ tɩ nin-yood a yiibã yaool n wa, n zĩnd n togl a Nabot. La nin-yoodã rõd-a lame n yetẽ: «Yõa tʋʋsa Soaala-Wẽnd la dĩma!» La b yiisa a Nabot tẽngã kɩrenga n lab-a kuga t'a ki.

¹⁴ B tʋmame tɩ b yeel a Zezabɛl: «B laba a Nabot kug la a kiime.»

¹⁵ A Zezabɛl sẽn wʋm tɩ b laba a Nabot kuga la a kiime, a yeela a Akab: «Yik-y n tɩ soog a Nabot, Zizreyɛl daoã, pʋʋgã, a ra zãgsa a kũuni la a koosgo, a ka le ket ne yõor ye, a kiime.»

¹⁶ A Akab sẽn wʋm t'a Nabot kiime, a yikame t'a na n sig n deeg a Nabot pʋʋgã n sooge.

¹⁷ La Wẽnd goma ne Tisbe rao, a Eli n yeele:

¹⁸ «Yik n sigi n seg a Akab, Israyɛl dĩma sẽn be Samari. Ade, a bee a Nabot pʋʋgẽ wã, a siga be n na n soog pʋʋgã.

¹⁹ Fo na n goma ne-a: ‹Wẽnd koɛɛg la woto: Ya f sẽn wẽ n kʋ wã yĩng la f geen tɩ f na lebg pʋʋga soaala?› F na yeel-a: ‹Ad Soaala koɛɛg: Baasã sẽn leg a Nabot zɩɩma zĩig ningã, zĩ-kãng la b na n leg fo meng zɩɩm.› »

²⁰ A Akab yeela a Eli: «Foo n le seg maam, m bɛyã?» T'a Eli leoke: «N-yẽe, maam n le seg foom, tɩ f saka zãmbo la f maana sẽn ka sõmb Wẽnnaam nifẽ!

²¹ Ade, mam na n sika yel-beed fo zugu, m na pɩɩg f sagda zãng kas. Rao fãa sẽn be a Akab soolmẽ, yamb bɩ burkĩna, m na loog ne-a.

²² Mam na kɩt tɩ f roog yɩ wala a Nebat biiga a Zeroboam roogo, la Ayiya biiga, a Basa roogo, fo sẽn puug m sũura yĩnga, fo sẽn luba a Israyɛl yel-wẽnd pʋgẽ yĩnga.»

²³ La Soaala-Wẽnd goma a Zezabɛl me yelle: «Baas na n wãba a Zezabɛl, Zizreyɛl tẽnga pʋgẽ.

²⁴ A Akab yira ned sẽn ki tẽnga pʋg fãa, baas n wãbd-a, la sẽn ki-a we-kɛɛnga, yĩngri luiili n dɩt-a.»

²⁵ Sɩd-sɩda, ned pa zĩnd t'a wẽnema kolg a Akab wẽnem ye. A saka zãmbo n maan sẽn pa sõmb Soaala-Wẽnd nifẽ, la yaa a pag a Zezabɛl n kẽes-a moogo.

²⁶ A maana yel-yoodo la sẽn yɩɩd fãa, a pʋga wẽnd dãmba sẽn ka võore, wala Amoritsa sẽn da maande tɩ Wẽnd reeg b tẽng n kõ Israyɛl kamba.

²⁷ A Akab sẽn wʋm gom kãensã, a kẽega a fugu, n pil a meng ne sũ-pa-noang futu, n loe noore, n gãe tẽnga la a kẽnd soaala, soaala!

²⁸ La Naaba-Wẽnd goma ne a Eli, Tisbe dao, n yetẽ: «Fo yãee a Akab sẽn sulg a meng seem ninga mam taoor bɩ?

²⁹ A sẽn sulg a meng mam taoor woto yĩnga, ka a vɩɩm wakat la m na n wa ne yel-beeda ye. La yaa yẽ poore, a biig sẽn wat n dɩt naama wakato la m na n wa ne yel-beed a roog zugu.»