1 Rĩm-dãmbã 20 - SEBR SÕNGO

A Akab ne Siri dĩma

¹ A Ben-Adad, Siri dĩma, tigma a tãb-biisa fãa. Nanams pis-tã la a yi n da be ne-a ne b wiidi la b bilim-bilm. A Ben-Adad waa n gũbga Samari, n kaoog zabre.

² A tʋma neb tẽnga pʋgẽ, Israyɛl dĩma Akab nengẽ,

³ tɩ b tɩ yeel-a: «A Ben-Adad koɛɛg la woto: Fo wanzurf la f sãnem, maam n so; fo pagba la f kamba, maam n so.»

⁴ La Israyɛl dĩma leokame: «M zu-soaba, m dĩma, yãmb yam bala; yãmb n so maam ne m sẽn tar fãa.»

⁵ La a le tʋma neb tɩ wa yeele: «A Ben-Adad koɛɛg la woto: Mam sɩd tʋmame tɩ b wa yeel foom: ‹F wanzurfu, f sãnem, f pagba la f kamba, yiis fãa n kõ-ma.›

⁶ Bãng tɩ beoog, wakat kãnga, mam na n tʋma m sõgen-kamba, tɩ b vɛɛs f roogo la f neba roto la bũmb ning fãa sẽn ta b yam, bɩ b rɩk n loog.»

⁷ La Akab boola tẽnga nin-kẽemba fãa n yeele: «Bɩ y ges la y bãng vẽenega, tɩ nin-kãnga rat-m-la ne wẽnga! A sẽn tʋm tɩ b wa reeg m pagba la m kamba, m wanzurf la m sãnem, m pa zãgs ye.»

⁸ Dẽ la nin-kẽemba la zãma leok yã: «Bɩ y ra kelg la y ra sak fɩ.»

⁹ Woto a Akab yeela a Ben-Adad sẽn tʋm b rãmba: «Tɩ yeel-y y zu-soaba woto: ‹Yãmb sẽn deng n kos y sõgna bũmb ningã, a ra tõe n maaname, la y sẽn le paas bũmb ninga marsã wã, ka tõe ye.› » La b sẽn tʋm b rãmba lebg n tɩ togsa leokrã a Ben-Adad.

¹⁰ A Ben-Adad tʋmame tɩ b le wa yeel-a: «Bɩ m wẽnd dãmba sɩbg maam n le sɩbg n bãge, Samari sã n kell tom sẽn sek a na pid nebã fãa sẽn pʋgd maama nusi.»

¹¹ La a Israyɛl dĩma leokame: «Tẽeg-y dĩm-y a Ben-Adad yelbũnd kãnga: ‹Sẽn nan bobd-a n dabd zabre da maan wa sẽn zab-a n tõog n lɛɛg n watẽ ye.› »

¹² A Ben Adad sẽn wʋm woto, rẽ t'a ra zĩ n yũuda rãam a nanams rotẽ, a yeela a neba: «Aya! Ned kam fãa leb a zĩigẽ!» Tɩ neba leb b zĩisẽ n segl n na n tak zabr ne tẽngã.

¹³ La ade, bãngda a ye n kolg a Akab n yeel Israyɛl dĩma: «Soaala-Wẽnd n gomd woto: Yãmb nee zãma kãsengã? Ade, dũnna, m na n ning-a la y nugẽ, la woto fo na bãng tɩ maam la yãmb Wẽnde.»

¹⁴ A Akab sokame: «Na n tũu ne ãn nugu?» Tɩ bãngda yeele: «Wẽnd leoka woto: Na n tuu ne kom-bɩɩbã b sẽn sa n yãgs tẽn-bɛdẽ wã.» T'a Akab soke: «La ãnd n na n tak zabrã?» Tɩ bãngda leoke: «Foom!»

¹⁵ Dĩma saame n sõd tẽnsa kom-bɩɩba, kãsem-dãmba sẽn da sa n bool b rãmb tãpẽ wã, da yaa bãmb kobs-yi la pis-tã la a yi. La a yaool n saag n gesa a Israyɛl tãb-biisa fãa, da yaa bãmb tus a yopoe.

¹⁶ Dĩma Akab boba tãpa wĩnto-sʋka, dẽ t'a Ben-Adad da yũuda rãam a roogẽ n gãeemnẽ, yẽ ne dĩm dãmb pis-tã la a yi sẽn da yõg zoodo ne-a.

¹⁷ Kom-bɩɩbã n deng yiibu n na n tɩ zabe. A Ben-Adad tʋmame tɩ b tɩ ges sẽn ya-la; tɩ b lɛɛg n wa togs-a woto: «Neb n yi Samari n wa.»

¹⁸ A yeelame: «B sã n yii laafi baoobo, yõg-y-b vɩɩse n wa, b sã n yii ne zabr daabo, yõg-y b vɩɩse n wa ne!»

¹⁹ Dẽ tɩ kom-bɩɩba la tãb-biisa sẽn da pʋgdã da paam n yi tẽngã.

²⁰ Ned kamb fãa kʋʋ sẽn waa a taoore. Aramsa zoeeme, t'a Israyɛl pʋgd n digd-b. A Ben-Adad, Aram dĩma, zomba weef n zoe, yẽ ne wed-dʋʋdb kẽere.

²¹ Israyɛl dĩma yiime, n yõg wiidã la a reeg bilim-bilma. A tõoga Aram dãmba tõogr kãsenga.

²² Bãngda kolg n yeela Israyɛl dĩma: «Keng f sũuri la ges f sẽn na n manega, tɩ yʋʋm vẽkrã, Aram dĩma na n lɛɛg n wa zaba ne foom.»

Aram ne Israyɛl zaba

²³ Aram dĩma poorẽ dãmba yeel-a lame: «Israyɛl Wẽnda yaa Wẽnd sẽn nong tãmse, yaa rẽ yĩng la b tõog tõndo. D kaoog zabre ne bãmb tẽn-nabrẽ n ges d kõn tõog-ba.

²⁴ Bɩ y maan woto, dĩma: deeg-y dĩm dãmba sẽn sõngd yãmba naam la y ledg-b ne y kombɛɛmba.

²⁵ Yãmb meng yiis tãb-biis sõor sẽn zem sẽn ki-bã, wiid sõor sẽn zem sẽn pa-b zabrã, bilim-bilma me sõor sẽn ta pĩnd dẽnna la d kaoog zabra tẽn nabrẽ. D tẽed tɩ d na maan raoodo, n tõog Israyɛl dãmbã.» La a Ben-Adad kelga b saglgo la a tũume.

²⁶ La yʋʋmdã sẽn vẽke, a Ben-Adad tonga Aramsã, la a kẽnga Afɛk n na n tɩ kaoog zabre ne a Israyɛl.

²⁷ Israyɛl kamba me tongame, b reega tãnsoaben-dãmba sẽn tog n kõ-b bũmb ning fãa la b looga Aramsa segbo. Israyɛl kamba gãnega b tãpo, tãb-sik a yiib pʋgẽ, tɩ bãmb ne Aramsa get taaba. Israyɛl tãb-biisa ra yaa wa bʋʋs bãg-bõones a yi, tɩ Aramsa yɛdg n pid tẽngã.

²⁸ Wẽnnaam neda kolgame n gom ne Israyɛl dĩma n yeel-a: «Soaala-Wẽnd koɛɛg la woto: Aramsa sẽn yeel tɩ maam a Wẽnd yaa Wẽnd sẽn nong tãmsã, la ka Wẽnd sẽn kẽed tẽn-nabre, mam na n ninga zãma kãnga fãa fo nugẽ, la woto y na bãng tɩ maam la Wẽnnaam.»

²⁹ Zab-zabdba zĩnda woto n get taaba, dasem a yoobe. La a yopoe daare zabra kaoogame. A Israyɛl tõoga Aramsã n kʋ b neb tus koabga daar a ye pʋgẽ.

³⁰ Sẽn kell-bã zoeeme n tud Afɛk, n tɩ kẽ tẽnga pʋgẽ, tɩ lal-gũbra lʋɩ n bʋʋg neb tus pisi la a yopoe sẽn da kell-bã. A Ben-Adad zoeeme n tɩ kẽ tẽnga pʋgẽ. A Paama roog n soond be.

³¹ A kug-zĩidba yeel-a lame: «Tõnd wʋmame t'a Israyɛl dĩm dãmba, yaa dĩm dãmb sẽn be sugri. Wa-y tɩ d sẽgen sũ-pa-noang futu la d loe d nus ne tãando n kʋk d zutu n yaool n kẽng Israyɛl dĩma nengẽ; daare a na bas-d ne yõore.»

³² B rɩka sũ-pa-noang futu n sẽgen b seese, la tãando n vil b kamse n kẽng Israyɛl dĩma nengẽ n yeel-a: «Yãmb yamba, a Ben-Adad, tɩ b wa yeelyã: M yõkd y sɛɛga, bas-y-m ne yõore.» T'a Akab soke: «A keta ne yõor laa? Yaa m saam-biiga!»

³³ B yãeeme tɩ na n zemsame. Woto wã b yeelame: «A Ben-Adad yaa yãmb saam-biiga?» T'a Akab yeele: «Bɩ y kẽng n tɩ bool-a t'a wa.» A Ben-Adad yi-la a sẽn da solgẽ wã, a waame, t'a Akab kẽes-a a bilim-bilm pʋga.

³⁴ A Ben-Adad yeel-a lame: «M na n lebsa yãmba, tẽnsã fãa m ba sẽn deeg y ba nugẽ. La yãmb na n mee roto Damas pʋgẽ, teed koosgo yĩnga, wala m ba sẽn dag n me Samari pʋgẽ. Mam sẽn kote, f sã n sake, yaa f wogl m yõore.» A Akab saka a sẽn yalsã n bas-a n pa kʋ ye.

A Akab sãbsgo

³⁵ Wakat kãnga Soaala-Wẽnd kõo bãngd karen-biig a ye noor t'a yeel a tũud-n-taaga: «M kotame tɩ f wẽ-m n kʋ!» La a tũud-n-taagã zãgsame t'a kõ kʋ-a ye.

³⁶ T'a yeel: «Fo sẽn pa kelg m koɛɛg yĩnga, ade, fo sã n loog n bas maam, gɩgemde n na n yõk foom.» La a tũud-n-taagã sẽn yi n looge, gɩgemd seg-a lame n yõk-a n kʋ.

³⁷ La bãngdba karen-biiga sega ned a to n yeel-a: «Wẽ-m n kʋ!» La daoã wẽ-a lame n pogle.

³⁸ Bãngda teema futu, n tak a puglã n lud a nenga, n kẽng n tɩ yals dĩma Akab sẽn na n loog sor ninga noore.

³⁹ Dĩma sẽn wa n loogdẽ, a kelmame n yetẽ: «M zu-soaba, yãmb sõgna dag n zabda ne a bɛɛba, la ned n yi zabra zĩigẽ n tall ned a sẽn yõke n yeel-ma: ‹Gũ nin-kãnga t'a ra loog ye. A sã n zoe n põse, fo yõor la b na n deeg n ledg yẽ rẽnna sẽn põsã, ka rẽ bɩ f yao wanzurf gilgu.›

⁴⁰ La yãmb yambã sẽn wa n maand woto la woto, daoã menemame.» Israyɛl dĩma leokame: «F bʋʋd kaoome, la yaa ne f meng noore.»

⁴¹ La bãngda yãka peenda sẽn da lud a nengã tao-tao, tɩ Israyɛl dĩma na n bãng tɩ yaa bãngdba nin-yende.

⁴² Bãngda yeel-a lame: «Soaala koɛɛg la woto: ‹Fo sẽn bas neda t'a põsã, ne m sẽn da kãab a beedã, foo n na n ki a zĩigẽ, la fo soolma rãmba n na n ki a soolma rãmb zĩigẽ.› »

⁴³ La Israyɛl dĩma kula a yiri, Samari tẽnga, ne nen-gãnenga la sũ-beedo.