1 Rĩm-dãmbã 18 - SEBR SÕNGO

A Eli ne a Akab

¹ Sẽn kaoos rẽ loogr poore, yʋʋm sẽn taa a tã, Soaala-Wẽnnaam goma ne a Eli n yeel-a: «Kẽng n tɩ wilg f meng a Akab; mam na n kɩtame tɩ saag ni tẽnga zugu.»

² La a Eli yikame n dabd a Akab nengẽ. Koma sɩd da wɩnga Samari;

³ a Akab boola a samand naaba, a Obadiya. Bãng-y t'a Obadiya, yaa ned sẽn da mi Naaba-Wẽnd waoogre.

⁴ Sɩd me, a Zezabɛl sẽn da waa n kʋʋd Wẽnd no-rɛɛsdbã, a Obadiya da peega no-rɛɛsdb koabga, n solg bãmb pis-nu-nu tãn-bogd a yiib pʋgẽ, m da rɩlgd-b beene ne buri la koom.

⁵ A Akab yeela a Obadiya: «Wa tɩ d na n saaga tẽnga fãa kobumdum la bãad zĩisi, daare d na yãe yamdo n kõ wiidã la bõn-weesã la kõ yɩ modgre tɩ d kʋ bãmb kẽer ye.»

⁶ B pʋɩ tẽnsã n na n saag-ba; a Akab rɩka sor a yembre, t'a Obadiya me rɩk sor a to.

⁷ A Obadiya sẽn wa n kẽnda, a sega a Eli, n bãng-a, n wõgemd n fõgneg a neng tẽnga n yeele: «Sɩd yaa yãmb bɩ, m naaba Eli?»

⁸ T'a leoke: «N-yẽe, yaa maam! Tɩ yeel f zu-soabã: Ad-a Eli bee ka.»

⁹ A Obadiya leokame: «Mam beeg-y-la ne bõe tɩ yãmb na n dɩk maam n ning a Akab nugẽ t'a kʋ-ma?

¹⁰ M wẽen ne Soaala, yãmb Wẽnnaama, tɩ soolem bɩ rĩung ba a ye ka be, m dĩma sẽn pa tʋm tɩ b bao yãmb ye; la b sã n da yeele a ka be ka ye, a ra kɩtdame tɩ tẽng kãng bɩ rĩunga rãmb wẽene tɩ b sɩd ka yãe yãmb ye;

¹¹ tɩ yãmb yet maam marsã: Kẽng n tɩ yeel f zu-soaba: ‹A Eli bee ka!›

¹² Bũmb ning sẽn na n yɩ, yaa tɩ maam sã n wa zãag ne yãmba, Soaala-Wẽnd pãnga na n dɩka yãmb n kẽng zĩig a to mam sẽn ka miẽ, dẽ tɩ mam yaool n zoe n togsa a Akab. A sã n bao yãmb be n konge, maam la a kʋda. Y yamba yaool n zoeta Soaala-Wẽnde al a yãadmẽ.

¹³ M naaba, b ka togs yãmb mam sẽn maan bũmb ninga, n solg Wẽnd no-rɛɛsdb koabga, n welg-b pis-nu-nu tãn-bogd a yiib pʋgẽ n dɩlg-b ne bur la koom laa?

¹⁴ Yãmb sẽn yet maam marsã: ‹Kẽng n tɩ yeel f zu-soaba: ad a Eli bee ka,› y ratame t'a kʋ-m bala!»

¹⁵ A Eli leokame: «M wẽen ne Wẽnde, dũni fãa Soaala, m sẽn yɛs a soab taoorã, tɩ dũnna bala mam na n kẽnga a Akab nengẽ.»

¹⁶ A Obadiya kẽng n tɩ sega a Akab n togs-a t'a bãng tiiri, la a Akab tɩ sega a Eli.

¹⁷ A Akab sẽn yãee a Eli, a yeelame: «Foom n sɩd be ka, Israyɛl nin-yoogo?»

¹⁸ T'a Eli leok-a: «Ka maam la a Israyɛl sabaab ye, yaa foom ne fo ba-roogo, tɩ yãmb tõdga Soaala-Wẽnd noya, la yãmb zoe n pʋga a Baal dãmba.

¹⁹ La marsã, bɩ f kɩt tɩ b tigim Israyɛl gill n kõ-ma, Karmɛl tãnga zugu, ne a Baal no-rɛɛsdba fãa, bãmb kobs-naas la pis-nu, la Asera no-rɛɛsdb kobs-naase sẽn dɩt a Zezabɛl zakẽ.»

Karmɛl maoongo

²⁰ A Akab boola Israyɛl kamba fãa, la a tigma bãngdba Karmɛl tãnga zugu.

²¹ A Eli kolg n yeela zãma wã: «Yãmb na a n keoosa woto n kɩlld goabg la rɩtgo n ta da-bʋre?» Sã n yaa Soaala-Wẽnd la y pʋgda, bɩ y pʋg bãmba, la sã n yaa a Baal la y pʋgda, bɩ y pʋg yẽndã. La neba pa yãe koɛɛg n leok ye.

²² A Eli yeela zãma wã: «Maam m ye tãa la Wẽnd no-rɛɛs n ket dũnna, ne yõore, la a Baal no-rɛɛsdb yaa kobs-naas la pis-nu.

²³ Kõ-y tõnd lols a yiibu, tɩ bãmb yãk a yembre n bees n dogl daad zugu la b da tugl bugum ye; mam me na n beesa loalg a to wã la m kõn ning bugum ye.

²⁴ Yãmb na n pʋʋsa y wẽndã tɩ mam me pʋʋs m Soaala. Wẽnd ning sẽn waa ne bugum, yaa yẽ la Wẽnnaam.» La neba fãa leokame: «N fãa, dẽ be neere!»

²⁵ A Eli yeela a Baal no-rɛɛsdba: «Bɩ y yãk loalg a yembre la sɩɩg-y loalgã, tɩ yãmb sõor n yɩɩde, pʋʋs-y yãmb wẽndã, la y ra tugl bugum ye.»

²⁶ B reega loalg ning b sẽn kõ bãmbã, n bees, n yaool n bool a Baal yʋʋr, al yibeoogo n tãag wĩnto-sʋk n yetẽ: «Baal woo, leok-y-do!» La b pa wʋm koɛɛg ye, b ra yĩgimdame la b saood b maan-kugra taoore.

²⁷ La sẽn waa n ta wĩnto-sʋka, a Eli laa bãmb n yeele: «Zẽk-y y koɛɛg n kelem t'a Baal yaa wẽnde, a nug ka zaalem ye, bɩ a toga sore; daare a gõeeme la a na neke.»

²⁸ B kelma ne b koɛɛg pãng tɛka, la b kõsd b mense, ne sʋʋse la kãna tɩ zɩɩm yita, wala b sẽn yib n maanẽ.

²⁹ Sẽn wa n yõsg wĩnto-sʋka, b sɩnga goama, n gom n ta wakat ning b sẽn kʋʋd zafar maoongo. La b pa tol n wʋm koɛɛga, b pa tol n wʋm ned leokre, b pa yãend bũmb a to ye.

³⁰ A Eli yeela kʋʋnga: «Bɩ y kolg!» La neba fãa kolga a Eli.

³¹ A le manega Soaala maan-kugrã b sẽn da lubã. A Eli rɩka kug piig la a yi n zems ne a Zakoob kamba sõore, wala Soaala-Wẽnd sẽn da gom ne-a n yeel: «B na n pʋda foom t'a Israyɛl.»

³² La ne kugã a mee maan-kugr, Soaala waoogr yĩnga, la a tuu boko n gilg maan-kugrã, bok sẽn tõe n deeg ko-yʋy a yiibu.

³³ A sigla raado, n bees loalgã n dogl raada zugu.

³⁴ A yeelame: «Pids-y yʋy a naas ne koom n dɩk n budg maoongã ne raada zugu.» Tɩ b maan boto. A yeelame: «Le maan-y n paase!»

³⁵ N le yeele: «Le maan-y n paas-y yɛsa.» Tɩ b le maan boto n daag tɩ ta pipi kooma naoor a taabo tɩ kooma gilg maan-kugrã n pid bokã n duki.

³⁶ Wakat ning b sẽn mii n kʋʋd zaabr maoongo, bãngda a Eli kolg n yeelame: «Soaala-Wẽnde, a Abraam la Izaak la a Zakoob Wẽnde, bɩ b bãng dũnna tɩ yãmb la a Israyɛl Wẽnnaam, tɩ mam ya yãmb tʋʋm-tʋmda, la tũu ne yãmb gomde la m sẽn maand yell kãnga wã.

³⁷ Leok-y-ma, Soaala-Wẽnde, leok-y-ma tɩ nin-bãmba bãng tɩ yaa yãmba, Soaala, la Wẽnnaam, la y le wẽnemd b neng n tees y menga.»

³⁸ Wẽnd bugum sigame n dɩ maoongã ne raadã la kugã la toma, n fõog kooma sẽn da pid bokã.

³⁹ Dabeem yõka zãma wã. B wõgemdame n fõgneg b neng tẽnga n yetẽ: «Yaa Soaala la Wẽnnaam, yaa Soaala la Wẽnnaam!»

⁴⁰ T'a Eli yeel-ba: «Aya, bɩ y yõk a Baal no-rɛɛsdba fãa, la b ned ba a ye da põs ye!» La b yõg-b lame. A Eli kɩtame tɩ b tall-ba n sig Kisõ sudga pʋga t'a kood-ba.

⁴¹ La a Eli yeela a Akab: «Dɩ la f yũ, tɩ mam wʋmda saag kɛleng rãamde.»

⁴² La a Akab kẽngame n na n tɩ rɩ la a yũ. A Eli rʋʋ Karmɛl tãnga zug tẽnsʋka la a sulgame n ning a zugã a rũma sʋka.

⁴³ A yeela a dakõore: «Rʋ n ges mogra sẽnẽ!» Dakõorã rʋ n gesame n yeel: «Bũmb ka ye!» A Eli yeel-a-la naoor a yopoe: «Leb n ges!»

⁴⁴ A yopoe soaba a yeelame: «Ade, sawad-bila n zẽkd mogra zugu, a paooda wala ned nug gilgu.» T'a Eli leok-a: «Kẽng n tɩ yeel a Akab: ‹Segl f bilim-bilm tao tao n sigi tɩ saag da gɩdg f ye.› »

⁴⁵ La sẽn yɩ bilf bala saag kʋɩɩme tɩ sobg yiki tɩ sa kãseng na n ni. A Akab kẽ a bilim-bilma n dɩk Zizreyɛl sore.

⁴⁶ Wẽnd pãng kẽ-la a Eli t'a sẽbg a sɛɛga n lʋɩ a Akab taoore n zoe n tɩ tãag Zizreyɛl tẽnga.