1 Rĩm-dãmbã 17 - SEBR SÕNGO

Bãngda Eli

¹ A Eli, Tisbe dao, Galaad tẽn-peelmẽ, yeela dĩm a Akab: «M wẽen ne Soaala, a Israyɛl Wẽnnaama, mam sẽn pʋgd a soaba, tɩ yʋʋma sẽn pʋgdã, saag kõ le ni la meenem kõ dʋʋge sã n ka maam n kose.»

² Wẽnd goma ne a Eli:

³ «Yik ka n kẽng yaang sẽnẽ n tɩ soond Kerit sudgã, Zʋrdẽ yaanga.

⁴ Fo na n paama kʋɩlga koom be n yũuda, la m na n kõo gãabd noore tɩ b kõt-f rɩɩb beelẽ.»

⁵ A Eli kẽngame, a maana wala, b sẽn da kõ a noore, la a tɩ zĩnda Kerit sudgã, Zʋrdẽ yaanga.

⁶ Gãabda ra wat n kõt-a-la bur la nemd yibeoogo, n kõt-a bur la nemd zaabre, la a ra yũuda kʋɩlga koom.

Sarepta pʋg-kõore

⁷ La sẽn wa n yɩ bilfu, kʋɩlga koom fẽbgame, tɩ saag da pa le niid tẽnga ye.

⁸ Soaala-Wẽnnaam goma ne a Eli la b yeelame:

⁹ «Yik n kẽng Sarepta sẽn be Sidõ soolmẽ n tɩ zĩnd be, mam kõo pʋg-kõor noore t'a kõt-f rɩɩb beelẽ.»

¹⁰ A Eli yik n kẽnga Sarepta, la a sẽn ta tẽnga noore, ade, a yãee paga, a yãee pʋg-kõor sẽn da wɩɩsd raado. T'a bool-a n yeel: «M kotame tɩ f toog koom bilfu n wa kõ-m tɩ m yũ.»

¹¹ A sẽn yet t'a rabda la a Eli sẽn tool n bool-a n yeele: «M kotame tɩ f zɩ bur bilfu f nugẽ n wa kõ-ma.»

¹² La paga leokame: «M wẽen ne Soaala, yãmb Wẽnnaama, tɩ m pa le tar bur pɛdg menga, m pa le tar bũmb sã n ka zom na pid nugu tɩ be m rʋkẽ, n paas kaam bilfu bala ne yubla. La ade, mam wɩɩsda ribli a yiibu n na n tɩ segle rẽndã, maam ne m biiga yĩnga, tɩ d rɩ la d yaool n ki.»

¹³ La a Eli leokame: «Da maan rabeem ba bilfu, leb yiri n tɩ maan wa m sẽn yeele; la reng n segl dɩɩb bilfu n wa kõ-ma, tɩ f na yaool n segl foom ne f biiga yĩnga.

¹⁴ Israyɛl Wẽnnaama, koɛɛg la woto: ‹Zoma sẽn be rʋkẽ wã kõn tol n sɛ ye, la kaama sẽn be ne yubla kõn tol n woog tɩ ta daar ninga Soaala-Wẽnd sẽn na n tool saaga n madg tẽnga.› »

¹⁵ La pagã kẽng n tɩ maana wa a Eli sẽn yeele. A rɩɩme tɩ kaoose, yẽ ne a Eli la a zak rãmba.

¹⁶ Zoma sẽn da be rʋkẽ pa sɛ ye, la kaama sẽn da be ne yublã ka woog ye, wala sẽn da pĩnd n togs ne a Eli noore.

Pʋg-kõora biig vʋʋgre

¹⁷ Dẽ loogre poore zaka pag biig lʋɩɩ bãaga al tɩ wɩnge, al t'a wa tol n ki.

¹⁸ Paga yeela a Eli: «Bõe n be maam ne yãmb sʋka, Wẽnnaam neda? Yãmb siga mam yiri n na n le tẽeg m yel-wẽna la y kʋ mam biiga?»

¹⁹ A Eli leok-a lame: «Kõ maam f biiga ka!» A reega biigã a nugĩ n dʋ ne-a, yĩngri doogã, a sẽn da be zĩig ningã la a gãneg-a-la a meng gãag zugu.

²⁰ A pʋʋsa Wẽnde n yeele: «Soaala, m Wẽnnaam, pʋg-kõora sẽn deeg maam sãandã, yãmb na n maana wẽng ne-a n kɩt t'a biiga ki bɩ?»

²¹ La a yaool n gãanda naoor a tã n bʋʋg biigã, n pʋʋs Soaala-Wẽnd woto: «Soaala, m Wẽnnaam, kɩt-y tɩ bi-kãnga vɩɩma leb n wa a pʋgẽ.»

²² La Soaala-Wẽnd kelga a Eli koɛɛga; biiga vɩɩma leb n wa a pʋgẽ, t'a vʋʋge.

²³ A Eli rɩka biigã n sig tẽnga n kɩs-a a ma, la a yeelame: «Ade, f biiga vɩɩme.»

²⁴ Pagã leoka a Eli: «Mam bãngame marsã tɩ yãmb yaa Wẽnnaam neda la Wẽnnaam gomd n sɩd yit y noorẽ.»