1 Rĩm-dãmbã 16 - SEBR SÕNGO

¹ Wẽnd goma ne bãngd a Yewu, a Anani biiga, a Basa poorẽ n yetẽ:

² «Mam yiisa foom tãmpʋʋrẽ, m zẽka foom tɩ f yɩ m buud a Israyɛl dĩma, la fo rɩka a Zeroboam sore, n kɩt tɩ m buud a Israyɛl lʋɩ yel-wẽnd pʋgẽ, n puug m sũuri.

³ Dẽ yĩnga, mam na n pɩɩga a Basa ne a roog gill kas, m na kɩt t'a rooga lebg wa a Zeroboam, a Nebat biiga roogo.

⁴ A Basa ned sã n ki tẽng pʋgẽ, baas n wãbd-a, la a sã n ki we-kɛɛnga, yaa yĩngri luiili n dɩt-a.»

⁵ A Basa kibare, a sẽn maan fãa, a raoodã, rẽ fãa pa gʋls a Israyɛl dĩm dãmba kibara sebrẽ bɩ?

⁶ A Basa tɩ saka a saam-dãmba, la b mum-a-la Tirsa t'a biiga, a Ela, led a zaoorẽ.

⁷ Soaala-Wẽnd sẽn waa n tũnug bãngd a Yewu, a Anani biiga, n taas b koɛɛgã, a Basa ne a zaka rãmba, yɩɩ bũmb a yiib yĩnga: Pipi yaa a Basa ne a zaka rãmb sẽn maan wẽng Soaala-Wẽnd nifẽ, n puug b sũuri, n wẽneg a Zeroboam roogo. A yiib soaba a kɩtame tɩ b kood a Zeroboam yagensa gilli.

A Ela, Israyɛl dĩma

⁸ Zɩɩda dĩma, a Asa naam yʋʋmd pisi la a yoob soaba, a Basa biiga, a Ela, n lebg Israyɛl dĩma; a rɩɩ naam yʋʋm a yi, Tirsa.

⁹ A tãnsoaba a Zimri n da get a bilim-bilm pʋɩ-sʋk yelle. A Zimri zãmb-a lame, dẽ t'a bee Tirsa n dɩtẽ la a yũud al tɩ rãam wa lub-a, samand naab a Arsa zakẽ.

¹⁰ A Zimri kẽeme n wẽ-a n kʋ, n deeg a naam. Zɩɩda dĩm, a Asa, da zao a naama zaoorẽ yʋʋmd pisi la a yopoe.

¹¹ A Zimri sẽn lebg dĩm bala n zaond a zaoorẽ, a luba a Basa roog gilli, a ka bas ned ba a ye t'a põs ye, a ka bas bi-ribla, sẽn paood bɩ sẽn sɩlge, a Basa buud bɩ a zo-rãmb ye.

¹² Woto a Zĩmbri sãama a Basa roog gilli, wala Wẽnd sẽn da pĩnd n yeel-a ne bãngda a Yewu noore.

¹³ A Basa, ne a biiga, a Ela, yel-wẽndã, yɩɩ bãmb sẽn kɩt t'a Israyɛl maan wẽn-yaalse n puug Soaala, a Israyɛl Wẽnnaam, sũuri.

¹⁴ A Ela sẽn maana fãa pa gʋls a Israyɛl dĩm dãmba kibar sebrẽ bɩ?

A Zimri

¹⁵ Zɩɩda dĩm a Asa naam yʋʋmd pisi la a yopoe soaba, a Zimri dɩɩ naam dasem a yopoe Tirsa. Tãb-biisa da gãnega tãpo Gibetõ, Filisti rãmba soolmẽ.

¹⁶ La b sẽn wa n gãneg tãpã, tãb-biisa wʋma b sẽn yeele: «A Zimri zãmbame n tol n kʋ dĩma.» La Israyɛl tãb-biisa gilli, zĩig pʋgẽ bala, tãb-sika pʋga, b yuga tãnsoab a Omri, t'a soog Israyɛl naam.

¹⁷ A Omri ne a Israyɛl gilli basa Gibetõ n kẽng n tɩ gũbg Tirsa.

¹⁸ A Zimri sẽn mik tɩ b rat n deega tẽngã, a kẽe dĩma gaosga pʋga n yõog rooga bugum, la a meng paa bugmẽ.

¹⁹ Rẽ yaa a sẽn maan yel-wẽnda yĩnga, a sẽn tʋm wẽng Soaala nifẽ, n dɩk a Zeroboam nao, n togs-a, n kɩt t'a Israyɛl maan yel-wẽnde.

²⁰ A Zĩmbri tʋʋm a taaba, a sẽn zãmb dĩma zãmb ninga, dẽ fãa ka gʋls a Israyɛl dĩm dãmba kibar sebrẽ bɩ?

²¹ La a Israyɛl neba welga taaba sags a yi; neba pʋɩ-sʋk da kẽeda a Tibni, a Ginat biigã tãpẽ, n dat n kõ-a naam, tɩ pʋɩ-sʋk me kẽeda a Omri tãpẽ.

²² La sẽn da kẽed-b a Omri wã, bãmb pãng n yɩɩge. A Tibni, a Ginat biigã, kiime. Woto a Omri rɩ naam.

A Omri

²³ A Zɩɩda dĩma a Aza naam yʋʋmd pis-tã la a yembre soaba, a Omri n lebg Israyɛl dĩma, n dɩ naam yʋʋm piig la a yi. A rɩɩ yʋʋm a yoob Tirsa.

²⁴ A ra-la a Semɛr nengẽ ne wanzurf gil a yi, Samari tãnga. A ninga tãnsoaben zak, tãnga zugu, la a pʋda tẽngã a sẽn me wã, tɩ Samari, yaa sẽn da so-a tẽnga yʋʋre, a Semɛr yʋʋre.

²⁵ A Omri maana wẽnga Soaala-Wẽnd nifẽ; a maana wẽng n yɩɩg sẽn deng-b yẽnda fãa,

²⁶ Bũmba fãa pʋgẽ, a rɩka a Zeroboam, a Nebat biiga, nao, a togsa a sẽn maan fãa, a luba a Israyɛl yel-wẽndẽ n puug a Israyɛl Wẽnnaam sũuri ne wẽn-naandsa sẽn ka võorã waoogre.

²⁷ A Omri tʋʋma, a sẽn maane, a raooda yelle, dẽ fãa pa gʋls a Israyɛl dĩm dãmba kibar sebrẽ bɩ?

²⁸ A Omri tɩ saka a saam-dãmba, tɩ b mum-a Samari. La a biiga a Akab n led a zaoorẽ.

A Akab naam Israyɛl

²⁹ A Akab, a Omri, biiga, n lebg dĩma, a Israyɛl tẽnga, Zɩɩda dĩma a Aza naam deegr yʋʋmd pis-tã la a nii soaba; a Akab, a Omri biiga rɩɩ naam Samari yʋʋm pisi la a yi.

³⁰ A Akab, a Omri biiga, maana wẽnga Soaala-Wẽnd nifẽ n yɩɩg sẽn deng b yẽ wã fãa.

³¹ A rɩka a Zeroboam nao, n togs a yel-wẽna, dẽ t'a nan paooda, a peega a Zezabɛl, Sidõ dãmba dĩma, a Itobaal, bi-pugla, n maan a paga, la a kẽng n tɩ waooga a Baal la a wõgemda a taoore.

³² A Akab mee maan-kugri a Baal yĩnga, a Baal roogẽ, Samari.

³³ A Akab peesa wẽn-naands ne raado n lugl la a maana yɛl a taaba n paase. A maana wẽnga n puug Soaala, a Israyɛl Wẽnnaam, sũuri, n yɩɩg Israyɛl dĩm dãmba fãa sẽn deng-b yẽ wã.

³⁴ Yẽ zamaanẽ, Betɛl nedã, a Iyɛl leb n mee Zeriko. La a Zozuwe, a Nun biiga sẽn da togs bũmb ninga ne Soaala vẽnegrã pidsame: A Iyɛl bi-kẽeng a Abiram maana kaalem b sẽn waa n na n sɩng meebã la a kamba yao-zʋʋg, a Segub, me kii tẽnga kʋɩlens sẽn lugl daare.