1 Rĩm-dãmbã 15 - SEBR SÕNGO

A Abiyam dɩta naam Zɩɩda

¹ Dĩma a Zeroboam, a Nebat biiga, naam yʋʋmd piig la a nii, a Abiyam n lebg Zɩɩda dĩma.

² A rɩɩ naam yʋʋm a tã Zerizalɛɛm; a ma yʋʋr da boondame t'a Maaka la a ra yaa a Absalom bi-pugla.

³ A Abiyam rɩka a ba nao n maan yel-wẽn niynsa fãa a ba sẽn reng n maane, la a sũur pa kẽ Soaala, a Wẽnnaam, wala a saamba, a Daviid ye.

⁴ La baasg zãnga, a saamba, a Daviid, zug maasem yĩnga, Soaala-Wẽnnaam ka bas tɩ b fitila ki Zerizalɛɛm ye; b kõ-a-la biig sẽn dɩ naam a poorẽ; Zerizalɛɛm kell n yɩɩ na-tẽnga.

⁵ A Daviid maana sẽn ya tɩrga Wẽnd nifẽ, la sã n pa Ititga a Uri yella sẽn lʋɩ sʋkã, a pa bʋdg moogo n zãgs b noor ba a ye, b sẽn kõ-a, a vɩɩma zãnga.

⁶ Zabre zĩnda a Roboam ne a Zeroboam sʋka, a vɩɩma zãnga.

⁷ A Abiyam tʋʋm a taabã la a sẽn maan fãa, pa gʋls a Zɩɩda dĩm dãmba kibar sebrẽ bɩ? Zabre zĩnda a Abiyam la a Zeroboam sʋka.

⁸ A Abiyam tɩ saka a saam-dãmba, la b mum-a-la a Daviid na-tẽngẽ. A biiga a Asa n led-a zaoorẽ.

A Asa naam Zɩɩda

⁹ A Zeroboam, a Israyɛl dĩma, naam yʋʋmd pisi soaba, a Asa n lebg Zɩɩda dĩma.

¹⁰ A dɩɩ naam yʋʋm pis-naas la a ye Zerizalɛɛm; a yaab poaka da boondame t'a Maaka, a Absalom biiga.

¹¹ A Asa maana sẽn ya tɩrga, Soaala-Wẽnd nifẽ, wala a saamba a Daviid sẽn maane.

¹² A riga yoaadba fãa n yiis a soolmẽ la a menesa wẽn-naandsa fãa a ba rãmb sẽn da peese.

¹³ A lebsa naab ma a Maaka poorẽ, a sẽn da pees Asera yooka nin-naand yĩnga. A Asa kʋʋsa wẽn-naand yookã n yõog-a bugum, Sedrõ sudga pʋga.

¹⁴ La baasgo zãnga, pʋʋsg rotã sẽn da me tãmsa zutã pa menem ye. A Asa sũura kell n kẽe Soaala zãnga a vɩɩm tɛka.

¹⁵ A tall n waa wẽnd doogẽ wã a ba sẽn da kõ Wẽnde n paas a meng kũuni: wanzurf, sãnem la lagdo.

¹⁶ A Asa ne a Basa sʋka yɩɩ zabre daar fãa.

¹⁷ Israyɛl dĩma, a Basa, waa n kaooga zabre ne a Zɩɩda dĩma, la a mee Rama n na n gɩdg a Asa, a Zɩɩda dĩma, t'a ra tõog n yi la a kẽ a tẽngẽ ye.

¹⁸ A Asa kong n wʋka wanzurf la sãnema fãa sẽn da kell Wẽnd arzɛka roogẽ la dĩma arzɛka roogẽ n ning a sõgen-kamba nusẽ tɩ b kẽng Damas n tɩ kɩs Siri dĩm, a Ben-Adad, a Tabrimo biiga la a Eziõ yagenga, la b taas-a woto:

¹⁹ «Maam ne yãmb, mam saamba ne yãmb saamba, yaa zoodo. Ad-y m toonda yãmb kũuni, wanzurfu la sãnem. Bɩ y bas tɩ zooda sẽn be yãmb ne Israyɛl dĩm a Basa sʋka sãame t'a ra le wat n takd zabr ne-m ye.»

²⁰ A Ben-Adad kelga a Asa koɛɛgã, n tʋm a tãnsoaben-dãmba tɩ b tak zabre ne Israyɛl tẽnse. A reega Iyõ, Dã, Abɛl-Bɛt-Maaka, Kinerɛt tẽng gilli, la Neftali zãnga.

²¹ A Basa sẽn wʋm rẽnda, a basa Rama meebo la a leba Tirsa.

²² A Asa, Zɩɩda dĩma, boola Zɩɩda gilli n ka bas ned ba a yembre, la b tɩ wʋka kuga la raado b sẽn da tigsi n met Rama, la dĩma rɩk-b la lame n me Gibea, a Bẽnzame soolmẽ, la Mispa.

²³ A Asa kibara zãnga, a raoodã, a tʋʋma, rẽ fãa pa gʋls a Zɩɩda dĩm dãmba kibara sebrẽ bɩ? B sẽn pa wilgi yaa a sẽn n waa n lebg nin-kẽema n bẽed nao bãaga.

²⁴ A Asa tɩ saka a saam-dãmba, tɩ b mum-a, a saamba, a Daviid, na-tẽngẽ; a biiga, a Zozafat, n led a zaoorẽ.

Israyɛl dĩm a Nadab

²⁵ A Nadab, a Zeroboam biiga, rɩɩ naam, Israyɛl, a Asa, Zɩɩda dĩma naam yʋʋmd a yiib soaba, la a dɩɩ yʋʋm a yi bala.

²⁶ A maana sẽn ya wẽnga Wẽnd nifẽ, a kell n dɩka a ba sore, la a ba sẽn kɩt t'a Israyɛl maan yel-wẽng ninga, yẽ me maan-a lame.

²⁷ La a Basa, a Ayiya biiga, a Isakar roogẽ, n zãmb-a. A Basa kʋ-la a Nadab Gibetõ, Filisti rãmba soolmẽ; wakat kãng t'a Nadab ne a Israyɛl gilli da gũbga Gibetõ.

²⁸ A Basa kʋ-a lame n deeg naam, a Asa, a Zɩɩda dĩma, naam yʋʋmd a tãab soaba.

²⁹ A sẽn lebg dĩm bala, a Basa wã-la a Zeroboam doog gilli. Ned ba a ye ka põse, wala Wẽnd sẽn da pĩnd n yeel ne b bãngda, a Ayiya, noore. Bãngda da yaa Silo raoa.

³⁰ Yɛla yɩɩ woto, t'a Zeroboam beega Wẽnde la a ra luba a soolem dãmb yel-wẽnd pʋgẽ la rẽ n da wa ne Israyɛl Wẽnnaama sũ-puuri.

³¹ A Nadab tʋʋm a taabã, a sẽn maan fãa, pa gʋls a Israyɛl dĩm dãmba kibar sebrẽ bɩ?

³² A Asa ne a Basa, a Israyɛl dĩma, zaba taab b vɩɩm tõre.

³³ Zɩɩda dĩma a Asa, naam yʋʋmd a tãab soaba, a Basa, a Ayiya biiga, rɩɩ naam Tirsa, Israyɛl zãng fãa zugu, yʋʋm pisi la a naase.

³⁴ A maana wẽnga Soaala-Wẽnd nifẽ; a rɩka a Zeroboam nao, la a togs n maana yel-wẽnd ning a Zeroboam sẽn da lub Israyɛl a soab pʋgẽ.