1 Rĩm-dãmbã 12 - SEBR SÕNGO

Sikɛm tigsga

¹ A Roboam kẽnga Sikɛm tɩ yaa be la a Israyɛl tõr da tigim n na n yug-a.

² A Nebat biig a Zeroboam wʋma a Salomo kũum. A yii Ezipt n lɛɛg n wa t'a ra zoe n kẽnga be n na n põs a Salomo.

³ B tɩ boola a Zeroboam la Israyɛl tigmame n yãag-a n wa. B yeela a Roboam woto:

⁴ «Y ba wã ra zɩlga tõnd zɩɩb sẽn zɩs wʋgo, d kos tɩ y yols-do, tɩ woto d na pʋg yãmba.»

⁵ A leok-b lame: «Kul-y, la sã n maan dasem a tã bɩ y lɛɛg n wa.»

⁶ A Roboam yẽsa ne nin-kẽembã sẽn da sõngd a ba, a Salomo, a sẽn waa n ketẽ la a sok-b lame: «M tog n leok-b-la wãna?»

⁷ Tɩ b yeele: «Yãmb sã n sak n lebg buuda zɩɩba tʋkda, n sõng-a, y sã n kõ-b koe-noogo, b na tũ yãmb daar fãa.»

⁸ A Roboam zãgsa nin-kẽemba saglgã, n bʋʋg a tũud-n-taase, la a reem-n-taase, sẽn tʋmd a zakẽ, n yẽs ne-ba.

⁹ A sok-b lame: «Y yeelame tɩ m leok nin-bãmba wãna tɩ b waa n goma woto: ‹Yols-y zɩɩb ning y ba sẽn da zɩlg tõndã.› »

¹⁰ Kom-bɩɩbã, a reem-n-taasã leokame: «Ad-y y sẽn na n leok sẽn yeel-b yãmb woto wã: ‹Y ba zɩlga tõnd wʋsgo, la yãmba, yols-y-do,› leok-y woto: ‹M pãnga sẽn tɩ paoog-m zĩig ninga ket n yɩɩda y ba wã pãng sẽn tɩ tigim zãng-zãng a nugẽ.

¹¹ M ba tʋka yãmb sẽn zɩse, la mam na paas y zɩɩbo. M ba pãba yãmb ne kaase, mam na pãb-y ne gãnd sẽn yod kutu.› »

¹² Neba le tigma taab a Roboam taoor da-yɩten-daarã, wala a meng sẽn da wilgi: «Lɛɛg-y n wa-y ka ra-yɩta.»

¹³ Dĩma leoka neba pãr-pãre, a pa reeg nin-kẽemsa sagls ye.

¹⁴ Yaa a reem-n-taasa la a kelg yã. Ad-a sẽn yeele: «M ba tʋka yãmb sẽn zɩse, la mam na paas y zɩɩbo, m ba pãb-y la ne kaase, la mam na pãb-y ne gãnd sẽn yod kutu.»

¹⁵ Dĩma pa kelg zãma wã ye. La rẽ yɩ Wẽnd n lʋɩ sʋka, sẽn na n yɩ-la n pids b sẽn da kãab a Nebat biig a Zeroboam, ne Silo bãngd, a Ayiya, noore.

¹⁶ Neba sẽn mik tɩ dĩma pa kelg-bã, b leokame: «D pʋɩɩr bʋgo n be ne a Daviid? Tõnd pʋɩɩr ka be a Zese biig nugẽ ye. Israyɛl, leb f rotẽ. Daviid doogo, bãng n dɩlg f menga.» A Israyɛl leba a tẽnsẽ.

¹⁷ A Roboam naama dɩɩb teka ne buud niyns sẽn da kẽed-b Zɩɩda tẽn-peelmẽ bala.

¹⁸ A Roboam tʋlg n maneg n yẽsa ne Israyɛl nebã la yẽ sẽn tʋm b nengẽ, a Adoram, a tʋʋma gɛta, rẽ puuga b sũur tɩ b lab-a ne kug n kʋ. A Roboam paam n kẽ-la a bilim-bilm n zoe n tees Zerizalɛɛm.

¹⁹ Yaa woto la a Zɩɩda ne a Israyɛl roog welg taaba n ta ne rũnna.

²⁰ Israyɛl rãmba sẽn wʋm t'a Zeroboam lɛɛg n waame, b bool-a-la b tigsga zĩigẽ n yug-a t'a lebg Israyɛl dĩma. Woto a Zɩɩda ne a Bẽnzame bala n kell n pa a Daviid rooga naamẽ.

²¹ A Roboam waa Zerizalɛɛm, n tigim a Zɩɩda ne a Bẽnzame tãb-biis sẽn mi zabre, bãmb tus koabg la pis-nii, n na n tɩ tak zabr ne a Israyɛl, n deeg naama n lebs a Roboam, a Salomo biigã.

²² La Wẽnd koɛɛg taa b no-rɛɛs a Semaya:

²³ «Yeel a Salomo biig, a Roboam, Zɩɩda dĩma, n paas a Zɩɩda ne a Bẽnzame roog gilli:

²⁴ ‹Woto la Soaala koɛɛga: Da bob-y zabre ne y saam-biis a Israyɛl kamb ye. Ned kam fãa leb a yiri, tɩ sẽn maana zemsa ne mam daabo.› » B kelga Soaala-Wẽnd gomdã, la wala Soaala sẽn wilgã, b rɩka sore n leb b tẽnsẽ.

²⁵ A Zeroboam maneg n mee Sikɛm, Efrayim tãnga zugu, n maan a na-tẽnga. A maneg n mee Penuwɛl me n paas a pãnga.

A Zeroboam pipi soaba

²⁶ A Zeroboam yeela a menga: «Yɛla sã n kell n yɩ woto, naama na n leba a Daviid doogo.

²⁷ Neba sã n ket n digd Zerizalɛɛm n kʋʋd b maando, b yama na n lɛɛg n kẽ-la a Roboam, Zɩɩda dĩma, la b na n kʋʋ maam, n lɛɛg n kẽ yẽnda.»

²⁸ A paama yam n maan sãnem nag-bi a yiibu n yeel zãma wã: «Yaa yʋʋm sẽn ka paood la yãmb tʋgd Zerizalɛɛm. La ade, Israyɛl, ad wẽnd niyns sẽn yiis-b-foo Ezipt tẽnga!»

²⁹ A ninga nag-bil a ye Betɛl, n ning a ye Dã.

³⁰ Dẽ me n wa ne Wẽnd beegrã. Neba tonga taab n tall nag-bil a ye n wa Dã.

³¹ A Zeroboam mee pʋʋsg zĩiga, tãmsa zutu la a baoo maan-kʋʋdba yaare, ka tũus a Levi buudẽ ye.

³² A Zeroboam maana kibsa, kiuug a nii soaba, kiuuga piig la a nu daare, wala b sẽn da maand Zɩɩda. A meng dʋʋ maan-kugra sẽn me tãng ning zugã; yaa woto la a maan Betɛl, n kʋʋd a nag-bi wã maando, n ningd maan-kʋʋdba, tãmsa zut maanda kʋʋb yĩnga.

³³ Kiuug a nii soaba, kiuuga piig la a nu daare, raar a sẽn yãk wa sẽn waa a yamẽ, a dʋ Betɛl maan-kugra, tãnga zugu. A maana kibs Israyɛl kamba yĩnga la a rʋʋ maan-kugrã n yõog wisdu.