1 Rĩm-dãmbã 11 - SEBR SÕNGO

A Salomo kongre

¹ A Salomo kẽe kãadem ne sãam-pogs wʋsgo, Ezipt dĩma bi-pugla toog sẽn yãke. A pabga yɩɩ Moabitse, Amonitse, Edomitse, Ititse la Sidõ rãmb buudu.

² Buud kãens poorẽ Soaala-Wẽnd da yeela a Israyɛl: «Da kẽng-y b nengẽ ye. Ka rẽ b na wẽnemd y yam la y sũuri n tees b wẽnd-naandsã.» A Salomo yaool n basame t'a yam kẽ bu-zẽna; bu-zẽna pagb yamleoog yõk-a lame.

³ A pagb sẽn yɩ rĩm-biis yɩɩ kobs-yopoe; talsa kamb yɩɩ kobs-tã. Yaa a Salomo pagbã n kẽes-a moogo.

⁴ A Salomo sẽn waa n kʋʋle, a pagba kɩtame t'a yam gãd wẽnd-naandse, woto a sũura ka pa zãng ne Naaba-Wẽnd wala a ba a Daviid sũur ye.

⁵ A Salomo pʋga a Astarte, Sidõ rãmb wẽn-poaka n paas a Milkom, Amonitsa yel-yooko.

⁶ A Salomo maana sẽn ka noom Soaalã, a ka sak-b wala a ba, a Daviid ye.

⁷ A tɩ mee wẽnd doog tãng ning sẽn tot ne Zerizalɛɛma zug, a Kemos yĩnga; yẽ yaa Moab rãmba yel-yoogo. A mee wẽnd doog me a Molɛk yĩnga, Amonitsa ka-mi-sẽn-ya-la.

⁸ A maana boto ne pabg a taab fãa wẽnd dãmba. Pagba ra kõta b wẽnd dãmba wisdu la maand.

⁹ Wẽnd puuga b sũur ne a Salomo, t'a ra basa bãmba, a Israyɛl Wẽnnaam, sẽn da lik-a naoor a yiibu,

¹⁰ n yeel-a t'a ra pʋg wẽnd-naandsa ye, t'a zãgs n pʋg-ba.

¹¹ Soaala-Wẽnd yeela a Salomo: «F sẽn maan woto wã, n sãam m zoodã, n pa reeg m sẽn wilg-fã, m na n deega f naama n kõ f sõgne.

¹² Kõn yɩ f vɩɩmẽ, f ba a Daviid yĩnga. Yaa f biiga nugẽ la m na n gʋsg naama.

¹³ Ka na n yɩ naama zãng ye. M na basa buuda sak a ye n kõ f biig t'a sooge, m sõgen a Daviid yĩnga la Zerizalɛɛm m tẽn-sõnga yĩnga.»

A Salomo bɛɛba

¹⁴ Soaala kõ-la a Salomo bɛ a ye: yɩ-la a Adad, Edom dĩm biiga.

¹⁵ A Daviid da waa n zaba ne Edom n tõog-a. A tãnsoaba a Zoab, n tɩ mum sẽn pa-b zabrẽ n lɛɛg n kood Edom dapa fãa.

¹⁶ A Zoab ne a Israyɛl tõr paa tẽnga kiis a yoobe, n tãag b sẽn waa n kʋ rapa fãa.

¹⁷ A Adad paam n zoe n kẽnga Ezipt ne neb niyns sẽn da gũud a ba zaka. Wakat kãng t'a nan paoodame.

¹⁸ B yii Madiã n wa Parã. B peega Parã neb kẽere la b tɩ noka Ezipt dĩma. Ezipt dĩma kõ-a-la zaka, n dɩlg-a, n kõ-a pʋʋgo.

¹⁹ Ezipt dĩma yõga zood ne a Adad n tol n kõ-a paga, a meng pag a Tafnɛs yao.

²⁰ Dĩm-poaka tão doga a biiga, a Genubat. A Genubat wuba dĩma zakẽ ne Ezipt dĩma kamba.

²¹ A Adad zĩnda Ezipt n wʋm t'a Daviid kiime, la a tãnsoab a Zoab me kiime. Dẽ la a Adad yeel dĩma: «Bas-m tɩ m leb m tẽngẽ.»

²² Tɩ dĩma leok a: «Yaa bõe n paoog f ka, mam seegẽ, tɩ f rat n leb f tẽngẽ?» A yeelame bala: «Ka bũmb ye! Bas-m tɩ m leb bala.»

²³ Soaala le paasa a Salomo bɛ a to, yaa a Elyada biig a Rezõ. Yẽ ra zoeeme n zãag ne a zu-soaba, a Adadezɛr, Soba dĩma.

²⁴ Neb a taab waa n paas-a lame, la yẽ n lebg b kãsma. B sẽn mik t'a Daviid tara b kʋʋbo, b ra zoe n taa Damas n tɩ me n kẽ be, n tol n dɩ naam Damas.

²⁵ A Salomo vɩɩm tɛka a Rezõ yɩ-la a Israyɛl bɛyã. A paasa yel-beed niyns a Adad sẽn wa ne, la a sẽn dɩ naam Siri tɛka, a ka tol n vʋʋs ne a Israyɛl beem-tugb ye.

A Zeroboam zẽkda a zug ne a Salomo

²⁶ A Zeroboam da yaa a Nebat biiga. A tẽnga la Sereda, Efrayim tẽn-peelmẽ. A Zeroboam ma yɩ-la a Seruya. A ma waa n lebga pʋg-kõore tɩ yẽ meng lebg a Salomo sõgne, la b moor waa n yõsga taaba.

²⁷ Ad bũmb ninga sẽn kɩt tɩ b moora yõsg taaba. A Salomo ra kɩtame tɩ b pidsd Milo boka sẽn be wẽnd dooga la na-zaka sʋka la b yẽt lal-gũbra sẽn da wurgi.

²⁸ A Zeroboam da yaa ned sẽn pid ne raoodo la sẽn tar pãnga. A Salomo gesa a sẽn da tʋmd to-to, la a yeel-a lame t'a yɩ Efrayim la Manase tʋʋm-tʋmdba gɛta.

²⁹ Ade, a Zeroboam waa n yii Zerizalɛɛm, tɩ bãngd a Ayiya, Silo rao, seg-a sor zugu. Bãngda ra yera fu paalga, la b ra yaa bãmb b yiib bala.

³⁰ A Ayiya yeega fu paallã n kẽes-a pɛɛl piig la a yiibu.

³¹ A yeela a Zeroboam: «Deeg pɛɛl piiga, tɩ Soaalã, a Israyɛl Wẽnnaam koɛɛg la woto: ‹M na gʋsga naama a Salomo nugẽ la yaa foom la m na n kõ sags piiga.

³² M sã n kees-a soolma a ye, yaa Wẽnd maag a Daviid, m sõgna, la Zerizalɛɛm m sẽn kõ m meng a Israyɛl tẽn-peelmẽ.

³³ Yaa a Salomo ne Israyɛl sẽn bas maama, n tɩ wõgend a Astarte taoore, Sidõ rãmb wẽn-poaka, n tɩ wõgemd a Kemos taoore, Moabitsa wẽnde, n tɩ wõgemd a Milkom taoore, Amonitsa wẽnde; yaa Salomo sẽn ka tũ sor ning m sẽn wilg-a, yaa a sẽn ka maan neer m nifẽ, n ka reeg m noya la m saglse wala a ba, a Daviid.

³⁴ Ka yẽ meng nugẽ la m na n gʋsg naama ye, tɩ m kõ-a-la naam a yõor tɛka, a ba, a Daviid, yĩnga, tɩ maam n yãk yẽ la a reega m noya la m saglse.

³⁵ Yaa a biig nugẽ la m na n deeg naama la m na n kõo foom a Zeroboam buuda sags piig tẽn-peelem.

³⁶ M na n kella sak a ye, a biiga yĩnga, sẽn na yɩ-la t'a Daviid fitil kell n widi m taoor Zerizalɛɛm, tẽng ning m sẽn yãk n na n paalg m ziiri.

³⁷ M na n yãka foom, Zeroboam, tɩ f rɩ naam wa f sẽn date, Israyɛl sags piig zugu.

³⁸ F sã n deeg m sẽn na n togs-f bũmb ning fãa, f sã n tũ sore, n maan sẽn ya neer m nifẽ, n deeg m noor la m saglse wala m sõgna a Daviid sẽn maane, mam me na pa ne foom, la m kãabdame tɩ f yagens na rɩ naam daar fãa, wala a Daviid yagensã. M na kõ foom a Israyɛl sags piigã.

³⁹ Woto m na ning a Daviid yagensã yãnde b beegra yĩnga, la ka wakat buud fãa la b na n tʋk yãndã b zug ye.› »

⁴⁰ A Salomo baoome n na n kʋ a Zeroboam. Woto a zoeeme n kẽng Ezipt dĩm a Sisak nengẽ. A paa be n tãag a Salomo kũum.

⁴¹ A Salomo vɩɩma yɛl a taaba, a tʋʋma, a yam zulungã, fãa pa gʋls a kibara sebrẽ bɩ?

⁴² Yaa yʋʋm pis-naase la a Salomo dɩ Israyɛl tõr naam, Zerizalɛɛm.

⁴³ A kiime. B mun-a-la a ba, a Daviid, tẽngẽ, a biig a Roboam n led a zaoorẽ.