1 Rĩm-dãmbã 10 - SEBR SÕNGO

Saba dĩm-poaka

¹ Saba dĩm-poaka waa n wʋmame tɩ b gomd a Salomo yelle t'a yʋʋra ra yii wʋsgo. Woto a waame n na pẽrs a Salomo ne yelbũna n bãng a bãngra zulum tɛka.

² A waa Zerizalɛɛm ne neb ka tɛka la yʋgma sẽn zɩlg kaam sẽn tar yũ-noodo, sãnem zembala, kug neeba. A sẽn taa a Salomo taoore, a wilg-a-la a sũura sẽn da gãd bũmb ninga.

³ Tao-tao bala a Salomo leoka a sogsga fãa. La bõn-toog ka zĩnd sʋk t'a wilgr nams dĩma ye.

⁴ Saba dĩm-poaka sẽn dɩ a Salomo bãngra kaseto, a sẽn yãend na-yira sẽn me to-to,

⁵ dĩma sẽn dɩt bũmb ningã, a sõgen-kamba roto, b sẽn deegd sãan to-to, b sẽn yer fut niynsi, rãama rãmb sẽn da pʋdgd b rãama to-to, yũ-nood maanda sẽn da kʋʋd Soaala roogẽ wã, a vʋʋsma tulgame.

⁶ A tol n leoka dĩma: «M sẽn zĩnd m tẽngẽ wã n wʋm tɩ b gomd y gom-minim la y bãngra yelle yaa sɩd menga!

⁷ M pa sak n deeg b sẽn togsã tɩ m pa reng n wa la m yãend fãa ne m nin ye. M neeme tɩ b sẽn togsã ka ta pʋɩ-sʋk meng ye. Y bãngrã la y arzɛka yɩɩda m sẽn wʋma.

⁸ Zu-noog pagba la yãmb pagbã, zu-noog rãmb la y sõgen-kamba, sẽn zĩ-b yãmb taoor wakat fãa n kelgd y bãngra koɛɛga.

⁹ Wẽnnaam y Soaala paam pẽgre, bãmb sẽn tʋlg n zaoolg-y Israyɛl naama zaoor zugu. Yaa b sẽn nong a Israyɛl ne nonglem sẽn ka viigdã la b kõ yãmb naam, tɩ bũmb na n kell n pa a soaal nugẽ, tɩ sẽn tara bʋʋm na n kell n pa ne a bʋʋm.»

¹⁰ Saba dĩm-poaka kõo dĩma sãnem gil koabg la pisi, yũ-nood kaam sẽn ka paoode, la kug neeba sẽn yãngd faongo. Saba dĩm-poaka sẽn wa ne yũ-nood kaam niynsã, a Salomo pa le paam sẽn ta rẽnda bada.

¹¹ A Iram koom-kogenda sẽn wa ne Ofir sãnema, waa ne ra neeb ka tɛka la kug neeb me.

¹² Ne ra-neebã a Salomo kitame tɩ b pees-ba n ning wẽnd doogã la a menga roogo, rellgo bɩ tikr yĩnga. B rɩk-b lame me n pees bɛɛla la kola, yɩɩn-yɩɩndba yĩnga. Raad a woto ka le wa la b ka le yãend b buud n ta rũnna.

¹³ Dĩma kõo Saba dĩm-poaka a sẽn tʋlg bũmb ning fãa n paas kũun a taaba wala yẽnda, a Salomo, bala a ye sẽn tõe n yãe n kõ neda. Dĩm-poaka ne a sõgen-kamba leba b tẽngẽ.

A Salomo arzɛka

¹⁴ Yʋʋmd a ye pʋgẽ a Salomo ra tõe n paama sãnem gil sẽn ta neb tusr zɩɩbo.

¹⁵ La b pa sõt b sẽn da yãgsd lɛɛbdba nengẽ la koasdba nengẽ, b pa sõt tẽn-zẽnsa nanamsa sẽn da yaoodã, b pa sõt kombɛɛmba sẽn da saad n deesd tẽnga kamba nengẽ ye.

¹⁶ A Salomo kɩtame tɩ b kud gãndo, gãnd bɛd, bãmb kobs-yi, gãnd sẽn kud ne sãnem, tɩ gãong a ye fãa sãnema sẽn dɩk n bolg-a wã zɩslem taa koom yubl zɩslem.

¹⁷ A kuda gãnd bõonese, bãmb kobs-tã, n bolg-b ne sãnem. Gãong bedr a ye bolgda ne sãnem zɩslem sẽn ta ko-wamde. Dĩma reega gãndã n tedg b Libã googa pʋga.

¹⁸ A Salomo maana naam zaoor sẽn tablg ne wob-yẽna, n lɛɛg n bolg ne sãnem sẽn yɩlge.

¹⁹ Zaoora rellga ra yaa gilg bilfu la a ra tara nus palgr zĩiga. Nusa sẽn palgd zĩig ninga yegende, b naana bõnyẽese, a ye goabga, a ye rɩtgo.

²⁰ Bõnyẽes piig la a yiibu n da be teedsa zutu, a yoob goabga, a yoob rɩtgo. Rĩung ba a ye pʋgẽ b zɩ n maan zaoora a woto buud ye.

²¹ A Salomo sẽn da tar lagd niyns n yũud a rãamã yaa sãnem zãnga. Teed niyns sẽn da rɩgl Libã googa roogẽ wã fãa da yaa sãnem sẽn maneg n yɩlge; wanzurf ka rɩk n tʋm bũmb be ye; a Salomo wakatẽ wã b ra pa get wanzurf wa bõn yõod ye.

²² Dĩma da tara Tarsis koom-kogendo sẽn naag n maand tolbo ne a Iram dẽnna, la yʋʋm a tãab-tãab fãa Tarsis kogenda ra lɛɛgd n wata ne sãnem, wanzurfu, wob-yẽna, wãamse la wãam-kãdse.

²³ A Salomo waa n lʋɩɩ tẽng zug dĩm dãmba fãa taoore ne arzɛka la yamzulum.

²⁴ Tẽnga ween-vɩɩs a naasa fãa da rat n yãend-a lame n paam n kelg bãngr kãseng ning Soaala-Wẽnd sẽn da ning a yamẽ.

²⁵ Ned kam fãa ra wata ne a kũuni: sãnem la wanzurf teedo, futu, zab-teedo, yũ-nood kaam, wiidi, bõn-weese; la yʋʋmd fãa ra yaa boto.

A Salomo bilim-bilm

²⁶ A Salomo baoo bilim-bilm la wed-dʋʋdba. Bilim-bilma ra yaa tusr la kobs-naase, tɩ wed-dʋʋdba ya tus piig la a yiibu. B ra tigm-b-la tãnsoaben-tẽnsẽ, Zerizalɛɛm yegende.

²⁷ A Salomo kɩtame tɩ Zerizalɛɛm pʋgẽ, wanzurf yãeeb ra pa toog n yɩɩd kugr ye. Tẽnga tɩ-bɛd sõor da taa kooma noorẽ yɩlse.

²⁸ A Salomo wiida ra yita tẽns sẽn zãrẽ, al Silisi. A Salomo ra tʋmda neb ne ligdi tɩ b tɩ raad-b be.

²⁹ Ezipt rãmba da koosda bilim-bilm a ye fãa wakɩ koeems kobs-yoobe, tɩ weef ya koabg la pis-nu. Yẽ nebã n da wat ne-ba, n yãkd n koosd ne Ititse la Aramsa dĩm dãmba.