1 Pɩyɛɛr 5 - SEBR SÕNGO

Kãsem-dãmb saglgo

¹ Ad-m koɛɛg marsã ne karen-saam-dãmba, sẽn be tõnd sʋka; mam meng yaa kãsem-soab wa bãmba la m yɩɩ Krista namsga fãa kaset soaba dẽ la m mi tɩ m na n paama bãmb pẽgre, a pukra raare.

² M kotame tɩ y yɩ bãgr ninga Wẽnd sẽn gũnug yãmba pe-kɩɩmba. Gu-y piisã la ra yɩ rok-m-zug tʋʋmd ye, a yɩ yamleoog tʋʋmde wa Wẽnd sẽn date. Da yɩ rolb yooda yĩng ye, a yɩ taab sõngr yamleoog bala.

³ Da bao-y n dɩ naam neb zug ye. Bao-y bala n yɩ taoor dãmba sẽn wilgd piisa so-sõngo.

⁴ Wotoone, Pe-kɩɩm sõma naaba pukr daare y na reeg y pẽgr sẽn kõn sɛ pugla.

Kristneb tʋʋmde

⁵ Woto me yãmba, kom-bɩɩba, reeg-y kãsem-dãmba goama; yɩ-y sulg-m-meng rãmba y taab taoore. Ad-y Wẽnd mongda wilg-m-meng rãmba n kõt yam-sulgr dãmba.

⁶ Dɩlla bɩ y sulg y mens Wẽnnaam taoore tɩ b tõog n zẽk yãmba, b raara sã n ta.

⁷ Bas-y y zu-loeesa fãa ne bãmba tɩ bãmb meng n na n ges y yelle.

⁸ Yɩ-y neb sẽn tõe b mense la maan-y gũusgu tɩ yãmb bɛyã, Sʋtãana, gilgdame n yãbd wa gɩgemde n baood a sẽn na n dɩ a soaba.

⁹ Tõdg-y Sʋtãana zãnga la y tall y tẽeb kẽnkẽ, n mi tɩ yaa namsg a woto buudu bala la saam-biisa namsd zĩig zãnga.

¹⁰ Y sã n paam n nams bilfu, ad-y Wẽnd sẽn ya kũuna fãa kõatã la bãmb n bool yãmb tɩ y wa rɩ vɩɩm sẽn kõn sɛ yõodo ne Krista a Zezi, Bãmb meng b toore n na n le yals yãmb y nao zutu la b kõ-y keelem la pãnga tɩ b mak y mimsg n konge.

¹¹ B soog pãng la ziir daar fãa. Ami!

Yaoolem pʋʋsgo

¹² M kɩtame t'a Silvẽ gʋls-y sebr bil kãngã. Yẽ la m get wala m saam-biiga sẽn ka tol n bak ne m ye. M sagend-y lame la m wilgd-y lame tɩ kũun ning y sẽn paama, yẽ la Wẽnd kũun menga la tall-y kũun a woto buud neere.

¹³ Babilon Tigenga Wẽnd sẽn tũusi wala b sẽn tũus yãmbã tɩ b pʋʋs yãmba.

¹⁴ Pʋʋs-y taab ne saam-biis sẽn nong taab pʋʋsgo. Laafi zĩnd ne y fãa sẽn vɩ Krista maasmẽ!