1 Pɩyɛɛr 2 - SEBR SÕNGO

Bɩ y vɩɩm yɩ pʋ-peelem vɩɩm

¹ Woob-y pʋ-toog buud fãa ne zirẽ-beedo, zãmbo, sũ-kiiri, la tẽn-kãnem.

² Tʋlg-y Wẽnd Gomdã wala kom-peelse sẽn tʋl bĩs-naare sẽn ka pul koom; yẽ n tõe n bɩɩs y yaoko tɩ y tʋm y fãagra tʋʋma.

³ La rẽ me yaa y sã n deng n lemba Soaala kũuna n mi tɩ bãmb n noom n yɩɩd fãa.

Maan-kʋʋr paalga

⁴ Bɩ y yẽrg n kolg bãmba tɩ bãmb la kugr vɩɩga ninsaalb sẽn daag n bas kɛɛnga tɩ Wẽnd yaool n yãk-a wa kugr sẽn tar neerem.

⁵ Yãmb me, yɩɩ-y wa kug vɩɩse la sak-y tɩ b rɩk yãmb n me Wẽnnaam doogo, tɩ b sɩng maan-kʋʋr sõng tʋʋmd a pʋgẽ n kõt Wẽnd maand sẽn ka tẽng zug rẽnna, la sẽn tat b yam, a Zezi Krista maasem yĩnga.

⁶ Ad-b sẽn gʋlse: Yaa Siõ tãng zug la m vigĩnd kuga ma, kugr m sẽn tũusi, kugr sẽn be neere la ned ninga fãa sẽn na n teeg kugr kãnga kõn yãe yãnd ye.

⁷ Yãmb tẽedba yĩnga a na wa ne y pẽgre; sã ya kɩɩsdbã, b bãng tɩ kugr ninga metba sẽn bas kɛɛngã, yẽ n lebg kuga ma,

⁸ a lebga lakr kugri, lak-n-lʋɩ pĩiga. Kɩɩsdba lakd-a lame tɩ b pa tẽ Gomda ye, la lakra la bãmb me pʋɩɩre.

⁹ La yãmba, yãmb yaa buud Wẽnd sẽn welg tore, buud sẽn paam maan-kʋʋr naam, buud sõngo Wẽnd sẽn tũus n na n kils Ned ninga sẽn yisa yãmb likĩ n kẽes-y vẽenem sẽn ka taar pʋgẽ.

¹⁰ Y buuda da ka buud ye la ad-y y sen lebg Wẽnd buud sõng marsã! Yãmb da ka paamd tɩ b kũm y nimbãaneg ye la ad-b sẽn zoe y nimbãanega marsã.

Kristneb tʋʋmd pakre ne bu-zẽmba

¹¹ M sẽn nong b rãmb wa fãa fãa, maam n yõkd y sɛɛga, y sẽn ya sãamba la so-toagdba yĩnga, tɩ y zãag y mens ne y yĩnga tʋls wẽns sẽn sogd maoor ne y sɩɩgã.

¹² Tall-y y mens neer bu-zẽmba sʋka tɩ ba b sã n wɩt yãmb wa nin-wẽnse, bɩ b yãend y tʋʋm-sõma. Rẽ n na n sõng ba tɩ b wa pẽg Wẽnnaam b waoonga raare.

Deeg-y tẽnga soaalba noore

¹³ Soaala yĩnga bɩ y sak tẽng zug naama ne a siglsã: sak-y dĩma sẽn ya fãa soaala,

¹⁴ sak-y b kombɛɛmba; b tʋʋmd yaa b sɩbg sẽn maand-b wẽnga la b pẽg sẽn maand-b neere.

¹⁵ Ad-y yaa Wẽnd n dat tɩ y maan neer woto, n pag gãeemsa la zɩtba noore.

¹⁶ Woto wã tʋm-y burkĩndlem tʋʋma. Da lʋɩɩs-y burkĩndlema taoore n dɩk menesg sor ye, yɩɩ-y Wẽnd tũudb bala.

¹⁷ Waoog-y neb fãa, nong-y y saam-biisi, zoe-y Wẽnde, la waoog-y dĩma.

Deeg-y y zu-soaben-dãmb noore

¹⁸ Yãmba, zak kamba, sak-y y zu-soaben-dãmb ne rabeem menga, b tar bʋgsem, b yaa naana bɩ toose.

¹⁹ Ad-y yaa Wẽnd kũun la f paamyã, f sã n sak Wẽnd waoogr yĩnga n nams f sẽn ka tog n namse.

²⁰ Bõe n sek pẽgre, f sã deeg toog sẽn ya f beegr sɩbgre? Sã n yaa y tʋʋm sõma yĩnga la y sakd namsgo, ad-y rẽ n be yõod Wẽnnaam nengẽ.

²¹ Mik b bool yãmb tɩ y wa namse; Krista me namsa y yĩnga n kõ y togs-n-taar n dat tɩ y pʋg bãmba.

²² La bãmb yaool n zɩ n maan wẽng ye — zirẽ-beed zɩ n yi b noorẽ abada.

²³ B tʋʋs-b lame la b ka tʋʋs n lebs ye, b yãee toogo la b basa rẽ fãa ne ned ninga sẽn kaooda bʋʋd sɩda.

²⁴ Pika zugu b meng tʋka d yel-wẽna, sẽn na n yɩlẽ tɩ tõnd me wa lebg bõn-kɩɩmse ne yel-wẽnd maanego la bõn-vɩɩse ne sõmblem baoobo. Bãmb sãmpogrã n wa ne yãmb sãoogre.

²⁵ Yãmb da yaa wa pe-yãans sẽn kẽ weoogo la marsã y le leba y pe-kɩɩma la y sɩɩsa gũud nengẽ.