1 Kibayã 9 - SEBR SÕNGO

¹ A Israyɛl kamba fãa yʋy gʋlsame, ned fãa a ba roogẽ la b gʋls-b-la a Israyɛl dĩm dãmba sebra pʋgẽ. B ra waa n wʋka Zɩɩda rãmb n kẽng Babilon n tɩ kẽes-b yembdo, Soaala-Wẽnd tũudma sẽn pa yɩ neer yĩnga.

Zerizalɛɛm kẽedba

² Sẽn lɛɛg-b n wa b tẽnsẽ la b soolmẽ pipi, yɩɩ nin-zaalse n paas maan-kʋʋdba, ne Levit dãmba la sẽn da tʋmd-b wẽnd doogẽ la b get a yellã.

³ Sẽn waa n kẽ-b Zerizalɛɛma yɩ-la a Zɩɩda, a Bẽnzame la Efrayim ne Manase rãmba.

⁴ Zɩɩda rãmba yɩ-la a Utayi, a Amiyud biiga, tɩ yẽ meng yaa a Omri biiga, a Imri yagenga, a Bani yagen-tʋbra-kẽega, a Perɛs roogẽ.

⁵ Sã n yaa a Sela roogẽ, yɩ-la a bi-kẽeng a Asaya ne a kamba.

⁶ A Zera roogẽ yɩ-la a Yeuwɛl. Zɩɩda rãmb sẽn da kẽed Zerizalɛɛm yɩɩ bãmb kobs-yoobe la pis-wɛ.

⁷ Bẽnzame rãmba yɩ-la a Salu, a Mesulam biiga, a Odaviya yagenga la a Asenuwa yagen-tʋbra-kẽega.

⁸ Le paasa a Ibneya, a Yeroam biiga. Le paasa a Ela, a Uzi biiga la a Mikri yagenga. Le paasa Mesulam a to, a Sefatiya biiga, a Reuwɛl yagena la a Ibniya yagen-tʋbra-kẽega.

⁹ Bãmb fãa da yaa b buuda sags kãsem-dãmba. Bẽnzame rãmb sẽn da kẽed Zerizalɛɛm da yaa kobs-wɛ la pis-nu la a yoobe.

¹⁰ Maan-kʋʋdba roogẽ da yaa a Yedaya, a Zoyarib, a Yakẽ,

¹¹ ne a Azariya, bãmb yaab rãmb la a Ilkiya, a Mesulam, a Sadok, a Merayot, la a Ayitub. Sẽn get wẽnd dooga yell fãa da roga a zugu.

¹² Le paasa a Adaya; yẽ yaab rãmb la a Yeroam, a Pasewur la a Malkiya. Le paasa a Masayi, yẽ yaab rãmb la a Adiyɛl a Yazera, a Mesulam, a Mesilemit, a Imɛr.

¹³ Maan-kʋʋdb a taaba sẽn paas zagsa kãsem-dãmba, b gill fãa ra yaa nin-tɩɩse, bãmb tusr la kobs-yopoe la pisoobe n da get wẽnd dooga yelle.

¹⁴ Levitsa roogẽ yɩ-la a Semariya, yẽ yaab rãmba la a Asub, a Azrikam a Asabiya, a Merari roogẽ.

¹⁵ Le paasa a Basbakar, a Ɛres, a Galal, a Mataniya, bãmb yaab rãmba la a Mika, a Zikri, a Asaf.

¹⁶ Le paasa a Obadi yẽ yaab rãmb la a Semaya, a Galal, a Yedutun, la a Berekiya, a Asa biiga, la a Elkana yagenga; a Elkana ra kẽeda Neftoa tẽn-toosẽ.

¹⁷ Dagno-gũudba roogẽ da yaa a Salum, b kãsma, n paas a a Akub, a Talmo, la a Ayiman.

¹⁸ Yaa bãmb yagensã n ket n tʋmd ne rũnna. Bãmb n so yaang noorã, dĩma noorã gũudem. Bãmb yaab rãmba sẽn da gũud noor ninga ra yaa Levitsa sika noore.

¹⁹ Yaa bãmb yaab rãmba a Salum, a Kore biiga, a Ebiyasaf yagenga, a Kore yagen-tʋbra-kẽega la a Kore rooga neba n da gũud sɛka rooga noore, wala b yaab rãmba sẽn da maand Soaala buuda sikẽ.

²⁰ A Pinas, a Elazar biiga, n da yɩ bãmb naab pĩnda, Soaala sẽn da be ne a yĩnga.

²¹ A Meselemiya biig a Zakari me ra yɩɩ dagno-gũud sɛka rooga noorẽ.

²² B sẽn da tũus b rãmba tɩ b ya dagno-gũudba, b fãa da yaa kobs-yi la piig la a yiibu, b ra sõd-b-la b tẽnsẽ. Yaa a Daviid la bãngd a Samwɛl n da zĩndig bãmb b tʋʋmda zugu daar fãa yĩnga; B pʋg sẽn da peel ne bãmb yĩnga.

²³ Bãmb ne b yagensã n tong taaba n soog Wẽnd waoogr dooga gũudem.

²⁴ Wẽnd dooga noya, yaanga, nin-taoore, goabga, rɩtgo, noor fãa ra tara a gũudba.

²⁵ Gũudb kẽer da be b tẽnsẽ n wat wakat-wakato n sõngd ne gũubã, dasem a yopoe pʋgẽ.

²⁶ Dagno-gũudba nanams a naasã, bãmb yẽ da be b tʋʋmd zĩigẽ n ka viigdẽ ye. La Levitsa la b ra gũnug rotã la wẽnd dooga arzɛgse.

²⁷ Yʋngo b ra pa gãe n zãr ne wẽnd dooga ye. Bãmb n so a gũubu la a noya pakre, beoog sã n vẽege.

²⁸ Bãmb sʋka b ra yãka kẽere tɩ b gũud Wẽnnaam waoogre teedã. B sõt-b-la b yiisg wakato n le sõd-b b kẽesg wakato.

²⁹ B ra yãka kẽere me tɩ b pekd wẽnd dooga lagd sõma wã. Kẽer getame tɩ bũmb da paoog ye, wala zoma, rãama, kaama, wisdã la yũ-noog kaama.

³⁰ La sã n da ya yũ-nood kaama seglg la b kalengo, yaa maan-kʋʋdba n da get rẽnna.

³¹ A Matitiya, Levit a yembre, a Salum bi-kẽenga, a Kore roogẽ, n da so bura wẽebo, bur ning sẽn na n dɩk n kõ Wẽndã.

³² B saam-biisa kẽere, a Keyat yagense, n da wẽed bur sõma wã b sẽn da kõt Wẽnd vʋʋsg raar fãa wã.

³³ Yɩɩn-yɩɩndba sẽn da ya-b zags kãsem-dãmba n da so Soaala-Wẽnd balengã ne yɩɩlã, bãmb da kẽeda b meng rotẽ. B ra ka tʋmd tʋʋmd a to n paas ye. B ra ka tar vʋʋsg yʋng woo tɩ wĩntoogo.

³⁴ Levitsa nanamse sẽn sõd n gʋls sebrẽ, ned kamb fãa ne a roog-roog la woto. Zerizalɛɛm la b ra kẽeda.

A Sol roogo

³⁵ A Gabaõ ba, a Yeyiyɛl da kẽeda Gabaõ ne a paga a Maaka,

³⁶ ne a Abdõ, a bi-kẽenga, ne a yaopã: a Sur, a Kis, a Baal, a Nɛr, a Nadab,

³⁷ a Gedor, a Ayiyo, a Zakari, la a Miklot.

³⁸ A Miklot roga a Simam. Bãmb me da naag n kẽeda Zerizalɛɛm wa b saam-biisi la b rota ra tota taaba.

³⁹ A Nɛr roga a Kis, a Kis roga a Sol, a Sol roga a Zonatã, a Malkisuwa, a Abinadab, a Isbaal.

⁴⁰ A Zonatã biiga: a Meribaal, a Meribaal roga a Mika.

⁴¹ A Mika kamba: a Pitõ, a Melɛk, a Tarea.

⁴² A Aaz roga a Yara, a Yara roga a Alemɛt, a Alemɛt roga a Azmavɛt, a Azmavɛt roga a Zimri. A Zimri roga a Mosa,

⁴³ A Mosa roga a Binea, a Binea roga a Refaya, a Refaya roga a Elasa, a Elasa roga a Asɛl.

⁴⁴ A Asɛl doga kom-dibli a yoobe. B yʋya la woto: a Azrikam, a Bokru, a Ismayɛl, a Seariya, a Obadiya, a Ana: bãmb la a Asɛl kamba.