1 Kibayã 5 - SEBR SÕNGO

A Rubẽ roogo

¹ A Rubẽ n da yaa a Zakoob bi-kẽenga. La a sẽn wa n dẽgem a ba gãaga, a bi-kẽemdã rɩk n kõ-la a Zozɛf. Yẽ me ra yaa a Zakoob biiga. Woto a Rubẽ buud pa le soog kãseng ye.

² A Zɩɩda yɩɩga a ba biisa fãa, tɩ yẽ yageng a ye n waa n lebg Israyɛl dĩma. La a Zozɛf n baas n soog bi-kẽemdã ne a yoodã.

³ A Rubẽ, a Israyɛl bi-kẽenga kamba: a Enok, a Pallu, a Esrõ la a Karmi.

⁴ A Zowɛl kamba: a Semaya, a Gog, a Simeyi,

⁵ a Mika, a Reaya, a Baal,

⁶ a Beera, yẽ la Asʋr dĩma a Teglat-Falasar yõk n tall n loog yembdo, yẽ la a Rubẽ yagensa kãsma.

⁷ Ad-a ba-biisi sẽn da ya sags kãsem-dãmba tɩ b yʋʋr gʋls sõadga sebr zugu. Pipi, a Yeyiyɛl, sẽn pʋgda, a Zakari;

⁸ sẽn pʋgd yɛsa, a Bela, a Azaz biiga, a Sema yagenga, a Zowɛl yagen-tʋbra-kẽega. A Rubẽ yagensa ra kẽeda tẽns niyns sẽn be Aroɛr la Baal-Meõ sʋka. Aroɛr bee nug rɩtgo, tɩ Nebo la Baal Meõ be nug goabga.

⁹ Yaangã, b ra tɩ kẽeda we-raaog ning sẽn da welgd bãmb tẽn-peelma ne Efrat, Babilon kʋɩlgã. B rũmsa ra yaa wʋsgo Galaad tẽnga.

¹⁰ Dĩm a Sol zamaanẽ b yiisa tãpo n zab ne Agritsã n tõog-ba, n dees b roto n zĩndi, Galaad yaanga.

A Gad roogo

¹¹ A Gad yagens da zĩi Rubẽ rãmba yegende, Bazã tẽng n tɩ n ta Salka, yaanga.

¹² A Zowɛl yagensã n da ya pipi, t'a Safã pʋgda, t'a Yanayi la a Safat pʋgda.

¹³ Sẽn da kẽed-b be yɛsa n ya yẽgr a ye yaa nin-bãmba: a Mikayɛl, a Mesulam, a Seva, a Zorayi, a Yakã, a Ziya, la a Ebɛr: bãmb b yopoe.

¹⁴ B fãa ra yaa a Abiayil kamba: a Uri yagense, n paas a Yaroa, a Galaad, a Mikayɛl, a Yesiayi, a Yado, a Buz yagense.

¹⁵ A Ayi, a Abdiyɛl biiga, a Guni yagenga n dag n ya b rooga kãsma.

¹⁶ B rag n tilga b yiya, Galaad, Bazã ne b tẽn-kogse n paas Sarõ, zĩig ning fãa b sẽn tõe n wãbneg rũnga.

¹⁷ Bãmb fãa yʋya da bee sõadga sebrẽ, Zɩɩda dĩma a Zotam la Israyɛl dĩma a Zeroboam zamaanẽ.

¹⁸ A Rubẽ yagense, a Gad la a Manase bogre, da tara zab-zabdba sẽn pid ne zabr sũuri, sẽn tar gãndo la sʋʋse, la tãbdo, bãmb tus pis-naas la a naase la kobs-yopoe la pisoobe.

¹⁹ B zaba ne Agritse n paas a Yetur, a Nafis, la a Nodab yagense.

²⁰ Bãmb kosa Soaala-Wẽnd sõngre b zabra wakato. B sẽn da teeg Wẽnd yĩnga, b deega b kosgo la b sõng-b lame. Woto b tõoga Agritsã la sẽn da kẽed-b bãmb tãpẽ.

²¹ B zɛɛ b rũmsã, yʋgma tus pis-nu, piis tus kobs-yi la pis-nu, bõn-yãans tus a yi, la neb tus koabga.

²² Bɛɛba ra kii ka tɛka. Soaala-Wẽnd n zab n sõng Rubẽ, Gad la Manase yagensã. Woto b reega Agritsa tẽns n kẽ n tãag yembda kẽnd wakato.

A Manase bogre

²³ A Manase bogra da waa n kẽe Bazã ne Ermo sʋka. Bazã bee nug rɩtgo tɩ Baal-Ermo, Senir la Ermo tãnga be nug goabga.

²⁴ Ad b rota nanamse: A Efɛr, a Iseyi, a Eliyɛl, a Azriyɛl, a Yirmea, a Odaviya, a Yadiyɛl. Bãmb da yaa zabr gãndaado, b yʋʋr yiime, b da yaa b buuda kãsem-dãmba.

²⁵ La bãmb beega b saam dãmba Wẽnnaam; wa pʋg-yoodr sẽn bas a sɩda n baood dapa, bãmb bao bu-zẽna wẽn-naandse, bu-zẽmb niyns Naaba-Wẽnd sẽn sãam a Israyɛl kamba taoore.

²⁶ A Israyɛl Wẽnnaam pirsa a Ypll ne a Teglat-Falasar, Asʋr dĩm dãmba. B wʋk-b lame n tɩ kẽes yembdo, b wʋka a Rubẽ, a Gad yagense, ne a Manase bogre, b peeg-b lame n tɩ bas Ala, Abor, Ara la Gozã kʋɩlga noore. B keta be ne rũnna.

A Levi roogo

²⁷ A Levi kamba: a Gersõ, a Keyat, a Merari,

²⁸ A Keyat kamba: a Aram, a Isar, a Ebrõ la a Uziyɛl.

²⁹ A Amram kamba; a Aarõ, a Moyiiz, a Miriyam. A Aarõ kamba: a Nadab, la a Abiyu, a Elazar la Itamar.

³⁰ A Elazar doga a Pinas; a Pinas roga a Abisuwa,

³¹ a Abisuwa roga a Buki, a Buki roga a Uzi, a Uzi roga a Zeraya,

³² a Zeraya roga a Merayot;

³³ a Merayot roga a Amariya; a Amariya roga a Ayitub.

³⁴ A Ayitub roga a Sadok, a Sadok roga a Ayimaas,

³⁵ a Ayimaas roga a Azariya, a Azariya roga a Zoana;

³⁶ a Zoana roga a Azariya a yiib soaba; yaa yẽ n tʋm maan-kʋʋd tʋʋmde, Naaba-Wẽnd yĩnga, a Salomo sẽn me roog ninga pʋga, Zerizalɛɛm.

³⁷ A Azariya roga a Amariya, a Amariya roga a Ayitub

³⁸ a Ayitub roga a Sadok, a Sadok roga a Salum,

³⁹ a Salum roga a Ilkiya, a Ilkiya roga a Azariya.

⁴⁰ A Azariya roga a Seraya, a Seraya roga a Zozadak.

⁴¹ A Zosadak looga wakat ninga Naaba-Wẽnd sẽn tũ a Nabikodonozor nugu n wʋk a Zɩɩda ne Zerizalɛɛm dãmba n kẽng yembdo.