1 Kibayã 4 - SEBR SÕNGO

Zɩɩda yagens sebr a to

¹ A Zɩɩda kamba: a Perɛs, a Esrõ, a Karmi, a Ur, la a Sobal.

² A Reaya, a Sobal biiga, doga a Yaat, la a Yaat roga a Awumayi ne a Laad. Soreatitsa yagens la bãmba.

³ A Ur, a Efrata bi-kẽenga la Bɛtelyɛɛm metã, roga a Etam, a Zizreyɛl, a Yisma, a Yidbas; bãmb tão la a Aslelponi.

⁴ Kamb a taab n paase: a Penuwɛl, Gedor meta, a Ezɛr, Usa meta.

⁵ A Asewur n me Tekoa; a da tara pagb a yi: a Ela la a Naara.

⁶ A Naara kamba: a Awuzam, a Efɛr, a Temni, a Aasetari.

⁷ A Ela kamb yɩ-la a tãabo: a Serɛt, a Soar la a Etna.

⁸ A Kos roga a Anub la a Sobeba n paas a Aareyɛl yagensa ba a Arum.

⁹ Neba ra waoogda a Yabɛs n yɩɩd a saam-biisã, a ma pʋda a yʋʋra Yabɛs, t'a namsa wʋsg a rogma wakato.

¹⁰ A pʋʋsa Soaala woto: «Israyɛl Wẽnnaam, pids-y maam ne y barka, paas-y m paoongo, tẽeg-y y nug n gũ-ma, zãag-y-m ne yel-beedo la pɛta!» Soaala kõ-a-la a sẽn kose.

A Kelub

¹¹ A Kelub, a Suwa ba-biiga, roga a Meyir sẽn yɩ a Estõ ba;

¹² A Estõ doga a Bɛt-Rafa, a Pasea, a Teyina, a Ir-Naas ba, Bãmb yagense n waa n kẽ Reka.

¹³ A Kenaz kamba: a Otniyɛl la a Seraya. A Otniyɛl kamba: a Atat la a Meonotayi.

¹⁴ A Meonotayi roga a Ofra, a Seraya doga a Zoab. Yẽ la nus-tʋʋm-mitba yaaba, Ge-Arasim ba. B yaa nus tʋʋm-tʋmdba. B bãg-faaga ra boondame tɩ nus-tʋʋm-tʋmdb bãg-faaga.

¹⁵ A Yefume biiga a Kalɛb kamba: a Iru, a Ela, a Naam. A Ela biiga: a Kenaz.

¹⁶ A Yaalelɛl kamba: a Zɩf, a Zifa, a Tiriya la a Asarɛl.

¹⁷ A Ezra kamba: a Yetɛr, a Merɛd, a Efɛr, a Yalõ. A Merɛd kẽe kãadem ne Ezipt rĩm bi-pugla sẽn boond tɩ Bita la a Bita kõ-a-la a Miriyam, a Samayi la a Yisba, Estemoa meta.

¹⁸ A Merɛd da kẽe kãadem ne Zɩɩda bi-pugla la a doga a Yerɛd, Gedor meta, n dog a Ebɛr, Soko meta, n dog a Yekutiyɛl, Zanoa meta.

¹⁹ A Odiya kẽe kãadem ne a Naam tão. Bãmb kamba la Garmitsa sẽn kẽed Keyila. Le paasa Maakatitse sẽn kẽed Estemoa.

²⁰ A Simo kamba: a Amno, a Rinna, a Ben Ana, la a Tilõ. A Yiseyi kamba: a Zoɛt, la a Ben-Zowɛt.

A Sela roogo

²¹ A Zɩɩda biiga a Sela kamba; a Ɛr, Leka meta, a Laada, Maresa meta, n paas nus tʋʋm-mitb niyns sẽn da wʋgd-b gĩs bãanes sʋndo, Bɛt-Asbea.

²² A Sela yagense le yɩ-la a Zokim, n paas neb niyns sẽn da kẽed-b Kozeba. A yagensa le yɩ-la a, Zoyas la a Saraf sẽn kẽng Moab soolmẽ n tɩ yi kãadem n lebg n wa Leyɛm; la rẽ fãa daar zãagame.

²³ Bãmb da yaa yagdba, n da kẽed Netayim la Gedera; b ra bee be n pẽ dĩma n tʋmd a tʋʋma.

A Simeõ yagense

²⁴ A Simeõ kamba: a Nemuwɛl, a Yamin, a Yarib, a Zera, a Sol.

²⁵ A Sol sẽn dog kamb niynsi: a Salum, a Mibsam, a Misma.

²⁶ A Misma kamba: a Amuwɛl, a Zakur, a Simeyi.

²⁷ A Simeyi roga kom-dibli piig la a yoobe la kom-pugli a yoobe, la a ba-biisa pa rog kamb wʋsg ye, woto bãmb sags pa yalg wala a Zɩɩda rẽnd ye.

²⁸ B da kẽeda Beerseba, Molada, Asar-Suwal,

²⁹ Bila, Esem, Tolad,

³⁰ Betuwɛl, Orma, Siklag,

³¹ Bɛt-Markabot, Asar-Suzim, Bɛt-Bireyi, Saarayim. Woto n yɩ bãmb tẽn-bɛda n ta a Daviid naam.

³² La b tẽn-bõonego n paase, Etam, Ayin, Rimon, Token, Asã: tẽns a nu,

³³ n paas tẽn-bõoneg sẽn da gũbg b tẽn-bɛdã al n tɩ tãag Baalat. B sẽn zĩnd tẽns niyns la woto. La woto me n be b sõadga sebrẽ.

³⁴ Sẽn yɩ-b a Simeõ buud sags nanamse; A Mesobab, a Yamlɛk, a Yosa, a Amasiya kamba.

³⁵ A Zowɛl, a Yewu, a Zosibiya kamba, t'a Zosibiya meng yaa a Seraya biiga la a Asiyɛl yagenga.

³⁶ A Eliyoenayi, a Yakoba, a Yesoaya, a Asaya, a Adiyɛl, a Yesimiyɛl, a Benaya,

³⁷ a Ziza, a Sifeyi biiga, a Alõ yagenga, a Yedaya yagen-tʋbra-kẽega, a Simri biiga, a Semaya biiga.

³⁸ B sẽn togs b rãmb yʋya, yɩɩ b buuda sags nanamse, bãmb buuda fɩɩgame tɩ looge.

³⁹ B kẽna al Gerar noorẽ, n tɩ ta tẽn-nabrã sẽn be yaanga, n baood yamd maasa b rũms yĩnga.

⁴⁰ La b tuka yamd maasa, yamd sõma, ne tẽng sẽn yalem wʋsgo, tɩ fãa ya laafi la bãane; sẽn da be-b tẽng kãng pĩnda da yaa a Kam yagense.

⁴¹ B b sẽn gʋls b rãmb yʋʋr mars-marsã, bãmb n wa Zɩɩda dĩma a Ezekiyas zamaanẽ, b kʋʋ tẽnga rãmba fãa sẽn da be be, la b kãab-b kãab beed sẽn ket n yɛs ne rũnna, la b reesa b zĩisã n zĩndi, tɩ yamd maas da bee beene, b rũmsã yĩnga.

⁴² Neb kẽere, bãmb sʋka, a Simeõ yagense, kẽnga Seyir tẽnsã sẽnẽ. Yaa neb kobs-nu, ne b taoor dãmba: a Pelatiya, a Neariya, a Refaya, a Uziyɛl, a Iseyi kamba.

⁴³ Bãmb luba a Amalɛk yagensã sẽn keesã, n deeg zĩig n zĩnd be n ta rũnna.