1 Kibayã 29 - SEBR SÕNGO

Kũuni, wẽnd dooga yĩnga

¹ Dĩm a Daviid yeela zãma wã: «M biiga Salomo bala la Naaba-Wẽnd tũus b toore. La ade, a yʋʋma sõor nan paooda la a pãnga, ka sek ye, tɩ tʋʋmda bedmame. Ka ninsaal yĩng la rooga na n me ye, yaa Naaba-Wẽnd yĩnga.

² M segla m Soaala la m Wẽnnaama roog ne m pãng fãa. Sẽn tog n yɩ sãnem fãa na n dõoga ne sãnem. Sẽn tog n yɩ wanzurf fãa, na n dõoga ne wanzurfu. Sẽn tog n kud ne kut fãa tog n kuda ne kutu. Sẽn tog n dõog ne zũudu na n dõoga ne zũudu. Sẽn tog n maan ne raoog fãa na n yɩɩ raoogo. Kugr sẽn tog n ning zĩig ninga b na ning-a: kug sẽn yãgd b toore, kug-neeba, kug gʋlem-gʋlem, kug sẽn mobgd ne sãnem, t'a lebg faong bũmbu, kug sẽn peel wa goore.

³ Sẽn be me, m sẽn dat m Soaala roog ne m sũur fãa wã, m le paasda m sẽn tare tɩ ya m meng rẽnna, sãnem bɩ wanzurfu; m kõta rẽ fãa ne yamleoogo, m Soaala roog yĩnga.

⁴ M sẽn kɩt la woto: yaa sãnem sẽn sek neb tus a nu zɩɩbo sãnem sẽn yi Ofir. Yaa wanzurf sẽn sek neb tus piig la a yiib zɩɩbo, wanzurf sẽn ka lagem ne rẽko; wanzurf kãng la b na n maneg n tablg wẽnd dooga lalse.

⁵ La yãmb sʋka, ãnda n na n sak rũnna n dɩk n kõ wẽnd dooga yĩnga, a sãnem, a wanzurfu? Ãnda n dat n sõng tʋʋm-tʋmdba ne b beoog-beoog fãa yaoodo?»

⁶ Ad Israyɛl buuda kãsem-dãmba, sagsa rãmba, tusr bɩ koabg tãnsoaben-dãmba, sẽn get-b dĩma tʋʋma sẽn kɩs ne yamleoogo Naaba-Wẽnd dooga yĩnga.

⁷ Ad kũuna sẽn yɩ a soaba: Sãnema zɩslem: neb tus a nii la kobs-nu zɩɩbo. N le paas sãnem ligd dɩtem bãmb wakɩ koeems tus piiga. Wanzurfa zɩslem: neb tus pis-tã zɩɩbo. Zũuda zɩslem: neb tus pisoob zɩɩbo. Kuta zɩslem: neb tus koabg la pis-nu zɩɩbo.

⁸ Rẽ fãa waa n paasa kug neeba neb kẽer sẽn tall n wa wã la b rɩka rẽ fãa n kɩs a Gersõ yagenga a Yeyiyɛl, wẽnd dooga yĩnga.

⁹ Neba sũur yɩɩ noogo b sẽn maana yĩnga. Yɩɩ ne b sũur zãnga, la neba tʋlg n maan bũmb, Naaba-Wẽnd yĩnga. Dĩma a Daviid me sũur yɩɩ noog wʋsgo.

¹⁰ Woto wã dĩma pẽga Naaba-Wẽnde b fãa taoore. Ad-a sẽn yeele: «Israyɛl Wẽnde, sẽn ya tõnd Wẽnda, soog-y pẽgre zamaan buud fãa!

¹¹ Yãmb n so kãsengo, n so neerem, n so naam, n so ziiri. Yãmb n so sẽn be yĩngri la tẽng zug fãa. Yãmba, Naaba-Wẽnde, n so naam. Yãmb zaoor vigla al yĩngr-yĩngri.

¹² Arzɛk la ziir yita yãmb nengẽ. Yãmb la bũmb fãa Soaala, y nug zãada pãng la tõogo. Yãmb nug n zẽkd ninsaala, yãmb nug n vigind naam.

¹³ Marsã, Soaala, d pʋʋsda yamb barka, d balemda y yʋʋr, t'a sãda zĩis fãa.

¹⁴ Maam la a bõe, la m neba pãng bela b yɛ tɩ d kãab-y wala d sẽn kãabã? Fãa yita yãmb nengẽ, la yaa yãmb nugẽ la d deeg d sẽn lɛɛg n kõt yãmbã.

¹⁵ Tõndo, wala d ba rãmba, tõnd yɛsa yãmb taoore wa sãamba. D tẽng zug vɩɩma loogda wala sulunsuku, la d ka saagd t'a na gɩmb n ka loog ye.

¹⁶ Naaba-Wẽnde, d Wẽnnaam, d sẽn sam bũmb niyns fãa y rooga meeb yĩngã la y waoogr yĩnga yita y nengẽ la yãmb n so fãa.

¹⁷ Soaala-Wẽnde, m tara kaseto tɩ y mii sẽn be y kamba sũurẽ la y sẽn pẽgd yaa pʋ-peelem. Y yãeeme tɩ yaa ne pʋ-peelem la m kãab y rẽ fãa. M yãee ne sũ-noogo, y buuda neba sẽn yas y taoor dũnna la b sẽn kãab-y bũmb ningã.

¹⁸ Naaba-Wẽnd, d ba a Abraam, a Izaak la a Zakoob Wẽnnaam, deeg-y d kũnna fãa n sooge. Tũ-y rẽ n segl y buuda sũuri t'a kẽ yãmba.

¹⁹ Kõ-y m biig a Salomo sũur sẽn kis wẽnga t'a tõog n deeg y noya, y salgsã, y sẽn wilg fãa n wa paam n me roog ning m sẽn segl y yĩngã.»

²⁰ Dẽ poore a Daviid yeela zãma wã: «Pẽg-y Naaba-Wẽnd y Wẽnnaam!» Tɩ zãma wã fãa kils Naaba-Wẽnd, b ba rãmb Wẽnde. B yĩgimdame la b wõgemda Naaba-Wẽnd la dĩma a Daviid taoore.

A Salomo reegda naam

²¹ Vẽkembeoogo, zãma wã kõo Wẽnd yũ-nood maando la maand dɩtse, yɩɩ lols tusri, pe-raad tusri, pe-bi tusri, ne kũun niyns sẽn tũnugd maandã, n paas sugr kosg maando, a Israyɛl yĩnga.

²² B rɩɩme, b yũu ne sũ-noog baraare, Naaba-Wẽnd taoore. B yãka a Daviid biig a Salomo n kõ-a naam, b pʋdga kaam a zugu t'a lebg dĩma, n pʋdg a Sadok zug t'a lebg maan-kʋʋda.

²³ A Salomo zaoonda Wẽnd sẽn kõ b rãmb naama zaoorẽ. A rɩɩ naam a ba a Daviid zĩigẽ. Bũmb fãa sak-a lame, neba fãa saka-a lame.

²⁴ Tãnsoaben-dãmba fãa, a Daviid gãndaadã la a kamba meng reega a Salomo noore.

²⁵ A Israyɛl kamba nifẽ, Wẽnd zẽka a Salomo naama. B kõ-a-la ziiri. Sẽn deng-b yẽnda a Israyɛl zaoorẽ wã zɩɩ n paam a taar ye.

²⁶ A Zese biig a Daviid rɩɩ naam Israyɛl zãng zugu.

²⁷ A rɩɩ naam yʋʋm pis-naase, yʋʋm a yopoe Ebrõ, yʋʋm pis-tã la a tã Zerizalɛɛm.

²⁸ A kʋʋla sũ-noog kʋʋlem, n tɩg ne raare, n tɩg ne arzɛka, n tɩg ne ziiri, n yaool n ki. A Salomo n dʋ a zaoorẽ.

²⁹ A Daviid kibare, pipi raare n tãag a yaoolem daar pa gʋls bãngda Samwɛl sebra pʋgẽ bɩ? Pa gʋls bãngdba a Natã la a Gad kibarẽ bɩ?

³⁰ Sɛb kãens togsa a naama sẽn yɩ a soab zãnga, a gãndalsem, a zaka pʋgẽ vɩɩm, a vɩɩma ne Israyɛl nanamse la dũni wã nanams a taaba.