1 Kibayã 27 - SEBR SÕNGO

Rĩunga tãnsoaben-dãmba

¹ Ad sebr ning sẽn sõdgd a Israyɛl kamba sẽn da kẽ dĩma tʋʋmẽ. B yaa b ba rot nanamse, neb tusri bɩ neb koabg tãnsoaben-dãmba, tẽns zãadba. Bãmb la dĩma bas ne a tãpa yɛla. Dĩma ra weel-b-la woto: Kiuug fãa a ra yãkda neb tus pisi la a naase. Kiuuga sã n ki, tãb-biis a taab n wat n deeg-ba.

^2-15 Ad kiuug fãa ne a tãnsoaben-dãmba, tãnsoab fãa ne a yʋʋre: Pipi kiuugu, a Yasobam, a Zabdiyɛl biiga, a da yaa Perɛs yagenga, la yẽ n da so tãnsoaben-dãmba fãa sẽn get-b tʋʋmda pipi kiuugã. Kiuug a yiib soaba, Awoyitga a Dodayi, t'a Miklot sõangd-a. Kiuug a tãab soaba, a Benaya, maan-kʋʋd kãsenga a Zoyada biiga. A Benaya da yaa gãndaoog menga. A sẽn waa n lebg gãndaad pis-tã wã naaba; a biig a Amizabad n deeg a zĩiga. Kiuug a naas soaba yĩnga, yaa a Zoab yao a Azayɛl. A biiga a Zebadiya n led a zĩigẽ. Kiuug a nu soaba yĩnga, Ezrayitga a Samut. Kiuug a yoob soaba yĩnga a Ira, Tekoa daoa a Ikɛs biiga. Kiuug a yopoe soaba yĩnga, Pelonitga a Elɛs, a Efrayim roogẽ. Kiuug a nii soaba yĩnga, a Sibkayi, Usa neda, Zareyitga. Kiuug a wɛ soaba yĩnga, a Abiezɛr, Anatot daoã, a Bẽnzame yagenga. Kiuug piig soaba yĩnga, a Marayi, Netofa daoa, Zareyitga. Kiuug piig la a ye soaba yĩnga, a Benaya, Pireatõ neda, a Efrayim doogẽ. Kiuug piig la a yiib soaba yĩnga, a Eldayi, Netofa daoa, a Otniyɛl roogẽ.

Rĩunga tẽnsoaben-dãmba

¹⁶ Sẽn get-ba Israyɛl tẽnsa yelle: a Rubẽ sakẽ, da yaa a Eliezɛr, a Zikri biiga. A Simeõ sakẽ, da yaa a Sefatiya, a Maaka biiga.

¹⁷ A Levi sakẽ, da yaa a Asabiya a Kemwɛl biiga. A Aarõ sakẽ, da yaa a Sadok.

¹⁸ A Zɩɩda sakẽ, da yaa a Eliyu, a Daviid kẽem a ye. A Isakar sakẽ, da yaa a Omri, a Mikayɛl biiga.

¹⁹ A Zabulõ sakẽ, da yaa a Yerimot, a Azriyɛl biiga.

²⁰ A Efrayim sakẽ, da yaa a Oze, a Azariya biiga. A Manase bogrẽ, nin-taoore, da yaa a Zowɛl, a Pedaya biiga.

²¹ A Manase bogr sẽn da be Galaad, da yaa a Ido, a Zakari biiga. A Bẽnzame sakẽ, da yaa a Yaaziyɛl, a Abnɛr biiga.

²² A Dã sakẽ, da yaa a Azarɛl, a Yeroam biiga. Woto la Israyɛl tẽnsoaben-dãmba.

²³ Sã n ya neba gill sõadga poorẽ, a Daviid pa sõd sẽn zems-b yʋʋm pisi bɩ sẽn pa ta rẽ ye, tɩ Soaala-Wẽnd da kãabame tɩ b na kɩt t'a Israyɛl fɩɩg n zeng ãds sẽn be yĩngri.

²⁴ A Zoab, a Seruya biiga, sɩnga sõadga la a ka baas ye, tɩ sõadga poorẽ, a Israyɛl da rɩɩ Wẽnd beem, la yaa rẽ yĩnga la sõadgã pa gʋls zãng a Daviid rĩung kibar sebr pʋgẽ ye.

Sẽn zãad-b rĩma paoongo

²⁵ Taoor soaba sẽn da get dĩma arzɛka da yaa a Azmavɛt, a Adiyɛl biiga. Taoor soab sẽn da get dĩma kood sẽn da be tẽnsẽ, tẽn-bɛd la tẽn-bõonesẽ, la gasda pʋsẽ, da yaa a Zonatã, a Oziyas biiga.

²⁶ Taoor soaba sẽn da get pʋta koaadba da yaa a Ezri, a Kelub biiga.

²⁷ Taoor soaba sẽn da get bugsuntundã da yaa a Simeyi, Rama daoa. Taoor soab sẽn da get neb niyns sẽn da bĩngd-b dĩma rãama da yaa a Zabdi, Sefam daoa.

²⁸ Taoor soaba sẽn da get oliviye tɩɩse la tɩɩs niyns biis sẽn tõe n wõd kaam la sẽn da sel bãadẽ wã da yaa a Baal-Ana, Gedɛr daoa. Taoor soaba sẽn da get kaama bĩngrã da yaa a Zowas.

²⁹ Taoor soaba sẽn da get niisã b sẽn da kɩɩmd Sarõ bãoogẽ da yaa a Sitrayi, Sarõ tẽng neda. Taoor soaba sẽn get niisã b sẽn da kɩɩmd bãad a taabẽ, da yaa a Safat, a Adlayi biiga.

³⁰ Taoor soaba sẽn da get yʋgma wã yelle, a Obil, Ismayɛlitga. Taoor soaba sẽn da get bõn-yãansa yelle, da yaa a Yediya. Meronot daoa.

³¹ Taoor soaba sẽn da geta wuba yelle, bʋʋsa la piisa yelle da yaa a Yaziz, Agritga. Yaa nin-bãmba n da ya dĩm a Daviid paoonga gũudba.

A Daviid na-yir dãmba

³² A Zonatã, a Daviid ba-bila, da yaa dĩma sagenda, dag n yaa ned sẽn tar yam, n ya sɛb-mita, yẽ ne a Yeyiyɛl, Amonitgã, n da get dĩma kamba gʋʋlg yelle.

³³ A Ayitofɛl da yaa dĩma sagenda; a Usayi, Arkitga, da yaa dĩma zoa;

³⁴ a Zoyada, a Benaya biiga ne a Abiyatar n led a Ayitofɛl zĩigẽ; a Zoab da yaa dĩma tãnsoab kãsenga.