1 Kibayã 26 - SEBR SÕNGO

Dagno-gũudba

¹ Ad-y dagno-gũudba me ra welga sagse. A Meselemiya, a Kore biiga, a Abiyasaf yagenga,

² roga kamb a yopoe. Bãmb la woto: a Zakari, a bi-kẽenga, a Yediayɛl, a yiib soaba, a Zebadiya, a tãab soaba, a Yatniyɛl, a naas soaba,

³ a Elam, a nu soaba, a, Zoana, a yoob soaba, a Eliyoenayi, a yopoe soaba.

⁴ A Obɛd-Edom roga kamb a nii: a Semaya, a bi-kẽenga, a Zozabad, a yiib soaba, a Zoa, a tãab soaba, a Sakar, a naas soaba, a Netaneyɛl, a nu soaba.

⁵ A Amiyɛl, a yoob soaba, a Isakar, a yopoe soaba, a Pewultayi, a nii soaba. Sɩd me Naaba-Wẽnd da ning-a-la barka.

⁶ A biiga a Semaya doga kamba sẽn paam pãnga b buuda sʋka. Yɩɩ neb sẽn ka bas b meng poorẽ ye. Bãmb sẽn leok n yɛse.

⁷ A Semaya kamba yɩ-la a Otni, a Refayɛl, a Obɛd, a Elzabad, ne b yaop a yiibu, gãndaad menga, a Eliyu la a Semakiya. Bãmb b yiiba la b ra pẽgd n yɩɩda.

⁸ Bãmb fãa da yaa a Obɛd-Edom yagense. B fãa ra yaa sũ-keelem dãmba la neb sẽn ka yogd ne b tʋʋm ye. B ra yaa bãmb pisoobe la a yi.

⁹ A Meselemiya ne a kamba la a yaopa sʋka neb piig la a nii n sɩd da yɩɩd b taaba, n da ya sʋk neba.

¹⁰ A Osa, a Merari yagenga, roga kamb a naase: a Simri, yẽ da ka bi-kẽeng ye, la a ba da kõ-a-la kãsengo.

¹¹ A Ilkiya la a yiib soaba, a Tebaliya, a tãab soaba, a Zakari a naas soaba. A Osa ne a kamba la a ba-biisa ra yaa bãmb piig la a tãabo.

¹² Dagno-gũudba ne b kãsem-dãmba da naaga taab n tʋmd wẽnd doogẽ wã.

¹³ B pʋɩɩme n wilg ned kam fãa sẽn na n gũ noor ninga. B poeesame n kõ nin-bɛdã wala nin-bõonegã, ned kam fãa a zĩiga.

¹⁴ B sẽn poeese yaang noorã, lʋɩ-la a Selemiya zugu. Poeera wilgame t'a biig a Zakari n so goabg noorã; a Zakari, da yaa nin-yẽesenga, n mi saglgo.

¹⁵ Poeer wilgame t'a Obɛd-Edom n so dɩtgo noore, t'a kamba so teeda sẽn bĩngd doog ninga noora gũubu.

¹⁶ Poeer wilgame t'a Supim la a Osa n so nin-taoor noore, n tees Salekɛt (Tɩ-viuku) sor ning sẽn dʋʋd yĩngrã. Ad tʋʋmda sẽn pʋɩ to-to.

¹⁷ Yaang kɩrenga, daar a ye Levitsa a yoobe; dɩtg kɩrenga, daar a ye, Levitsa a naase, goabg kɩrenga, daar a ye fãa Levits a naase; teed bĩngri zĩisẽ, roog a ye fãa, Levits a yi.

¹⁸ Ro-gãasa noore, nin-taoor kɩrenga yaa Levits a naase, ro gãasa pʋga Levits a yi.

¹⁹ Woto la dagno-gũudba, a Kore ne a Merari kamba, deeg b zĩisi.

Levits a taaba

²⁰ Levits a taaba, da geta arzɛgsa sẽn da be wẽnd doogẽ, arzɛgs sẽn da kõ Soaala-Wẽnde.

²¹ A Ladã kamba, a Gersõ yagense, bãmb taoor dãmba yaa a Yeyiyɛli

²² ne a kamba, a Zetam ne a yao a Zowɛl, bãmb n soog wẽnd dooga arzɛka gũudem.

²³ Sã n yaa a Amram, a Isar, a Ebrõ, la a Uziyɛl doogẽ,

²⁴ yaa a Sebuwɛl, a Gersõ biiga, a Moyiiz yagenga, n da ya arzɛka gũub naaba.

²⁵ A Sebuwɛl rogma yũug ra tɩ tonga ne a Eliezɛr, a Gersõ ba-biiga; ad-a Eliezɛr yagensã: a Reabiya, a Yesaya, a Zoram, a Zikri la a Selomit.

²⁶ A Selomit ne a ba-biisã, bãmb n da gũud arzɛgsã sẽn da ya Wẽnd soolma. Yaa arzɛk ninga dĩm a Daviid, rota nanamse, neb tusr tãnsoaben-dãmba, neb koabg tãnsoaben-dãmba la tãnsoaben-dãmb a taaba sẽn da rɩk n kõ bãmbã.

²⁷ Yaa arzɛgs b sẽn da zɛ tãpẽ la b yãk n maan Wẽnd pʋɩɩre, sẽn na yɩ-la n paas Naaba-Wẽnd rooga ziiri.

²⁸ Le paasa teed niynsi, bãngda a Samwɛl, la a Sol, a Kis biiga, la a Abnɛr, a Nɛr biiga la a Zoab, a Seruya biiga, sẽn da kõ Soaala-Wẽnde. A Selomit ne a saam-biisã n da so kũun bãmb fãa gũudem.

²⁹ A Isar yagens sʋka, a Kenaniya ne a kamba n da gʋlsde la b bʋʋd bʋʋdo, n welgd a Israyɛl yɛla ne a yagse tɩ kalwẽdg ra wa kẽ sʋk ye.

³⁰ A Ebrõ yagens sʋka, yɩ-la a Asabiya ne a ba-biisi, sũ-keelem dãmba, bãmb tusri la kobs-yopoe, n da get Israyɛl kamba soolma sẽn da be Zʋrdẽ nin-taoore n welgd yɛl niyns sẽn tõe n be bãmb ne Naaba-Wẽnde, n be bãmb ne dĩma sʋka, n dat welgre.

³¹ A Ebrõ yagensa roogẽ, a Yeriya n da rɩt kãsengo. A Daviid naama yʋʋmd pis-naas soaba, b bao-la b rogma soy la b mikame tɩ b rogma yũug waa n tɩ tonga ne neb sẽn pid ne sũ-keelem, Yazɛr tẽnga, Galaad tẽn-peelmẽ.

³² Yaa rẽ yĩnga la dĩm a Daviid tũus neb tus a yi la kobs-yopoe, n paas a Yeriya. Nin-bãmb yaa buud a ye rãmba la b ba rot nanamse, la dĩma yãka bãmba tɩ b ges a Rubẽ, a Gad ne a Manase bogre yelle, n welg yɛl niyns sẽn tõe n be bãmb ne Naaba-Wẽnd sʋka, bãmb ne dĩma sʋka, n dat welgre.