1 Kibayã 23 - SEBR SÕNGO

Levit dãmba tʋʋma siglgu

¹ A Daviid sẽn lebg nin-kẽema n kʋʋl sũ-noog kʋʋlem, a kõ-la a biiga a Salomo naam t'a lebg a Israyɛl dĩma.

² A tigma a Israyɛl nanamsa fãa ne maan-kʋʋdba la Levitsã.

³ B sõda Levitsa sẽn da tar yʋʋm pis-tã bɩ yɩɩd rẽ. B sẽn sõde, b mikame tɩ b dapa yaa tus pis-tã la a nii.

⁴ A Daviid yeelame: «Bɩ y yãk bãmb sʋka neb tus pisi la a naase, tɩ b soog wẽnd doog tʋʋma, la b yãk tus a yoobe, tɩ b yɩ sɛb gʋlsdba, bʋ-kaoodba.

⁵ B yãk tus a naase tɩ b pẽgd Soaala-Wẽnd ne yʋʋm teedã mam sẽn kɩt tɩ b maan bãmb waoogr yĩnga.»

⁶ A Daviid welg-b-la sags-sagse: ad-a Gersõ saka, ad-a Keyat la a Merari sagse. A tũ-la a Levi kamba roto.

⁷ A Gersõ kamb yɩ-la a Ladã la a Simeyi;

⁸ A Ladã kamba yɩ-la a tãabo: a Yeyiyɛl, b kãsma, a Zetam, a Zowɛl.

⁹ A Simeyi kamb yɩ-la a tã: a Selomit, a Aziyɛl, a Yaat.

¹⁰ A Simeyi waa n le roga kamb a naase: a Yaat, a Ziza, a Yewus, a Beriya.

¹¹ A Yaat n da ya b kãsma, t'a Ziza yaa a yiib soaba, a Yewus la a Beriya pa rog kamb wʋsg ye, dẽ n so tɩ b naag bãmba n sõd roog a ye.

¹² A Keyat kamb yɩ-la a naase: a Amram, a Isar, a Ebrõ, la a Uziyɛl.

¹³ A Aram kamba: a Aarõ la a Moyiiz; b welga a Aarõ toore t'a kõt Soaala-Wẽnd b kũun-sõma wã. Yẽ ne a kamba welga toore daar fãa yĩnga, tɩ b tʋʋmde ya b wis tɩdare Naaba-Wẽnd taoore la b kʋʋd maando la b sik b bark b buuda zugu.

¹⁴ La sã n yaa a Moyiiz, Wẽnnaam nedã, b sõda yẽ kamba n naag ne a Levi roogo.

¹⁵ A Moyiiz kamba: a Gersõ la a Eliezɛr.

¹⁶ A Gersõ kamba: a Sebuwɛl, kãsma.

¹⁷ A Eliezɛr biiga: a Reabiya, yẽnda a ye zãn-tãa. La sã n yaa a Reabiya yẽ kamba yɩɩ wʋsg-wʋsgo.

¹⁸ A Isar kamba: a Selomit, kãsma.

¹⁹ A Ebrõ kamba: a Yeriya, kãsma, a Amariya, a yiib soaba, a Yaaziyɛl, a tãab soaba, a Yekamam, a naas soaba.

²⁰ A Uziyɛl kamba: a Mika, kãsma, la a Isiya, a yiib soaba.

²¹ A Merari kamba: a Mali la a Musi. A Mali kamba; a Elazar la a Kis.

²² A Elazar kiime n ka rog bi-ribl ye, a ra roga kom-pugli bala. Yẽ ba-biig a Kis kamba peeg-b lame n maan b pagba.

²³ A Musi kamba yɩ-la a tãabo: a Mali, a Edɛr, a Yerimot.

²⁴ A Levi kamb la bãmba ne b ba-rãmb roto, la b ba rot nanamse. Bãmb la b sõdyã, ned fãa ne a yʋʋre; bãmb n da tʋmd wẽnd dooga tʋʋma, tɩ b yʋʋm ta pisi bɩ yɩɩd rẽ.

²⁵ A Daviid da yetame: «Naaba-Wẽnd, a Israyɛl Wẽnnaam, kõ-la b buuda laafi, la bãmb meng zĩi Zerizalɛɛm daar fãa yĩnga.

²⁶ Woto wã Levitsa ka na n le tʋk sɛka roogã ne teedã sẽn be a pʋgẽ wã ye.»

²⁷ Wala a Daviid yaoolem noora sẽn tʋlgã, b gʋlsa Levit rãmba yʋy, tɩ b sɩng tʋʋmde, b yʋʋm sã n ta pisi bala.

²⁸ La bãmb tʋʋmda da yaa Aarõ yagensa sẽn yet tɩ b maan bũmb ning bal wẽnd doogẽ, a sɩmannẽ, a ro-bõonesa pʋsẽ, rot niyns sẽn yeg-b wẽnd doogã. Bãmb n pekd te-sõma wã la b maan tʋʋm a taaba, wala:

²⁹ wẽ bur-sõma wã sẽn dɩkd n kõ Soaalã. Wa segl zoma sẽn na n tũnug ne maandã, miisda sẽn ka ningd bɩllã; ges bõn-kɩɩmdi wã yelle; ges teed niyns sẽn tar n magd woglem bɩ zɩslem.

³⁰ Soaala-Wẽnd pẽgr yibeoog la zaabrã maanda b nifẽ.

³¹ Sẽn tog n kʋ b nifẽ yɛsa, yaa yũ-noog maoong buud fãa, vʋʋsg raare, kiuug pipi raare, kibs raare. Beoog beoog fãa tʋʋma sõor pitame la ka basd tɩ b wakata yõsg ye.

³² Bãmb n gũud sɛka roogo la b gũud Sõmblem zĩigã. A Aarõ yagensã, b saam-biisã, n so tʋʋma sẽn tʋmd Soaala rooga pʋgã.