1 Kibayã 22 - SEBR SÕNGO

¹ Yaa rẽ la a Daviid da gomd woto: «Yaa ka la wẽnd doogo la ad maan-kugri; yẽ zug la Israyɛl kamba tog n kɩs b maoong bũmbu.»

Wẽnd doog meeb seglgo

² A Daviid kõo noore tɩ b tigim sãamba fãa sẽn da be Israyɛl soolmẽ, la a yãka tʋʋm-tʋmdba sẽn na n pees kuga tɩ b me Naaba-Wẽnd doogo.

³ A Daviid segla kut me zembala sẽn na n maan kaadse, kʋɩlensã yĩnga, n maan zũud sogdse zembala, al tɩ b ra ka tõe n mak b zɩslem sẽn zem to-to ye.

⁴ A Daviid segla kʋgs raad ka tɛka. Sidõ rãmba ne Tir rãmba da waa ne ra-sĩdma al wʋsgo n kõ a Daviid.

⁵ A Daviid da yetame: «Mam biiga a Salomo nan paooda la a pãng ka waoog ye, la roogã sẽn na n me Wẽnd yĩnga, tog n yɩɩ kãsenga la neere n yɩɩd rota fãa, tɩ b gomd a yelle la b pẽgd-a zĩis fãa la buud fãa soolmẽ. Mam na n segla a meebo, m biiga yĩnga.» A Daviid sẽn segl bũmb ning wẽnd dooga meeb yĩng t'a nan ket ne yõore, yɩɩ teed ka tɛka.

⁶ A Daviid waa n boola a biiga a Salomo n kõ a noor t'a me roogo Naaba-Wẽnd, Israyɛl Wẽnnaama, yĩnga.

⁷ A Daviid yeela a Salomo: «M biiga, mam da tʋlla ne m sũur fãa n me roogo, Soaala-Wẽnd yʋʋr waoogr yĩnga.

⁸ La bãmb taasa maam koe-kãnga: ‹Fo raaga neb zɩɩm al wʋsgo, fo zaba zab bɛda, ka foom n na n me roogã mam yʋʋr waoogr yĩng ye, tɩ fo raaga zɩɩm wʋsgo mam taoore.

⁹ Ade, fo na n doga biiga, a na n yɩɩ laafi baooda; mam na n kõ-a-la laafi ne yags fãa sẽn gũbg a soolem, tɩ b na n pʋd a yʋʋr t'a Salomo, la mam na kɩt t'a Israyɛl zĩnd ne laafi la yĩn-maasem, yẽ zamaanẽ.

¹⁰ Yẽ n na n me roogo mam yʋʋr waoogr yĩnga, a na n yɩɩ m biiga, tɩ m yɩɩ a ba. La m na n vigl a naama zaoore, a Israyɛl sʋk daar fãa.›

¹¹ La marsã, m biiga, bɩ Wẽnd zĩnd ne foom tɩ f tõog n me b roog wala b meng sẽn tʋlge.

¹² Wẽnd na kõ-f gũusgu la yẽesem, bãmb sã n wa kõ foom naam Israyɛl zugu tɩ f vɩɩma me tũud b noya.

¹³ Sɩda, fo sã n mao n tũ noya la saglsã, b sẽn kõ a Moyiiz a Israyɛl yĩnga, f sẽn maand na zĩnd barka. Aya! Keng f pɛlga la f maan sũ-keelem, da zoe rabeem la f ra yɛɛs ye.

¹⁴ Ade, mam wɩnga ne m naongã n paam n segl roog bãmb yĩnga. M paama sãnem zɩslem sẽn ta neb tus koabg la pis-nu zɩɩbo, la wanzurf zɩslem sẽn yɩɩd rẽ naoor pis-tã. La sã n ya zũudã ne kutã, ned ka tõe n mak b zɩslem, tɩ waoogame al tɩ looge. La m segla daado ne kug me, la fo na le bao n paase.

¹⁵ F tara tʋʋm-tʋmdb wʋsgo sẽn ya kug-peesdba la da-wãadba, sẽn tar yam, n mi tʋʋm buud fãa.

¹⁶ Sãnema, wanzurfã, zũudã la kutã ned ka tõe n bãng b sẽn zem tɛk ye. Aya, yik n sɩng tʋʋmde, la Wẽnd na zĩnd ne foom!»

¹⁷ A Daviid kõ-la a Israyɛl nanamsa fãa noore tɩ b sõng a Salomo. A goma woto:

¹⁸ «Naaba-Wẽnd, yãmb Wẽnnaam ka be ne yãmb bɩ? La bãmb ka kõ laafi zĩig zãng fãa bãmb sẽn yõk tẽn-kãnga neba n ning mam nugẽ wã bɩ? Ges-y tẽn-kãens sẽn sulg b mens marsã Naaba-Wẽnd la b buuda taoore.

¹⁹ Bɩ y mao n bao Naaba-Wẽnde, yãmb Wẽnnaam, ne y sũur fãa, ne y pãng fãa, la y me yãmb Wẽnnaam doogo. Tall-y koglgã, Soaala zooda kasetã ne a teedã, n tɩ bĩng b rooga pʋga, roog ning y sẽn na n me b yʋʋra waoogr yĩnga.»