1 Kibayã 20 - SEBR SÕNGO

A Zoab lubda Raba

¹ Yʋʋmd sẽn wẽke, dĩm dãmba sẽn mii n kẽnd tãp sasa ningã, a Zoab peega a tãb-biisã n tɩ zab ne Amonitse. A waa n gũbga Raba dẽ t'a Daviid bee Zerizalɛɛm. A Zoab tõoga Raba n lub-a, n sarem-a.

² A Daviid fõka naama pugl sẽn da be b wẽn-naand a Milkom zugu, n mik t'a zɩslem taa nin-tɩɩg zɩɩbo. Kugr a yembre sẽn yãgd a toore la sẽn be yõodo la b ra tablg-a. B rɩka puglã n fõgneg a Daviid. A yii tẽnga ne laog sẽn ka paood ye.

³ A talla tẽnga rãmba n looge la a kõ-b-la tʋʋm teedo: sʋʋs sẽn kɩ yẽna, teed sẽn tar n saremd pʋt kaalem la lɛ sẽn na n kɛ tɩɩse. A maana boto ne Amonitsa tẽnsã fãa. A Daviid ne a tãb-biisã yaool n lɛɛg n waa Zerizalɛɛm.

⁴ Dẽ poore, zabr n waa n kaoog ne Filisti rãmba Gezɛr tẽnga. Wakat kãng la a Sibkayi, Usa daoã, kʋ a Sipayi, Refayitg a ye. Filisti rãmba lebga yem-daado.

⁵ La zabr n waa n le kaoog ne Filisti rãmbã. A Elanan, a Yayir biiga, kʋ-la a Lami, Gat dao a Goliyat yao. A kãnda raoog ra zema koeer-bõanga.

⁶ Zab kãseng n le zĩnd Gat, la nin-daoog a yembre n da be beene, n tar nus-bi la nao-bi pisi la a naase, nug fãa nus-bi a yoobe, naoor fãa nao-bi a yoobe; yẽ me da yaa a Arafa yagenga.

⁷ La a sẽn da tãoosd daoodo ne a Israyɛl yĩnga, a Zonatã, a Sama biiga, a Daviid kẽem biiga, yõk-a lame n kʋ.

⁸ Nin-bãmb fãa da yaa a Arafa, Gat daoã yagense; la a Daviid ne a tãb-biisã n wẽ-b n kʋ.