1 Kibayã 19 - SEBR SÕNGO

A Daviid gãndaado

¹ Dẽ loogr poore, a Naas, Amonit dĩma, kiime, t'a biig led-a a zaoorẽ.

² T'a Daviid yeele: «Mam na n maana a Anun, a Naas biiga, yel-sõmde, t'a ba maana maam neere.» La a Daviid tʋma neba tɩ b tɩ pʋʋs-a toogo, a ba wã kaalem yĩnga. La a Daviid tʋʋm-tʋmdba sẽn ta Amonitsa tẽngẽ, a Anun nengẽ, n na n pʋʋs-a toogã,

³ Amonitsa kombɛɛmba yeela b naabã: «Fo tẽedame t'a Daviid dat n waooga f ba, la rẽ yĩng la a tʋm neb tɩ b wa pʋʋs-f toogã? Bãmb ka wa ka n na n gese, la b lɩɩse n paam n lub tẽn-kãnga bal bɩ?»

⁴ Woto, a Anun yõka a Daviid sẽn tʋm b rãmbã n põng b toɛɛnga, n wõrs b futa pʋɩ-sʋka n ta b kɩgbã, n yaool n kõ-b sor tɩ b kuli.

⁵ B wa n togsa a Daviid b sẽn yaal a neba yaoolg ningã, t'a tʋm ned a ye t'a zoe n tɩ seg neb niyns sẽn da yer futu sẽn da pa lut b yãndã. B yeel-b lame: «Bɩ y kell n pa Zeriko tɩ y toeemsã yi tɩ y yaool n wa.»

⁶ Amonitsa yãeeme tɩ b bao beem ne a Daviid. Woto b yiisa ligd ka tɛka, wanzurf sẽn ta neb tusr la koabg zɩɩbo la b paama Mezopotami tãb-biisi la zabr bilim-bilm la wed-dʋʋdba, Maaka la Soba Aramsa nengẽ.

⁷ Woto wã a Anun ne Amonitsa yii n tigma ne bilim-bilm tus pis-tã la a yiibu, tɩ Maaka dĩma me yi ne a neba n wa wẽ b tãb-sik Madaba yegende.

⁸ A Daviid sẽn wʋm dẽ a tʋma a tãnsoab a Zoab ne a tãb-biis la a gãndaadã.

⁹ Amonitsa yiime n tong taaba zabr yĩnga, tẽnga noorẽ, la nanams a taaba yalsa toore, ween-vɩʋʋgẽ.

¹⁰ A Zoab sẽn mik tɩ zabrã na n kaooga a poorẽ la a taoore, a tũusa Israyɛl tãb-biisa sẽn ya-b gãndaad n yɩɩd b fãa wã tɩ b togl Aramsã.

¹¹ A kõ-la a yao, a Abisayi, tãb-biisa sẽn ketã n tong-ba n togl Amonitsa. A yeelame:

¹² «Aramsã sã n tõogd maam, bɩ f wa sõng-ma. Amonitsa sa n tõogd foom, m na wa n sõng-fo.

¹³ Tall daoodo. Maan sũ-keelem, d buuda yĩnga, la Wẽnnaam tẽnsa yĩnga. La Wẽnd maan b yam sẽn date.»

¹⁴ A Zoab tãb-biis kaooga zabre ne Aramsã, la Aramsã zoe bãmb taoore.

¹⁵ Amonitsa sẽn mik tɩ Aramsã zoeeme, bãmb me ninga tĩiga, b basa a Abisayi, a Zoab yao wã, n leb b tẽngẽ. A Zoab leba Zerizalɛɛm.

¹⁶ Aramsã sẽn mik t'a Israyɛl tõoga bãmba, b tʋma neba tɩ b tɩ bao Aramsa taaba sẽn be b kʋɩlga rʋʋndã. A Sofak, a Adadezɛr tãnsoaba, n da lʋɩ b taoore.

¹⁷ B tɩ togsa a Daviid, t'a tigim a Israyɛl gilli n dʋʋg Zʋrdẽ kʋɩlgã n tɩ paam-ba, n gãneg tãpo b sɛɛgẽ. A Daviid tonga a neba n togl Aramsã tɩ b kaoog zabre.

¹⁸ La Aramsã leb n wudga a Israyɛl taoore. A Daviid kʋʋ tãb-biis niyns sẽn zao-b bilim-bilma tus a yopoe, la tãb-biis niyns sẽn kẽnd-b tẽngã bãmb tus pis-naase; a kʋʋ tãnsoaba a Sofak.

¹⁹ A Adadezɛr neba sẽn mik t'a Israyɛl tõog-b lame, b kosa a Daviid tɩ b bas tɩ zabra sɛ, la b lebga a Daviid tʋʋm-tʋmdba. Aramsa pa le sak n sõng Amonitsa ye.