1 Kibayã 18 - SEBR SÕNGO

A Daviid tõogda a bɛɛba

¹ Dẽ poore a Daviid tõoga Filisti rãmbã. A ning-b-la yãnde, a fãsga b nugẽ Gat ne a tẽn-toosa fãa.

² A Daviid tõoga Moab me, la Moabitsa sakame n yao-a fadgo.

³ A Daviid tõoga a Adadezɛr, Soba dĩma, Amat tẽnga, yẽ da rat n yãaga a soolma n ta Efrat kʋɩlga.

⁴ A Daviid reega a bilim-bilm tusri, n yõg wed-dʋʋdb tus a yopoe, la tãb-biis tus pisi; a Daviid pasa wiida nao-gĩini, a yãka bãmb koabg bala n base.

⁵ Aramsã yii Damas n na n wa sõng a Adadezɛr, Soba dĩma la a Daviid kʋʋ Aramsã neb tus pisi.

⁶ A Daviid ninga kombɛɛmb Aram tẽnga, Damas tẽn-peelmẽ; Aramsã lebga neb sẽn yaood-a fadgo. A Daviid sẽn da kẽngẽ fãa, Wẽnnaam da sõngd-a lame t'a tõog a bɛɛba.

⁷ A Daviid deega sãnem gãndo, a Adadezɛr tãb-biisa sẽn da zãada n tall n wa Zerizalɛɛm.

⁸ Tibat ne Kun, a Adadezɛr tẽnsẽ, a Daviid pãb n deega zũud al wʋsgo, la yaa ne rẽnna la a Salomo kɩt tɩ b maan ko-sĩnga, sĩn kãsenga, n paas zũud ra-lugã la teed a taabã.

⁹ A Towu, Amat dĩma, sẽn wʋm t'a Daviid tõoga Soba dĩma, a Adadezɛr, tãb-biisa fãa,

¹⁰ a tʋma a biiga, a Adoram, t'a wa pʋʋs a Daviid la a pʋʋs-a ne a zu-noogo a sẽn zab ne a Adadezɛr n tõog-a wã yĩnga, t'a Adadezɛr da yaa yẽ bɛyã. A Towu tʋma a Daviid teed buud toor-toore, sẽn ya sãnem, wanzurf bɩ zũudu.

¹¹ La a Daviid rɩka rẽ fãa n kõ Soaala-Wẽnd, n paas sãnem la wanzurfã a sẽn da reeg buud a taaba nengẽ: Edom, Moab, Amon, Filisti la Amalesitsa nengẽ.

¹² A Abisayi, a Seruya biiga, pãba Edom dãmba, yamsem longẽ, n tõog-ba, bãmb tus piig la a nii.

¹³ A ninga kombɛɛmb me Edom, la Edomitsa fãa lebga a Daviid talse. A Daviid sẽn kẽndẽ fãa, Wẽnd da kõt-a-la pãng t'a tõog a bɛɛba.

¹⁴ A Daviid rɩɩ naam a Israyɛl zãng fãa zugu; a talla a soolem dãmba fãa ne pʋ-peelem la zemsgo.

¹⁵ A Seruya biig a Zoab n da ya a tãnsoaba. Sẽn bĩngda sɛbã da yaa a Ayilud biig a Zozafat.

¹⁶ Maan-kʋʋdba da yaa a Ayitub biiga, a Sadok, la a Abiyatar biiga, a Abimelɛk.

¹⁷ A Zoyada biiga, a Benaya, n da get Krɛt la Pelɛt rãmba yelle. A Daviid kambã n da so pipi zĩisi, a sɛɛgẽ.