1 Kibayã 16 - SEBR SÕNGO

¹ B kẽesa kuga walsa koglgo, n dɩgl-a a Daviid sẽn segl zĩig ningã. B kʋʋ Wẽnnaam taoore yũ-nood maando, laafi kosg maando.

² A Daviid sẽn kʋ yũ-nood maandã la laafi kosg maandã n sɛ, a ninga neba barka Naaba-Wẽnd yĩnga.

³ La a kɩtame tɩ b pʋɩ neba fãa rɩɩbo, dapa la pagba, ned kam fãa reega buri ne naaf neongo, ne pesg neongo, n paas miisd sẽn dõos ne bugsuntung bi-koeemse.

Levit dãmb tʋmda wẽnd doogẽ

⁴ A Daviid yãka Levitsa tɩ b yals kuga walsa koglga taoore la b tʋʋmd lebga b waoog la b pẽge, la b balem Naaba-Wẽnd, a Israyɛl Wẽnnaam.

⁵ Yaa a Asaf, yẽ la kãsma, la a Zakari, yẽ la kãsem pʋgdga, a Aziyɛl, a Semiramot, a Yeyiyɛl, a Matitiya, a Eliyab, a Benaya, a Obɛd-Edom la a Yeyiyɛl bãmb da zãada kʋnde la b wãagd ruudsi, t'a Asaf da wẽed kɛma.

⁶ Maan-kʋʋdba a Benaya ne a Yaaziyɛl da peebda tõntõogo n pa sĩndidẽ, kuga walsa koglga taoore.

⁷ Badaare a Daviid deng n pẽga Naaba-Wẽnd, la a Asaf ne a ba-biis reega yɩɩlã n yɩɩle.

⁸ Pẽg-y Naaba-Wẽnde, kaas-y b yʋʋre, ninsaalb buud fãa sʋka, moon-y b tʋʋm-bãna.

⁹ Balem-y bãmba, zodg-y yɩɩla bãmb yĩnga. Kils-y b bõn-bãna fãa.

¹⁰ B sõmblema zẽkda d zugu, sẽn baood-b Wẽnd kɩdem sũ-noogo!

¹¹ Bao-y Soaala-Wẽnde, bao-y b sõngre. Bao-y bãmb nenga la y da vʋʋs ye.

¹² Tẽeg-y bõn-bãna fãa bãmb sẽn maane. Ges-y b pãnga sẽn tʋme. Ges-y b yama sẽn kaoole.

¹³ Wẽnd Sõgne a Israyɛl yagense, Wẽnd yembse, a Zakoob kamba, bãmb zo-rãmba,

¹⁴ bãng-y tɩ bãmb la Naaba-Wẽnde, tõnd Wẽnnaama n kaood tẽng zug-rãmb bʋʋdo.

¹⁵ Tẽeg-y b zooda yell daar fãa. Yaa gomde sẽn moon zamaan tusr yĩnga.

¹⁶ Yaa zoodo b sẽn yõg ne a Abraam. Yaa b kãabgo b sẽn kãab a Izaak.

¹⁷ B yalsa b noore, a Zakoob yĩnga, n yals zood sẽn kõn sɛ a Israyɛl yĩnga.

¹⁸ Bãmb n yete: m kõt-f-la tẽng a ye, Kanaã tẽnga la f buud pʋɩɩre!

¹⁹ Wakat kãng tɩ yãmb sõor da paoodame. La y da yaa sãamba, tẽng kãnga pʋgẽ,

²⁰ n yit tẽn-kãngã n kẽ tẽn-kãngã n tat taoore n lebgdẽ, tɩ f yam la poorẽ.

²¹ Soaala pa sak tɩ bu-zẽmba wẽoog-y ye. Yãmb yĩnga b sɩbga dĩm dãmba,

²² n yeel-b tɩ b ra saag n sɩɩse b sẽn kees b meng yĩnga ye. La b da saag n maan b norɛɛs wẽng ye.

²³ Yɩɩl-y n pẽg Wẽnde, tẽng zug rãmba, beeog-beoog fãa bɩ y moon bãmb fãagre!

²⁴ Togs-y b ziirã ninsaalba fãa, Adem biisa fãa moon b tʋʋm-bãna.

²⁵ Wẽnd waooga, bãmb n tog ne pẽgre! Bãmb kẽesda rabeem n yɩɩd wẽn-naandsa fãa.

²⁶ Bu-zẽmba wẽn-naandsa fãa yaa zaalem. Yaa Naaba-Wẽnd n nan saaga.

²⁷ Bãmb nenga yãgda ne neerem la ziiri. Pãng la ziir n pid b ro-sõngã.

²⁸ Ninsaalb buudu, pẽg-y la y waoog Soaala, kils-y Soaala ziir la b pãnga!

²⁹ Pẽg-y b yʋʋre, wa sẽn segde. Tall-y y kũun n wa b taoore, wõgemd-y n waoog-ba, tɩ b puka b sõmblem.

³⁰ Rig-y rabeem bãmb taoore, tẽng zug rãmba fãa! Bãmb n vigl dũniya t'a pa tõe n vik ye.

³¹ Yĩngr dãmba kaas b sũ-noog kaasgo, tɩ tẽng zug rãmba kɩdem b kɩdengo. B moon n sok taaba tɩ bu-zẽmba wʋme tɩ Naaba-Wẽnd n so naam!

³² Mogra ne a pʋgẽ te-neeba, vũ a vũubu; pʋta yɛdg b kooda ne b biisi n wilg b zu-noogo,

³³ googa ne a tɩɩsã leng b sũ-noog lengre, tɩ tẽnga Soaala n wa n kaagd a soolem dãmba.

³⁴ Pẽg-y Wẽnnaam, tɩ b yaa nin-noanga, la b nonglem ka be sɛɛb ye.

³⁵ D tees n yeel-ba: Fãag-y-do Wẽnnaam, Fãag-y-do! Tigim-y-do n yiis-d bu-zẽmba sʋka woto d na tãs y pẽgre, woto d na pʋd y yʋʋre, d na bãng y yʋ-sõnga pʋdbo, Israyɛl Wẽnde.

³⁶ D pʋʋsda a Israyɛl Wẽnnaam barka; zamaan woo zamaana, d kãntɩɩg bee tẽnga. Tɩ neba fãa naag taab n deege: «Ami! Wẽnd paam pẽgre!»

³⁷ A Daviid basa a Asaf ne a ba-biisi, kuga walsa koglga taoore. Bãmb n da tog n ges, ned kam fãa ne a wakato, tɩ Wẽnnaam waoogra ra tol n vaal koglga taoor ye.

³⁸ A basa noya gũudem ne a Obɛd-Edom, la a saam-biisi bãmb pisoob la a nii. A Yedutun biiga a Obɛd-Edom le boondame tɩ Oze.

³⁹ A Daviid ninga maan-kʋʋda, a Sadok, ne maan-kʋʋdb a taaba, a saam-biisã, kuga walsa koglga taoore, Gabaõ tãnga zugu.

⁴⁰ B da bee be daar fãa n kʋʋd maand Naaba-Wẽnd yĩnga, yũ-noog maan-kugra zugu, yibeoog la zaabre, la b ra getame tɩ b maan bũmb ning fãa sẽn gʋls noora sebrẽ, noor ninga Soaala sẽn kõ a Israyɛl.

⁴¹ Sẽn da be-b ne bãmba, yaa a Eman la a Yedutun. Neb a taaba sẽn ketã, b da tũusa bãmb ned kam fãa, tɩ b tʋʋmd ya b peebd tõntõodo, bɩ b wẽed kɛma, bɩ b reemd ne yʋʋm teeda a taaba, Wẽnnaam pẽgr yĩnga. N pẽg-b tɩ b nonglem ka be sɛɛb ye.

⁴² Sẽn naag-ba a Eman la a Yedutun da reesda pẽgra yɩɩlã. A Yedutun kamba n da so noya gũudem.

⁴³ Neb fãa kulame, ned kam fãa a yiri, t'a Daviid me kul n le tɩ ges a yir dãmba.