1 Kibayã 15 - SEBR SÕNGO

Kuga walsa koglg wata na-yiri

¹ A Daviid me-la a zak a na-tẽngẽ. A segla zĩig be la a tii roog ne futu n na n wa kẽesd kuga walsa koglga be.

² A yiisa noore tɩ Levitsa bala n tõe n tʋk koglgã. Yaa bãmb bal la Naaba-Wẽnd tũus dar fãa yĩnga tɩ b tʋkd-a la b tʋmd sɛka roog tʋʋma.

³ A Daviid tigma Israyɛl kamba fãa Zerizalɛɛm tɩ b na n tɩ rɩk koglgã n wa bĩng-a zĩig ning sẽn da segl a yĩngã.

⁴ A Daviid tigma a Aarõ yagense, la a Levi yagense. Ad-ba:

⁵ a Keyat roogẽ, saka naab, a Uriyɛl, ne a yaop koabg la pisi.

⁶ A Merari roogẽ, saka naab, a Azaya, ne a yaop kobs-yi la pisi.

⁷ A Gersõ roogẽ, saka naab, a Zowɛl, ne a yaop koabg la pis-tã.

⁸ A Elisafã roogẽ, saka naab, a Semaya, ne a yaop kobs-yi.

⁹ A Ebrõ roogẽ, saka naab, a Eliyɛl, ne a yaop pis-nii;

¹⁰ A Uziyɛl roogẽ, saka naab, a Aminadab, ne a yaop koabg la piig a la yiibu.

¹¹ A Daviid boola maan-kʋʋdba, a Sadok la a Abiyatar, n bool Levitse a Uriyɛl, a Asaya, a Zowɛl, a Semaya, a Eliyɛl la a Aminadab.

¹² A yeel-b lame: «Yãmb la Levit dãmba sak nanamse. Yɩlg-y y mense, yãmb ne y saam-biisi, la y tɩ tall Naaba-Wẽnd, a Israyɛl Wẽnnaam, kuga walsa koglgã, n wa rɩgl-a m sẽn segl zĩig ningã.

¹³ Yãmb ka zĩnd kaane pipi rɩkra ye. Dẽ me la Naaba-Wẽnd, tõnd Wẽnnaam yẽeg tõndo, tɩ tõnd ka reng n sok-b wala sẽn da segd ye.»

¹⁴ Maan-kʋʋdba la Levitsa yɩlga b mense n tɩ wa ne Israyɛl Wẽnnaam zooda kasetã, kuga walsa koglgã.

¹⁵ Levista tʋk-a lame n palg b bãgdo, wala a Moyiiz sẽn da kõ noore, la wala Naaba-Wẽnd sẽn da yeele.

¹⁶ A Daviid yeela Levitsa nanamse, tɩ b yals yʋʋmba, b zĩisẽ ne b yʋʋm teedo la b wilg b sũ-noogo. B zodg yɩɩla, tɩ ruudsa wãagdẽ, tɩ koala la kɛm wẽedẽ, tɩ zĩig fãa wulumd ne noogo.

¹⁷ Levitsa sẽn yãk b rãmb la woto: a Zowɛl biiga a Eman, a Berekiya biig a Asaf, a Kusaya biig a Etã, a Merari yagenga.

¹⁸ Levits kẽere waa n paasame. Yaa sẽn gũud-b noya, wala a Zakari, a Ben, a Yaaziyɛl, a Semiramot, a Yeyiyɛl, a Uni, a Eliyab, a Benaya, a Maaseya, a Matitiya, a Eliflewu, a Mikneya, a Obɛd-Edom, a Yeyiyɛl.

¹⁹ Yʋʋmba kẽere, wa a Ena, a Asaf, a Etã, da tara kɛma sẽn yõg ne zũudu, la sẽn zãeed wʋsgo.

²⁰ A Zakari, a Yaaziyɛl, a Semiramot, a Yeyiyɛl, a Uni, a Eliyab, a Maaseya, la a Benaya da wẽeda pɛndga, bãmb da sokda raaga.

²¹ A Matitiya, a Eliflewu, a Mikneya, a Obɛd-Edom, a Yeyiyɛl la a Azaziya bãmb da tara gĩs a nii koala n sokd yãanga.

²² A Kenaniya, n da ya naaba n so Levits niyns sẽn zɩt-b koglgã, ya ned sẽn sɩd mi gũusgu tɩ bũmb pa yõsd a to ye.

²³ Dagno-gũudba A Berekiya la a Elkana, da tog n yegla koglgã. A Obɛd-Edom ne a Yeyiya me ra yaa boto.

²⁴ Maan-kʋʋdba, a Sebaniya, a Zozafat, a Netaneyɛl, a Amasayi, a Zakari, a Benaya la a Eliezɛr, bãmb n da tog n peebd tõntõodo, Wẽnnaam zood kaseta taoore. A Obɛd-Edom la a Yeyiya, bãmb da yaa koglga sẽn bĩngd doog ninga noor gũudba.

²⁵ A Daviid ne Israyɛl nin-kẽemba la neb tusri tãnsoaben-dãmba da kẽngame n na n tɩ rɩk koglgã a Obɛd-Edom yiri, ne sũ-noogo.

²⁶ Sẽn na n yɩlẽ tɩ Levitsa sẽn da tʋkd koglga paam Wẽnnaam sõngre, b kʋʋ lols a yopoe la pe-raad a yopoe maoongo.

²⁷ A Daviid da yeelga fuugu sẽn maneg n wʋg ne gĩs bãanese sẽn pɩnda. A ra saoodame n naag ne Levitsa sẽn da tʋk koglgã n paas yɩɩn-yɩɩndbã la a Kenaya sẽn da get tʋkra yelle. A Daviid da ninga sãnem-pɛ-m-poore sẽn wʋg ne gĩs peelse.

²⁸ A Israyɛl gilli da yãagda kuga walsa koglg tɩ b tar kilsgu, n tar bardo la tõntõod peebgo, la b wẽed kɛma la koala.

²⁹ La koglga sẽn waa n poog a Daviid na-tẽnga, a Sol bi-pugã a Mikal lɩka võorẽ n gese, la a sẽn yãend dĩma a Daviid t'a saood la a yɩgda, a sãbs-a-la a sũurẽ.