1 Kibayã 14 - SEBR SÕNGO

A Daviid kẽeda Zerizalɛɛm

¹ A Iram, Tir dĩma, tʋma neb a Daviid nengẽ. B waa ne ra-sĩdma, ne neb sẽn mi kug peesgo, la raad bogbo n na n me na-yir n kõ a Daviid.

² Wakat kãnga, a Daviid bãngame tɩ Wẽnnaam da kõ-a-la naam, la naam sẽn tar ziir la pãnga, b buud a Israyɛl yĩnga.

³ Zerizalɛɛm tẽnga, a Daviid le peega pagba, la a roga kom-dibli la kom-pugli.

⁴ A Daviid kamba sẽn dog-b Zerizalɛɛm yʋya la woto: a Samuwa, a Sobab, a Natã, a Salomo,

⁵ a Ibar, a Elisuwa, a Elpelɛt,

⁶ a Noga, a Nefɛg, a Yafiya,

⁷ a Elisama, a Beeliyada, la a Elifelɛt.

⁸ Filisti rãmba vʋmame tɩ b taaga a Daviid ne kaam t'a ya Israyɛl zãng dĩma, la b yiime n na n tak zabr ne-a. La a Daviid sẽn wʋm woto, yẽ me yiime n na n tɩ seg-ba.

⁹ Filisti rãmba tʋg n wẽe Refayitsa, bãg-faagẽ.

¹⁰ La a Daviid deng n soka Naaba-Wẽnde: «M tɩ seg Filisti rãmba? Y na ning-b mam nusẽ?» La Soaala-Wẽnd yeelame: «Kẽng tɩ m na ning-b fo nusẽ!»

¹¹ Filisti rãmba sega a Daviid Baal-Perasim la a Daviid tõog-b-la zĩ-kãnga. A Daviid yeelame: «Wẽnnaam sõnga m nugu tɩ m wurg m bɛɛba wa koom sẽn wurgd bɛongo.» Yaa rẽ yĩng la b boond zĩ kãanga tɩ Baal-Perasim.

¹² La zĩ-kãnga Filisti rãmba zoeeme n bas b wẽn-naandsã la a Daviid yeelame: «B yõog b fãa bugum!»

¹³ Filisti rãmba le boba tãpo n wa.

¹⁴ A Daviid le soka Naaba-Wẽnd n ges a sã n tog n seg-b lame? Tɩ Soaala-Wẽnd yeel-a: «Da seg-b ye, gilg al yɩɩg n tɩ seg-b pargensa goog noore.

¹⁵ Fo sã n wa wʋmd nao rãamde pargensa zutu, f na tak zabre marsã tɩ yaa wakat kãng la maam, Naaba-Wẽnd, na n lʋɩ fo taoore, tɩ f zab n tõog Filisti rãmba.»

¹⁶ A Daviid maana wala Soaala-Wẽnd sẽn yeel-a. Israyɛl kamba tõoga Filisti rãmba al Gabaõ, n tɩ ta Gezɛr.

¹⁷ A Daviid yʋʋr yii tẽnsa fãa pʋsẽ la Naaba-Wẽnd kɩtame tɩ tẽnsã fãa zoe a rabeem.