1 Kibayã 12 - SEBR SÕNGO

A Daviid pipi tũud-n-taase

¹ Ad neb niyns sẽn pʋga a Daviid, Siklag, a sẽn waa n zãag ne a Sol, a Kis biigã. Fãa da yaa gãndaado, n da sõngd-a zabr zĩigẽ.

² B ra boba logdo. B goabg ra vɩɩ wala b rɩtgo tɩ b tõe n lobg kugr bɩ b tão pĩim. Ad-a Bẽnzame roog kamba, a Sol ba-biisi:

³ b naaba, a Ayiezɛr, yẽ yao, a Zowas, Gibeya dao a Sema kamba; a Yeziyɛl la a Pelɛt, a Azmavɛt kamba; a Beraka la a Yewu, Anatot dapa;

⁴ a Ismaya, Gabaõ daoa, gãndaoog menga, gãndaad pis-tã wã nin-yende la b taoor soaba;

⁵ a Irmeya, a Yaaziyɛl, a Zoana la a Zozabad, Gedera daoa.

⁶ A Eluzayi, a Yerimot, a Bealiya, a Semariya, a Sefatiya, Aruf dapa;

⁷ a Elkana, a Isiya, a Azarɛl, a Zoezɛr, a Yasobam, Koreyitse;

⁸ a Zowɛl la a Zebadiya, Gedor daoa a Yeroam kamba.

⁹ A Gad roog rãmb me welgame n bʋʋg a Daviid a soondg zĩigẽ, we-raoogẽ, bãmb da yaa tãb-biisi sẽn tar sũ-keelem, sẽn da minim zabre al n mi neere gãong la kãna zãabo, b raooda da taa gɩgemd dẽnna, la b tĩigã da zema yãgs sẽn zoet tãmsa zut tĩiga.

¹⁰ A Ezɛr n da yaa kãsma, t'a Obɛd pʋgda, t'a Eliab yaa a tãab soaba,

¹¹ a Mismana, a naas soaba, a Irmeya a nu soaba,

¹² a Atayi, a yoob soaba, a Eliyɛl, a yopoe soaba,

¹³ a Zoana, a nii soaba, a Elzabad, a wɛ soaba,

¹⁴ a Irmeya, piig soaba, a Makbanayi, piig la a ye soaba.

¹⁵ A Gad yagens sʋka sẽn yɩ b tãnsoaben-dãmb la boto. Sẽn da yaa faoor bãmb sʋka da zema tãb-biis koabga, tɩ gãndaoog menga zem neb tusri.

¹⁶ Bãmb n dʋʋg Zʋrdẽ kʋɩlga, pipi kiuugu, wakat ninga a sẽn pid n daannẽ, n dig bãg-faaga nebã, yaanga la taoore.

¹⁷ A Bẽnzame la a Zɩɩda yagense me bʋʋga a Daviid, a soondg zĩigẽ,

¹⁸ t'a Daviid yi n seg-ba n gom ne ba n yeele: «Yãmb sẽn wa mam nengẽ ne pʋ-peelem n na n sõng maam, ad-y yaa ne sũ-noogo la d na n fãoog taaba. La yãmb sã n waa ne zãmbo n na n sõng m bɛɛba tɩ m yaool n ka maan ned pãnga, bɩ d saam dãmba Wẽnnaam ges la b kao d bʋʋdo.»

¹⁹ La Wẽnd pãng siga a Amasayi, gãndaad pis-tã wã naab a ye, t'a yeele: «Foom la tõnd soaala, Daviid, tõnd me bee ne foo, Zese biiga! Laafi la laafi sig f zugu. Laafi ne sẽn sõngda foo, tɩ yaa Naaba-Wẽnd meng n wat f sõngre!» A Daviid deeg-b lame la a kẽes-b-la a tãb-biisa nanams sʋka.

²⁰ A Manase yagens me kẽ-la a Daviid, a sẽn wa raar ning ne Filisti rãmba n na n kaoog zabre ne a Sol. La b yaool n ka naag Filisti rãmba n zab ye, tɩ Filisti rãmba nanamse ra yẽsa ne taaba n lebs a Daviid, n yetẽ: «A rat n koosa tõnd yõore n paam n le kẽ a zu-soaba, a Sol tãpẽ.»

²¹ A Daviid sẽn wa n lebd Siklag, ad-a Manase neb niyns sẽn waa n kẽ-a: a Adna, a Zozabad, a Yediayɛl, a Mikayɛl, a Zozabad, a Eliyu la a Siletayi, sẽn da ya a Manase tãb-biis nanamse.

²² Bãmb n sõng a Daviid n zab, tɩ b fãa da yaa tãb-biisi sẽn tar daoodo la b lebga tãnsoaben-dãmba.

²³ Beoog sẽn vẽeg fãa a Daviid da reegd-b lame al t'a tãb-sikã yalge n ka le tar maken-taag ye.

A Daviid tãb-biisi, Ebrõ

²⁴ Ad zab-zabdba ne b sagsa sõore, sẽn bob-ba n babs a Daviid Ebrõ n na n kõ-a naam, a Sol naama, wala Naaba-Wẽnd sẽn da kõ noore:

²⁵ A Zɩɩda roogẽ: dap tus a yoob la kobs-nii, sẽn bob zabre n zãad gãongo la kãna.

²⁶ A Simeõ roogẽ: zabr gãndaado, tus a yopoe la koabga.

²⁷ A Levi roogẽ: tus a naase la kobs-yoobe,

²⁸ n paas a Zoyada, a Aarõ yagenga, yẽ bobame n wa ne rap tus a tã la kobs-yopoe.

²⁹ Bi-bɩɩg la gãndaoog a ye, a Sadok, ye me waa ne a sags nanams pisi la a yiibu.

³⁰ A Bẽnzame roogẽ: a Sol saam-biisi, dap tus a tã; sã n ka baraare, b da kell n kẽeda a Sol tãpẽ.

³¹ A Efrayim roogẽ: zabr gãndaado tɩ b yʋʋr da yi b buuda sʋka, bãmb tus pisi la kobs-nii.

³² A Manase bogra sẽn da be nin-taoora roogẽ: dap tus piig la a nii. B ra tũusa bãmb a yembr-yembre tɩ b wa yug a Daviid naam.

³³ A Isakar roogẽ: tãnsoaben-dãmb kobs-yi ne b tãb-biisi sẽn da tar yẽesem, sẽn da mi sẽn ya wakat ninga la seem ninga la naama na n yugi.

³⁴ A Zabulõ roogẽ: neb tus pis-nu, sẽn da tõe n maan zabre ne zab-teed buud fãa la sẽn da mi zabra meng sẽn zabd to-to.

³⁵ A Neftali roogẽ: tãnsoaben-dãmb tusri ne b tãb-biis sẽn zãad gãndo la kãna, bãmb tus pis-tã la a yopoe.

³⁶ A Dã roogẽ: tãb-biis tus pisi la a nii la kobs-yoobe sẽn tõe n tak zabre.

³⁷ A Asɛr roogẽ: dap tus pis-naase sẽn zãms la sẽn mi zabr takre la sẽn segl n gũudẽ.

³⁸ Zʋrdẽ kʋɩlga rʋʋre, a Rubẽ, a Gad, a Manase bogra roogẽ: dapa sẽn bob zab-teed buud fãa, bãmb tus koabga la pisi.

³⁹ Nin-bãmba fãa, tãnsoaben-dãmba wala tãb-biisã boba b zab-teedo n kẽng Ebrõ ne pʋ-peelem n tɩ yuga a Daviid t'a lebg Israyɛl gill naaba. Israyɛl kamba a taaba fãa yɩɩ sũur a ye n na n kõ a Daviid naama.

⁴⁰ B zĩnda ne a Daviid dasem a tã, n dɩtẽ la b yũud b saam-biisa sẽn da segl bũmb ning fãa b yĩnga.

⁴¹ Ebrõ tẽn-toosã, la ba Isakar, Zabulõ la Neftali rãmba, da zɩlga teedo ne bõeense, yʋgma, bõn-weese, la niis n wat n kõt-ba: yaa zom, kankam koeemse, sib koeemse, dãam la kaam, piis la niis zembala tɩ dag n ya kɩdeng kãsenga ne a Israyɛl.