1 Kibayã 11 - SEBR SÕNGO

A Daviid kibare

¹ Wẽnd kãnga, a Israyɛl kamba fãa tigma taaba a Daviid sɛɛgẽ, Ebrõ, la b yeel-a lame: «Gese, tõnd yaa fo kõaba, la f yĩng nemdo.

² Pĩnda a Sol sẽn da waa n dɩt a naama, foom n da zoet n lʋɩt a Israyɛl taoore, a yit bɩ a kẽeda. Soaala, f Wẽnnaam, yeel-f lame: yaa foom n na n kɩɩm m buudu, a Israyɛl, la foom n na n yɩ a naaba.»

³ Yaa woto la a Israyɛl nin-kẽemsa fãa wa dĩma nengẽ, Ebrõ. A Daviid wẽena Ebrõ, Naaba-Wẽnd taoore, t'a na pids b sẽn datã. B pʋdga a zug kaam, t'a lebg Israyɛl dĩma, wala Naaba-Wẽnd sẽn da yeel ne a Samwɛl noore.

⁴ A Daviid ne Israyɛl gilli kẽngame n tɩ wẽ Zerizalɛɛm gũbri n lub-a. Tẽnga ra boondame tɩ Zebus tɩ Zebuzitse n da kẽed-a.

⁵ La Zebuzitsa yeela a Daviid: «Fo ka na n kẽ d tẽnga ye.»

⁶ La a Daviid deega Siõ tãnsoben-doogã, tɩ lebg a na-tẽnga. La a Daviid yeelame: «Sẽn denga Zebuzitg kʋʋbo yẽ soab n na n lebg m tãb-biisa tãnsoaba.» A Zoab, a Seruya biiga n deng n dʋ n tak zabrã la a lebga tãnsoaba.

⁷ A Daviid tɩ kẽe tãnsoben-doogã tɩ zĩ-kãng na n bool t'a Daviid na-tẽnga.

⁸ A maneg n mee tẽngã n gilgi, n sĩd Milo longã, n me lal-gũbrã. A Zoab n me tẽnga sẽn kellã.

⁹ A Daviid naama waa n paama pãnga tɩ Naaba-Wẽnde, a Israyɛl Wẽnnaam, ra bee ne-a.

A Daviid gãndaado

¹⁰ A Daviid gãndaada kãsem-dãmb naaga ne a Israyɛl zãng fãa n sõng a Daviid t'a rɩ naama wala Naaba-Wẽnd sẽn date.

¹¹ A Daviid gãndaada yʋy la woto: a Isbaal; a ba yaa Akmonitga la gãndaad pis-tã wã nin-yende. Yaa yẽ n kaoog zabre, daar a ye, ne neb kobs-tã la a kʋ-b-la zãnga t'a nug na n yaool n vʋʋs ne a kãnda zẽkr la kõsbo.

¹² Sẽn pʋgda yẽ, yaa a Elazar, Awoyitga a Dodo biiga, a da yaa gãndaad a tãabã nin-yende.

¹³ A da bee Pa-Damim ne a Daviid. Filisti dãmba waa be n na n kaoog zabre. Pʋʋg me n da be be n pelg ne alkam kɛgenga la tãb-biisa sẽn da zoet Filisti rãmba taoore, waa n kẽ-a lame.

¹⁴ Bãmb b tãaba tɩ yalsa pʋʋga tẽnsʋka n dig beebã, n kʋ Filisti rãmba. Wẽnd yĩnga a Israyɛl tʋma raood beelẽ n tõog bɛɛba gilli.

¹⁵ Gãndaad pis-tã wã sʋka neb a tãabo n bʋʋg a Daviid Pĩig ninga sẽn pẽ Adulam tãn-bokã; dẽ tɩ Filisti rãmba da maana b tãb-sika Refayim dãmba tãn-longẽ.

¹⁶ A Daviid da bee tãn-boka pʋga, tɩ Filisti rãmba tãb-biis bogr da be Bɛtelyɛɛm.

¹⁷ A Daviid waa n kosa woto: «Ãnna n na n kõ-m koom tɩ m yũ? M data bulg ninga sẽn be Bɛtelyɛɛm noorẽ wã koom n yũ!»

¹⁸ Gãndaad a tãabã fõrg n kẽe Filisti rãmba tãb-sikã n tɩ yõng koom Bɛtelyɛɛm noorẽ kobaoorã n tall n wa kõ a Daviid. A Daviid pa sak n yũ kooma ye, la a raag-a-la Naaba-Wẽnd taoore.

¹⁹ A yeelame: «Bɩ Wẽnd sɩbg maam n bãge m sã n yũ ko-kãnga. Na yɩẽ wala yaa nin-bãmba zɩɩm la m yũ-ya tɩ b saka b yõor yãkre n tõog n paam ko-kãnga.» Gãndaad a tãabã sẽn maan la boto.

²⁰ A Abisayi, a Zoab ba-biigã, yẽ me da yaa gãndaad pis-tã naaba. Yẽ me kaooga zabre ne neb kobs-tã la a kʋ-b-la ne a kãnde, t'a yʋʋr yi gãndaad pis-tã wã sʋka.

²¹ A paama ziiri n yɩɩd gãndaad pis-tã wã n wa tol n legb b naaba, la a ziira ka ta gãndaad a tãabã rẽnd ye.

²² A Benaya, a Zoyada biiga, Kabseyɛl dao, yẽ la gãndaoog menga sẽn tʋm tʋʋm bɛda. Yẽ n kʋ Moab gãndaad a yiibu, yẽ n sig loangẽ n kʋ gɩgemde, wulg sẽn maan daare.

²³ Yaa yẽ me n le kʋ Ezipt ned ninga woglem sẽn da ta kãntɩɩs a nu, n zãad a nugẽ, kãnde sẽn zem koeer bõanga. A seg-a-la ne a dasaar bala, n fãsg kãndã Ezipt daoa nugẽ n lɛɛg n kʋ-a ne a meng kãnde.

²⁴ A Benaya, a Zoyada biiga me sẽn maan la woto, la rẽ kɩtame t'a yʋʋr yɩ gãndaad pis-tã wã sʋka.

²⁵ A paama ziiri n zʋʋg gãndaad pis-tã wã, la a ziirã ka ta gãndaad a tãabã rẽn ye. A Daviid kẽes-a-la a tãb-gũudba sʋka, sẽn gũud-b yẽnda menga sʋka.

²⁶ Gãndaad la sũ-keelem dãmba a taaba sẽn kellã yʋy la woto: a Asayɛl, a Zoab ba-biiga, a Elana, a Dodo biiga, Bɛtelyɛɛm daoa.

²⁷ A Samot: Arotitga, a Elɛs: Pelonitga.

²⁸ A Ira, Tekoa daoa a Ikɛs biiga; a Abiezɛr, Anatot daoa.

²⁹ A Sibkayi, Usa daoa; a Ilayi, Aoya daoa.

³⁰ A Marayi, Netofa raoa; a Elɛd Netofa raoa, a Baana biiga.

³¹ A Itayi, Gibeya daoa, a Ribayi biiga, a Bẽnzame roogẽ; a Benaya, Pireatõ raoa.

³² A Urayi, Gaas kʋɩlsẽ dao; a Abiyɛl, arvatitga;

³³ a Azmavɛt, Bawurim daoa; a Eliyaba, Saalbonitga;

³⁴ a Bene-Asem, Gizõ daoa; a Zonatã, Arar daoa a Sage biiga.

³⁵ A Ayiyam, Arar daoa a Sakar biiga; a Elifal, a Ur biiga;

³⁶ a Efɛr, Mekera daoa; a Ayiya, Pelonitga.

³⁷ A Esrõ, Karmɛl daoa; a Naarayi, a Ezbayi biiga;

³⁸ a Zowɛl, a Natã ba-biiga; a Mibar, Agritga.

³⁹ A Selɛk, Amonitga; a Narayi, Beerot daoa, sẽn da zãada a Seruya biiga, a Zoab, zab teedã.

⁴⁰ A Ira, a Yetɛr roogẽ; a Garɛb, a Yetɛr biiga.

⁴¹ A Uri, Ititga; a Zabad, a Alayi biiga,

⁴² a Adina, a Siza biiga, a Rubẽ yagensã kãsma la gãndaad pis-tã taoor soaba.

⁴³ A Ana, a Maaka biiga la a Zozafat, Mitenitga;

⁴⁴ a Uziya, Astarot daoa; a Sama la a Yeyiyɛl, Aroɛr daoa a Otam kamba,

⁴⁵ a Yediayɛl, a Simri biiga, n paas a ba-biiga, a Zoa, Tisitga;

⁴⁶ a Eliyɛl Maavim daoa; a Yeribayi la a Zosabiya, a Elnaam kamba; a Itma, Moabitga;

⁴⁷ a Eliyɛl, a Obɛd ne a Yasiyɛl, Soba dapa.