1 Kibayã 10 - SEBR SÕNGO

A DAVIID KIBARE A Sol kũum

¹ Filisti rãmba waa n kaooga zabre ne a Israyɛl, Gilboa tãnga. Israyɛl kamba zoe Filisti rãmba taoore, b pogl-b lame tɩ b lʋɩ n ki Gilboa tãnga zugu.

² Filisti rãmba lɛɛg n kẽ-la a Sol ne a kamba n kʋ-ba, B kʋ-la a Zonatã, a Abinadab, a Malkisuwa, a Sol kamba.

³ Zabra waa n wɩnga a Sol zĩigẽ n yɩɩda, la tãb-biisa paama a Sol n pogle.

⁴ A Sol yeela sõgna sẽn da zãad a zab-teedã: «Wõog f sʋʋgã n kõs-ma, tɩ nin-dẽgd bãmba da wa yaal maam ye.» La sõgna pa sak ye. Dabeem da tar-a-la wʋsgo. A Sol wõoga a sʋʋga n bas a meng n lʋɩ n bʋʋg-a, n kʋ a menga.

⁵ Sõgna sẽn mik t'a Sol kiime, yẽ me lʋɩ n bʋʋga a sʋʋga n kʋ a menga.

⁶ A Sol kii woto ne a kamb a tãabã t'a roog gill naag n wã.

⁷ A Israyɛl neba fãa sẽn da be tãn-longẽ wã sẽn yãend tɩ neba zoeeme la a Sol ne a kamba kiime, bãmb me basa b tẽns n zoe, tɩ Filisti dãmba wa reeg b tẽnse n kẽedẽ.

⁸ Vẽkembeoogo Filisti rãmba waame n na n zɛ sẽn ki-ba teedo. B yãenda a Sol ne a kamba sẽn gãe Gilboa tãnga zugu.

⁹ B yeesa a Sol futã la b looga ne a zugu la a zab teedo, n yaool n tʋm tɩ b saag Filisti rãmba tẽns n togs kibar sẽn ya noogo, b wẽn-naandsa la b buuda yĩnga.

¹⁰ B bĩnga a Sol zab-teedã b pʋʋsga roogẽ, n yaool n ka a zu-wangã a Dagõ doogẽ.

¹¹ Yabɛs-Galaad dãmba fãa wʋma Filisti rãmba sẽn maana.

¹² Gãndaadã fãa kẽngame n tɩ rɩk a Sol ne a kamba n wa Yabɛs, la b muma b kõaba Yabɛs, tɩ-kãseng tẽngre, la b loe b noor dasem a yopoe.

¹³ A Sol kii woto, a sẽn da beeg Wẽnd yĩnga, n pa reeg b noore, la a sẽn kos pagã t'a sok kɩɩmsa yĩnga.

¹⁴ Yẽ pa bõs Wẽnd saglg ye, dẽ n so tɩ b bas t'a ki, n deeg a naama n kõ a Zese biig a Daviid.