1Tesalonik Rãmba 5 - SEBR SÕNGO

Soaala waoong gũudem

¹ Sã n ya Krista Waoonga sasa la a wakato, ka pakre tɩ d le gʋls-y sebr ye.

² Y mens mii vẽenega tɩ Soaala Waoonga na n yɩɩ yʋn sʋka, wala wagdr waoongo.

³ Neba sẽn wat n gomda: Laafi wa yã! Dabeem sɛ yã! Yaa wakat kãng la yel-beeda na n lʋɩ vugr bala b zugu. Toogo wa pag sẽn kũmd dogem toogo, n na n tiig-ba, la põasg ka ye.

⁴ Sã n ya yãmba, m saam-biisi, ka likẽ la y zĩ yã n na n bas tɩ raara wa tiig-y wa wagdr ye.

⁵ Y fãa yaa yɩng neba, y fãa yaa vẽenem kamba, d pa yʋng la likẽ dãmb ye.

⁶ Bɩ d da bas tɩ gõeem tõog-do wa neb a taaba ye, d da gũs ye, d zãag d mens ne yão-beedo.

⁷ Yaa yʋng la gõeema rãmb nong n gũsi la yʋng me la rã-tɩgdba yũud n gãeemnẽ.

⁸ Tõnd sẽn ya vẽenem dãmba bɩ d minim n yõk d mense. Bɩ d tẽebã la d nonglem yɩ d kut fu-yorgo, tɩ fãagra saagr yɩ d kut zug peoogo.

⁹ Ka namsga zĩigẽ la Wẽnd boond tõnd n na n kẽes ye, b boond-d-la fãagra zĩigẽ.

¹⁰ A Zezi Krista kii tõnd yĩnga, la bãmb maasem yĩnga, b ratame tɩ d vɩɩma, rũnna wala beoog soaba, wa sog ne bãmba.

¹¹ Dẽ me yĩng la y tog n kell n kẽne wa y sẽn sɩngã, n kõt taab raoodo la togs-n-taar sõngo.

Vɩɩma Tigeng pʋgẽ

¹² D kot-y lame, d saam-biisi, tɩ y waoog neb niyns sẽn be-b yãmb sʋka n gãd Krista tʋʋmna zugu, n ya kãsem-dãmba la yãmb sagendba.

¹³ Nong-y-b zãnga ne nonglem kãsenga, b tʋʋmda yĩnga. Zĩnd-y laafi ne taaba.

¹⁴ D kot-y lame, d saam-biisi, tɩ y legl sẽn ka tar-b vɩɩm sõnga la y keng sẽn tar-b rabeem sũya. Kogl-y sẽn pa tar-b pãnga. Wilg-y b fãa gilli tɩ y yaa tõog-m-meng rãmba.

¹⁵ Ned da tug beem n lebs beem ye. Tʋlg-y neer ne taaba la ne neba fãa gilli.

¹⁶ Yɩɩ neb sẽn pid ne sũ-noog wakat buud fãa.

¹⁷ Da viig-y ne pʋʋsg ye.

¹⁸ Y yɛla sẽn be zĩig ning fãa bɩ y ket n tar bark pʋʋsgo tɩ yaa Wẽnd la Krista a Zezi n dat rẽ fãa, y yĩnga.

¹⁹ Da zãgs-y y mens ne a Vʋʋsem Sõng kũuna ye.

²⁰ Da yeel-y tɩ bãngr kũun ka yõod ye.

²¹ Tũus-y sẽn ya sõmbo n gãd rẽnna.

²² Zãag-y y meng ne wẽng buud fãa.

Baasgo

²³ Bɩ laafi Wẽnda pids-y zãnga ne sõmblem. Bɩ bũmb da zĩnd y nengẽ, y sɩɩgẽ bɩ y yĩngẽ, n ka tog ne Soaal a Zezi Krista, b Waoonga raar ye.

²⁴ Sẽn boola tõndã ka mi a pʋlem n ka pids ye. Dẽnd yĩngã d na n paama b kũuna zãnga.

²⁵ Pʋʋs-y tõnd me yĩnga, m saam-biisi.

²⁶ Pʋʋs-y d saam-biisa fãa ne pʋ-peelem pʋʋsem.

²⁷ M kot-y-la Soaala yʋʋr yĩnga, tɩ y karem seb kãnga d saam-biisa fãa.

²⁸ Bɩ Soaal a Zezi Krista bark pa ne yãmba!