1Tesalonik Rãmba 3 - SEBR SÕNGO

A Pol tʋmda a Timote Tesalonik

¹ Tooga sẽn waa n tar-d wʋsgo, d kaoolame tɩ d na n pa-la d ye Atɛn Na-tẽnga,

² n yaool marsã n tʋm y nengẽ ned sẽn na n kɩt tɩ y tẽeba kɩ yẽgna la a yẽege, n tʋm a Timote, d saam-biiga la d sõangda ne Krista Koɛɛga moonego.

³ Tẽeba sã n kenge, ned ba a ye kõn sake tɩ namsga wa ne a lʋɩɩs ye tɩ y mi tɩ namsgo la d pʋɩɩre.

⁴ D sẽn waa n be ne taabã, d ka wilg-y tɩ y na yãend toogo. Dẽn n be tɩ y fãa neẽ.

⁵ Dɩlla yɛla sẽn waa n yɩɩd-ma, m tʋma a Timote t'a wa rɩ y tẽeba kaseto. M sẽn zoet yaa Kʋɩɩbda na n wa kʋɩɩb yãmb tɩ tʋʋmda wa mud zãnga.

Bark pʋʋsgo

⁶ A Timote yii yãmb nengẽ n nan wa paalem la kibar ning a sẽn kõ tõnd y tẽeba la y nong taaba poorẽ, yaa kibar noogo. A yeelame tɩ y ket n tẽra d yelle, n pẽgda. A yeelame tɩ yãmb me baooda tõnd yãeebo, wa tõnd sẽn baood n yãend yãmbã.

⁷ Ad-y y tẽeba kõo tõnd daoodo d yɩɩre la d namsga pʋgẽ.

⁸ Marsã vɩɩm le kẽ-la d yĩngẽ, d sẽn bãng tɩ y ka lak ne Soaala bada.

⁹ Sũ-noog la d paam y nengẽ n kɩdemd Soaala taoore la d yɩta a wãn n pʋʋs bark tɩ seke?

¹⁰ Ad-m sẽn kot-y ne pẽdegre, wĩntoog la yʋngo: b sõng tɩ d le yãend y nenga la b sõng tɩ d lek bũmb ning sẽn paoog y tẽebã.

¹¹ Bɩ Wẽnnaam menga, tond Ba la Soaal a Zezi Krista maneg d sor tɩ d ta y nengẽ.

¹² Bɩ Soaala bɩɩs la b paas y nonglma pãnga, nonglem ning y sẽn nong taaba la y nong Adem biis fãa wã. B sõng t'a wẽneg nonglem ning tõnd sẽn nong yãmbã.

¹³ Bɩ b pids-y ne raoodo tɩ y sõmblema yɩ sõmblem akɩk Wẽnd Ba taoore, daar ning d Soaal a Zezi Krista sẽn na n lɛɛg n wa tɩ b nin-sõma wã yãagd-b.